( مفروسة أوى)

بجد أنا مفروسة أوى من الناس اللى بتجرى ورا أى حاجة مهما كانت! حتقولوا زى إيه؟
حقول لكم روحوا منطقة النزهة الجديدة وأنتم حتشوفوا طوابير بنات وستات ورجالة، على إيه بقى، على أطباق وشوك وبرطمانات وما شابه من أدوات واختراعات صينية تغزو الأسواق بأسعار أقل من العادية بكتير!
السؤال اللى لازم تسأله لنفسك: هل هذه الأشياء لا يستطيع البيت الاستغناء عنها؟ حقولك بالطبع لا.
نفس الطوابير على أدوات المطبخ والزينة التى يتراوح سعرها ما يوازى من دولار إلى 10 دولارات، شفناها لما أعلنت كبرى شركات السيارات عن سعر جديد لسيارتها يقارب ال 2 مليون جنيه!
وهى هى نفس الطوابير اللى بنشوفها قدام الحجز فى كمبوندات الفيلات والشقق أم 20 مليون وطالع، أو منتجعات الساحل الشمالى التى تفوق أسعارها الخيال!
وإذا كانت هذه الطوابير على الرفاهيات وذات الأسعار الباهظة، فلماذا نشتكى غلاء اللحم والبيض والخضار والفاكهة؟
هناك إجابات متعددة لهذا السؤال:
الأولى أن الشعب المصرى حضرتك 110 مليون بنى آدم، فطبيعى يبقى فيه 5 أو 6 مليون ويمكن 10 مريشين وعندهم ملايين، وزيهم فى آخر الصف بيكملوا عشاهم ميه! وفى منطقة الوسط 50 شريحة أخرى من المصريين بيقاوحوا .
قلت لى الكيلو البانيه بكلم النهارده؟
- مفروسة جدًا من الطقس بصراحة لا الصيف عايز ينسى ولا الشتاء راضى يجى! التغيرات المناخية تضرب الأرض شمال ويمين، وولاية أمريكية جديدة تنوى إلغاء الموافقة على اتفاقية باريس للمناخ والموافقة على زيادة إنتاج النفط بمنطق إحيينا النهارده وموتنا 2050 ويا عالم مين يعيش!
- معقولة فى شهر واحد تظهر أكثر من 7500 شائعة! إحنا سمعنا عن ماكينة الشائعات، بس فى حالة هذا الكم الهائل فى وقت قصير لا أعتقد أنها ماكينة شائعات واحدة ولكن مصنع كامل يوجه أسهمه السامة إلى مصر، أما كيف نتعامل مع هذه الشائعات سواء كانت من ماكينة واحدة أو مصنع، فالحل فى حضرتك ياعزيزى لابد أن تكون حائط صد، شغل عقل حضرتك وارفض كل ما تراه غير عقلانى ساعتها والله لو بقى عندهم منطقة صناعية لن يؤثر فينا .