منة فضالي: والدي سابني وأنا عندي شهرين وكان نفسي أعرف ليه؟

تحدثت الفنانة منة فضالي عن طفولتها، وكيف عانت بسبب عدم وجود والدها في حياتها، وتركها عندما كانت مولودة ولديها شهرين فقط.
واستكملت منة فضالي خلال حديثها مع الإعلامية أميرة بدر في برنامج "Vip" المذاع على شاشة "هي": طبعا كان بيأثر في البداية طفولتي إن والدي مش موجود، ولكن ماما كانت مالية الفراغ.. وشغلالي دماغي ومش بقعد في البيت لوحدي.. وجدتي وجدي وخلاني معايا ديمًا.. ولما كنت بسأل عن بابا كانت بتقولي ماما: مسافر .. شغله بره مش موجود.
أقرا ايضا | فى الحلقة السابعة من «الكبير أوي 7».. ظهور مفاجئ لأحمد السقا مع مكي
وتابعت منة فضالي: عارفه شكله وبشوف صوره.. كنت بشوف زمايلي في المدرسة بيبقى معاهم باباهم ومامتهم وانا معنديش بابا وكان بيضايقني الموضوع ده جدًا.. ولكن اختلف الموضوع لما كبرت بقيت أشوف الدنيا بشكل تاني.
وأضافت منة فضالي: الموضوع صعب جدًا بالنسبة للبنت لأن البنت بتحتاح لسند ولحضن يحسسها بالأمان.. ولما يبقى عندها مشكلة في المدرسة ترجع لباباها مش مامتها.. كنت ديمًا بلجأ لجدي وهو كان مدلعني أوي وأنا صغيرة.. حتى لما كنت بتعب بنده لماما واقولها: عايزة أشوف بابا .. طبيعي كانت واحدة صغيرة في مدرسة عايزة باباها.
وقالت منة فضالي: كنت بتكلم مع بابا وأنا صغيرة بس كل فين وفين.. وكان بيقولي مشغول ومسافر وعندي شغل .. مكنتش هفهم الكلام ده وانا صغيرة بس كنت بتضايق.. وانا كل شوية بسأله هتيجي امتى؟ وانا مكنتش أعرف إنهم منفصلين، سابني وأنا عندي شهرين او تلاتة .. أنا نفسي اعرف ليه؟ بس خلاص متأخر دلوقتي.
وتابعت منة فضالي: لما كبرت وبدأت اشتغل عرفت إن ماما اتطلقت وعرفت بعد وقت طويل.. هي كانت أول زوجة له.. وقعدوا مع بعض 12 أو 13 سنة.. أنا جيت بعد معاناة طويلة لماما في الخلفة.. وكانت بتسقط كتير جدًا.. وتعبت عشان تجيبني وجالها حمى نفاس وكانت هتموت وحاجات كتير .. أمي مرتبطة بيا زيادة عن اللزوم وانا كمان. .ماما وبابا كانوا بيحبوا بعض جدًا.. ولحد دلوقتي فيه بينهم احترام.. ووالدي من عيلة كبيرة جدًا.. مثقف ومتعلم تعليم عالي.. وطباخ كويس جدًا.
واختتمت منة فضالي حديثها: الأول كان الموضوع بالنسبة لي كره.. عشان كان موجود ومش موجود.. ولكني كنت شايفه إنه مش موجود بإرادته.. وإنه كان موجود وهو اللي مش عايز يكون موجود كانت تعباني نفسيًا.
الجدير بالذكر أن برنامج «vip» يعرض على شاشة «هي» يوميًا في شهر رمضان في تمام الساعة 11 مساءً، كما يعاد عرضه في اليوم الثاني في تمام الساعة 3 صباحًا، والساعة 10 صباحًا .