بدأت حياتي صياد واشتغلت عامل تراحيل .. "بيج رامي" يكشف ل برنامج «كلم ربنا» مسيرته الصعبة

«بيج رامي» : لعبت واحترفت بالصدفه وتعرضت للإفلاس والظلم والقهر لكن ربنا وقف معايا ونصرني .
كشف لاعب كمال الأجسام العالمي ممدوح السبيعي الشهير ب«بيج رامي»، إنه بدأ حياته يعمل صيادًا في كفر الشيخ ، واستمر حتى تخرجه من الجامعة، لكنه مر بعدها بأزمات دفعته إلى السفر إلى دولة الكويت للعمل هناك.
وأضاف «البيج رامي»، خلال إستضافته في أولي حلقات برنامج «كلم ربنا» علي الراديو 9090 الذي يُقدمه الكاتب الصحفي أحمد الخطيب: «كفيلى لما شافني، قالي امشي خلاص.. شوفلك كفيل تانى.. مش عايزك وشكلك مش عاجبني»، وتابع: «بعدها قعدت 4 شهور شغّال عامل تراحيل على الطريق، أى حد ياخدني يشغّلني يوم عشان أجيب أكلى وشربي، وكنت ساكن مع 14 واحد في غرفة، عشان مفيش فلوس وأقدر أعيش».
وأشار إلى أنه الصدفه قادته للعمل في " جيم" حارسا ثم مدربا وهو ما كان سببا في لعب كمال الأجسام قائلا" اشتغلت في الجيم بدون أجر مقابل إني أنام بعد ما كنت بنام في الشارع "
وأنا في الجيم قررت أشارك فى بطولة لكمال الأجسام بالكويت والمفاجأه اني كسبتها بعدها دخلت بطولة العالم للهواة بعد 6 شهور هناك والمفاجأه الأكبر إني فزت بيها " عنيا كانت بتمطر دموع وببكى بشدة عشان حسيت إن ربنا بيطبطب علىّ»،
لافتًا إلى أن ما حدث معه لا يصدق، كيف انتقلت من «حد كان بينام فى الشارع حرفيًا، إلى شخص أصبح صاحب ثروة"
واستطرد: «فى 2013، كسبت تالت أقوى بطولة فى العالم للمحترفين، والشركة رفعت التعاقد ل500 الف دولار وده أمر فوق خيالي ، لكن فجأة فى 2017، كل الشركات سابتنى وخسرت كل حاجة، وبدأت محنتي فى 2018 لما طلعوني من البطولة وسبت الكويت ورجعت مصر مكنش معايا حتي مصاريف بيتي وفلّست، ورغم كدة روحت ألعب «أولمبيا» في 2020، لكن للأسف جاتني «كورونا».
اقرأ أيضا : نشرة «التوك شو»|الإفتاء: الإفطار يكون مع الأذان ليس بالمدفع
وأشار بيج رامي إلى أنه يمكن القول «عشت 3 سنين افلاس.. مشاكل مالية.. حلم بيضيع» لكن فضلت أتمرن لدرجة إن الناس كانت مستغربة، وكنت بقولهم: «ربنا هيحلها من عنده»، وبعد 10 أيام فوجئت بدعوة خاصة لبطولة «أولمبيا»، وده محصلش قبل كدة لحد، وروحت البطولة وربنا كرمنى بالمركز الأول، لأول مرة فى تاريخ مصر، ثم ربنا أكرمنى بنفس البطولة فى 2021، وبقي عندى يقين أن ربنا عُمره ما سابني، وأقول لنفسي دلوقتى: «شكرا انك اتعلمت الدرس.. وانك سعيت ورميت شباكك وربنا كرمك».. وبقول لربنا: «الحمد لله انك أنعمت عليا بنعمة اليقين فيك، وذلة الانكسار إليك.. لأنها متعة حياتي دلوقتى».