مفيدة شيحة: أقسم بالله عايزة أحلق شعري زي أسما شريف منير

علقت الإعلامية مفيدة شيحة، على حالة الجدل الذي أثارته أسما شريف منير بعد قص شعرها وظهورها في مهرجان القاهرة للدراما.
وأكدت مفيدة شيحة خلال برنامج "الستات" المذاع على قناة "النهار": "لما أسما شريف منير طلعت وقالت هحلق شعري علشان مجهد وبايظ أقسم بالله كنت بفكر في نفس الطريقة دي وقلت لو بعد الصيف هحلقه إيه اللي هيحصل يعني".
وأضافت: "أسما شريف منير أنا شيلت هم حلق شعري وأنتِ شجعتيني وحفزتيني، وعايز أقول لها أنتِ قمر واحنا مع الحرية الشخصية ومش هي اللي ركبت التريند الناس اللي خلوها تركب التريند، احنا مش فاضيين أوي نفكر بحلق الشعر علشان نركب التريند".
وعلق الفنان شريف منير على تريند صور ابنته أسما وهي حليقة الشعر على طريقة الزيرو.
وخرج شريف ليعلق على الأمر قائلًا: إيه الضجة اللي أنتو عاملينها دي، كل ده عشان بنتي قصت شعرها قدام الكاميرا.. إيه الغلط اللي هي عملته.. تصرف عادي جدًّا مفيهوش أي حاجة.. اوعوا تفتكروا إني ممكن آجي على بنتي عشان أكسب رضاكم.. دي بنتي اللي مليش غيرها واللي بحبها".
وأضاف: "بالمناسبة اللوك اللي عملته عجبني.. بس قبل ما الإخوة اللي بيهاجموا ويقولوا بتعمل كده عشان تريند أو أبوها ما عرفش يربيها.. لأ أنا بنتي متربية كويس جدًّا.. بس هي بتتصرف باللي هي حاسة بيه.. المهم إنها ما تكونش بتأذي حد.. قبل ما تتكلموا بصوا على نفسكم.. اتفرجوا على عيلتكم ولادكم وإخواتكم الناس اللي حواليكم.. قبل ما تنتقدوا وتغلطوا في تربية حد.. أنا بنتي متربية كويس جدًّا".
وتابع: "ريحوا نفسكم.. لأن اللي حصل من بنتي مش غلط ومش عيب.. هي ما غلطتش في حد فيكم.. هي حرة في نفسها.. وعندها 36 سنة وأم وعندها بنوتة ومسؤولة عن نفسها.. أنا أب مسؤول إني أحميها.. إنما هي حرة في تصرفاتها.. وبكرر تاني أسما أنتِ شكلك حلو جدًّا وكنتِ زي القمر وخدتِ التريند برافو عليكِ.. ما تسمعيش كلام حد.. وما تهتميش بكلام حد وأنا مش مهتم بالكلام اللي بيتقال عليَّ أو عليها.. المهم إن احنا ما بنضرش حد".