لأول مرة.. منة القيعي تكشف تفاصيل أزمتها الصحية ونجاتها من الموت

كشفت الشاعرة منة عدلي القيعي تفاصيل أزمتها الصحية التي مرت بها لأول مرة وكواليس نجاتها من الموت وذلك بعد حصولها على 7 جوائز عن أعمالها الغنائية في رمضان 2025 ب«كأس انرجي» للدراما.
ونشرت منة صورة لها من الجوائز عبر صفحتها الشخصية على انستجرام علقت قائلة :«حكاية ماكنتش ناوية احكيها بس هحكيها.. من 7 شهور واحنا لسة بنسخن عشان نحضر لشغل رمضان حسيت بصعوبة في التنفس كانت بتزيد كل يوم إلي أن تحول الموضوع لنوبات اختناق تقريبا».
وتابعت :«كانت بتتسبب في تسارع في ضربات القلب توصل ل 180 و190 واوقات كتير الموضوع كان بيطول كنت بحس اني مش هعديها» مشيرة إلى تعرضها لحادث كادت أن تفقد حياتها خلاله قائلة:« بعد شهر واتنين من الفحوصات والتشخيصات المختلفة جالي نوبة من دول وانا سايقة وتسببت في حادثة كانت صعبة شوية».
View this post on Instagram
A post shared by Menna el kiey منة القيعي (@mennaelkiey)
إقرأ ايضا: محمد سامي عن المشاهد الجريئة: مش هسأل 300 مليون عربي تحبوا تشوفوا ايه؟
وأضافت :«راحت فيها عربيتي والحمد لله برضه نجوت منها باصابات خفيفة وكنا بنحمد ربنا الف حمد... بعدها الامور تدهورت اكتر والنوبات كانت بتوصل لمرتين و3 و5 في اليوم الواحد... فيه ايام كنت بوقف عربيات ناس ماعرفهاش في الشارع واقولهم خليكوا معايا من الخوف».
وأوضحت قائلة :«ابتديت رحلة علاج طبيعي للتنفس وكنت حرفيا بتعلم ازاي اتنفس من الاول... واليوم اللي كنت بتنفس فيه "صح" لدقيقة متواصل كنت بعيط من الفرحة.. ويوم بيعدي ويوم احس انه مابيعديش لحد ما وصلنا لهنا...ال 7 شهور دول هما اللي ربنا كرمني فيهم ب الاغاني دي... صاحبي يا صاحبي وكل سنة وتقابل حبيب والي اخره من الشغل اللي اتعرض في رمضان 25».
واستكملت منة عدلي القيعي :«اغاني منهم اللي اتكتبت وأنا في مستشفي واللي اتكتبت وانا علي جهاز تنفس واللي اتكتبت وانا بعيط ... فيه ايام من الاحباط كنت بفكر ابطل احاول اخف... بس عمري ما فكرت ابطل كتابة... وكنت بدعي ربنا يكرمني ويجازيني وكنت بكلمه واقوله يارب وقفني ووقفني علي رجلي تاني».
واختتمت حدثها قائلة :«اللهم لك الف حمد وشكر.. 7 جوايز حصيلة 7 شهور مروا بكرم الله ولطفه..شكرا لاهلي وعيلتي وجوزي وصحابي والناس اللي اشتغلت معاهم كلهم...طلعت عنيكوا وقلقتكوا وعملتلكوا ازعاج واستحملتوني... شكرا من كل قلبي».
احتفال منة القيعي بعقد قرانها
وكانت الشاعرة منة عدلي القيعي قد أحتفلت مؤخرا بعقد قرانها على الفنان يوسف حشيش بحفل عائلي بسيط حضره عدد من الأصدقاء المقربين والعائلة بعد 7 شهور من إعلان خطوبتهما.