زيزو : أنا مش دايما شايف نفسي نجم.. والمنافسة في الأهلي صحية

عبر أحمد السيد زيزو، لاعب النادي الأهلي الجديد، عن مشاعره عقب أول ظهور له بقميص الفريق الأحمر في مباراة باتشوكا الودية، مؤكدا أنه يقيم نفسه بمعايير شخصية بعيدا عن الضجة الإعلامية ومواقع التواصل.
وقال زيزو في تصريحات خاصة عبر قناة "أون":
"أنا بحب أقيم نفسي، حتى لو كله قال عني كويس والسوشيال ميديا كلها مقلوبة إن زيزو ده نجم الماتش وكده، أنا أوقات بيبقى جوايا إحساس إني لأ.. مش أحسن حاجة، وده اللي بيساعدني أطور من نفسي دايمًا".
وأضاف:
"المنافسة داخل الأهلي قوية وصحية، وأنا شايفها حاجة كويسة جدًا. كل اللاعبين كبار وعندهم تحدي وطموح، والهدف هو إننا نوصل بالنادي لأبعد نقطة ممكنة في كل البطولات، وده بيخلي كل واحد فينا يبذل أقصى ما عنده".
وعن مشاركته المفاجئة في مواجهة باتشوكا، أوضح: "بصراحة ماكنتش متوقع ألعب الماتش. وصلت قبلها ب24 ساعة وملحقتش أتمرن مع الفريق، وكان الاتفاق إني أتمرن تمرينة خفيفة يوم الماتش، لكن لما اتكلمت مع المدير الفني، قالي إنه عاوزني أدخل مع الفريق على طول".
وتابع زيزو: "أنا كنت متحمس ومستعد جدًا إني ألبس تيشيرت الأهلي، واتفقنا إني ألعب 15 أو 20 دقيقة، وكنت هبدأ أسخن في الدقيقة 55 تقريبًا، لكن فوجئت لما قالي قوم انزل بعد إصابة جراديشار".
وكشف اللاعب عن استعداده البدني خلال الفترة الماضية، مؤكدًا أنه كان يسعى للحفاظ على لياقته رغم غيابه عن المباريات الرسمية:
"أنا جاهز بنسبة 100%، وكنت مركز جدًا في الفترة اللي فاتت على إني أكون في فورمة كويسة، عشان مكنتش بلعب ماتشات. كنت متخوف من عدم جاهزيتي، فزودت التمرين على نفسي شوية".
واختتم تصريحاته قائلًا:
"الحمد لله ظهرت بشكل كويس واتطمنت على نفسي في أول ماتش. بعد 24 ساعة سفر ومن غير تمرين، إنك تدخل وتقدم أداء جيد، ده فضل من ربنا، وإن شاء الله الجاي يكون أفضل".