مفروسة أوى

افتكاسة بيع قناة السويس باينة وواضحة من أولها، إنها مجرد كلام فى الهوا ولا أصل لها، الغريب بقى ان فيه ناس قعدت تكتب تفند لو خدنا كدولة مبلغ زى ده نعمل إيه؟ وفيهم من اقترح شق قناة سويس تالتة تمر فيها السفن بدون مقابل! يا أهل الخير عارفين حالنا حيكون أحسن إمتى؟ لما كل واحد يعمل شغله وبس ويفكر فى حياته وعمله وبس وزمان قالوا: إدى العيش لخبازه، ورغم ذلك كل واحد فينا معين نفسه دولة ووزارة وجهات مسئولة داخل الدولة! ليه؟! معرفش!

من شوية سنين قليلة كانت الناس بتقول: المواقع الالكترونية حتقضى على الصحافة الورقية، والحقيقة انها بالفعل أثرت على عدد القراء، والتوزيع، رغم ان الجرائد جريت وراء السوشيال ميديا، الآن القنوات التليفزيونية تلهث وراء اليوتيوب والتيك توك، بينما التقارير العالمية تقول ان كلها كام سنة والموبايل ينتهى هو وكل أجهزة الكمبيوتر وسيصبح لدى كل فرد شريحه الكترونية عليها كل البرامج والأبلكيشن التى نستخدمها، هى الدنيا رايحة بينا على فين؟!

أحيى قرار الشركة المتحدة للخدمات الإعلامية لفتح شاطئ مجانى فى مدينة العلمين الجديدة، فقد حولوا ببساطة الساحل الشرير إلى ساحل طيب يستقبل كل الناس لا فرق بين أونر أى صاحب ملك ومستأجر، تصرف بسيط ولكنه يحمل معنى إنسانيا رفيع المستوى أن البحر ملك الناس كلها مش حكر على أحد، كل ما أطلبه هو أن يكف مراسلو القنوات الفضائية عن كلمة الشاطئ المجانى، نعم هو بالفعل مجانى لكن تكرار الكلمة كثيرا يفقدها معناها الإنسانى الكبير، شاطئ الشركة المتحدة وكفى.

فى مهرجان العلمين أيضا تأتى فكرة وضع شاشات خارج اطار الحفلات ليشاهد المصطافون ويسمعوا كبار النجوم خارج إطار الحضور داخل الحفل وبدون تذاكر.. فكرة أيضا جميلة ولها معنى إنسانى وتستحق التحية والاحترام .