محمد سامي يكشف سبب خلافاته مع معظم الفنانين في لوكيشن التصوير

كشف المخرج محمد سامي، سبب خلافاته مع معظم الفنانين الذين يعمل معهم، وسبب انفعالاته عليهم في لوكيشن التصوير.
وقال محمد سامي في تصريحات تلفزيونية: لما بتعصب على ممثل بيبقى يا إما هو بليد، أو مواعيده مش مظبوطة، أو مش بيذاكر ولا بيحفظ، وده طبعا بيعطل زمايله.
وأضاف سامي: "هو كده هيفشل ويفشلنا معاه، ويبقى ممثل جاي متأخر ومش مركز ويسلب حقوقنا كلنا، وبتخانق معاه مهما كان مين ونجوميته قد إيه؛ لأن النجوم الحقيقيين أصلا محترمين، وعمري ما اشتغلت مع نجم كبير ومكنش محترم، دايما المشاكل بتيجي من أنصاف الفنانين".
وأضاف: أنصاف الفنانين اللي بييجي من وراهم مشاكل، بيبقى عايز طول الوقت يقول أنا نجم، فمش بيفكر في الشغل نفسه، ونجم زي محمد رمضان وأحمد السقا دول ناس تعلم جيدا إنهم نجوم وناجحين، فبيركزوا في شغلهم.
وأضاف محمد سامي: والنجوم دول أول ناس بتيجي في ميعادها، وأكتر ناس مذاكرين وعندهم حرص على نجاح المشروع، زي الفنانين عادل إمام، والراحل محمود عبد العزيز، وأحمد عز، فالمشاكل بتيجي من الناس اللي بتبقى فاكرة إنهم نجوم وبيحاول يثبت ده برغم إن دوره مش هيأثر على بيع العمل بدولار واحد حتى.
مسلسل جعفر العمدة
على جانب آخر، حقق المخرج محمد سامي نجاحا جماهيريا ملحوظا في الفترة الأخيرة، بمسلسل جعفر العمدة، الذي عرض في موسم رمضان 2023، وعرضت الحلقة الأخيرة منه أمس.
والعمل من بطولة الفنان محمد رمضان، ومجموعة من الفنانين، أبرزهم الفنانة هالة صدقي، إيمان العاصي، مي كساب، أحمد داش، أحمد فهيم، منة فضالي، زينة، وآخرين، ومن تأليف وإخراج محمد سامي.
اقرأ أيضا|محمد رمضان يرد على جدل فيلمه الجديد «هارلي»