حورية فرغلي باكيةً: «شُفت الحب مرة واحدة في حياتي مع خطيبي سنة 2002»

خطيبي كان 175 كيلو وبيعرج برجله.. لكن كنت بشوفه أحلى راجل في الدنيا

استعادت الفنانة حورية فرغلي ذكرياتها، عن خطيبها الراحل، الذي ارتبطت به بشكل كبير، فرغم مرور 21 عامًا على وفاته إلا أنها لم تستطع أن تمحِ هذا الحب، وأن ترتبط برجل غيره، حيث أشارت الفنانة إلى أن الأخير كان يعاني من بعض الظروف الصحية، لكن رغم مرضه إلا أنها تراه أجمل الرجال في عيونها.
وتحدثت حورية فرغلي عن خطيبها، خلال لقائها مع الإعلامي تامر شلتوت، في برنامج في العمق، حيث قالت: أنا شُفت الحب مرة واحدة في حياتي سنة 2002، مع خطيبي اللي توفى، ومن بعده محبتش حد تاني رغم مرور 21 سنة، خطيبي اللي مات كان 175 كيلو، وكان عنده مشكلة في رجله الشمال، فكان بيذق، وكنا قد بعض في السن.
اقرأ أيضا:فيديو| بعد سقوط حورية فرغلي.. نجوم تعرضوا لمواقف محرجة أمام الجمهور
وتابعت حورية فرغلي: رغم مرضه لكن كنت بشوفه أحلى راجل في الدنيا، والناس كلها تقول إيه الجنان ده، لكن مكنتش ببص لكلامهم بصيت لقلبه واللي جواه، كفاية أني سامعه صوته، كفاية وجوده في المكان ريحة برفانه، من ساعة ما مات وأنا مش لاقيه حد غيره.
وأضافت حورية فرغلي: قضينا سنتين سوا متخانقناش مرة، كل ما أطلع الاولى في الفروسية أروح البيت ألاقيه جايب لي تورتة كبيرة عليها صورتي ولعب، بدور على حبه مش لاقياه، ساعات بقول لنفسي أنا شُفت الحب ده كله ليه لما في الآخر هيتاخد مني، لكن ربنا اللي عايز كده.
واستكملت حورية فرغلي: من بعد وفاته مرتبطش بحد ولا حد أتقدم لي، رغم مرور 21 سنة مشوفتش زيه، مش عارفة ليه، بتحب كتير بس بتصدم لما أعرف السن، وفي شاب بعت لي رسالة طويلة يعبر فيها عن حبه لي، قلت له أنت عندك كام سنة، قالي 22 سنة قُلت له انت قولي يا طنط.
واختتمت حورية فرغلي: أنا معنديش صحاب ومبخرجش خالص، وبحب الحيوانات جدًا، كان عندي 13 كلب دلوقتي بقا 1، وعندي 8 أحصنة، مبخرجش مع الناس لأن محدش بيعزمني على حاجة، اتعودت اعيش لواحدي وبراحتي، بيتهيألي لو أتجوزت مش هستحمل حد ينام جمبي على السرير، كمان هيبق في مشكلة، لأني بحب أمشي في شقتي براحتي واجري مع الكلاب، مش شرط كل يوم ميكب وشعر ورموش، أنا باكل ضوافري أصلا.
جدير بالذكر أن برنامج in Deeb في العمق، يقدمه الإعلامي تامر شلتوت، عبر قناته الرسمية على موقع الفيديوهات الشهير يوتيوب، ويعرض يوم السبت من كل أسبوع، ويستضيف "شلتوت" خلال حلقات البرنامج مجموعة من نجوم الفن، الذين يكشفون أسرار وحقائق لأول مرة عن حياتهم الشخصية .