هابى فلانطاين يا محمووووود!

احم احم !

محموووووووود انت نايم يا حبيبى؟
ايوه مخمود راجع من الشغل تعبان واتخمدت!
هتتخمد من غير ماتقولى هابى فلانطاين يا حبيبى؟
يا ستى فى عرضك أبوس إيدك سيبينى فى حالى دلوقتى وليكى عليا بكره الصبح أقولك هابى فلانطاين على دماغك ودماغ اليوم اللى عرفتك فيه!
للدرجة دى بتحبنى يا محموووود؟
واكتر بكتير بس سيبينى أنام دلوقتى!
طب على فكرة يا حبييى الراجل اللى جنبنا جاب ورد لمراته يا محمود!
طب وايه المطلوب منى دلوقتى؟
تخليه يجيبلى زيها يا محمود!!
حاضر نامى دلوقتى وبكره الصبح اكلمهولك!
أنام من غير ماتعشى يا محمود، نفسى فى كام بيضة مسلوقة يا حودة!
سيبينى أنام انا فى عرضك وبكرة الصبح اجيبلك كرتونة بيض بحالها!
كرتونة بيض بحالها ليه يا محمووووود تكونش بقيت حرامى قد الدنيا يا حودة؟!
اكون زى ماكون بس سيبينى أنام دلوقتى!
حاضر بس على فكرة يا حبيبى الراجل اللى جنبنا جاب لمراته النهاردة قزازة زيت!
وايه المطلوب منى؟ أخليه بكرة يجيبلك قزازة ورد وبوكيه زيت كمان؟
ياريت تقوله يجيب قزازتين يا حبيبى مش واحدة!
حاضر حاضر بس أبوس إيدك سيبينى أنام دلوقتى!
بمناسبة البوس عايز أقولك حاجة مهمة يا حودة، الراجل اللى جبنا كان بيبوس مراته من شوية؟
ودى أعمل فيها دى كمان؟!
ياريتك تعمل زيه يا محموووود!!
طب وتفتكرى هى ترضى؟!
تحب اسألهالك يا حبيبى؟
يا مثبت العقل والدين يا رب، يا ست حلى عن نافوخى وياريت تجيبلى الأول كيسين تلاتة من القطن الطبى؟
ليه كفى الله الشر يا محموووود مالك وعايز القطن لإيه يا حبيبى؟!
عايز أسد بيه ودانى عشان أعرف أنام لغاية الصبح من غير ما اسمع صوتك خالص!!
واجيبلك ميكروكروم مع القطن يا حبيبى؟!
لا هاتيلى فنجان قهوة.
حاضر يا حبيبى سادة ولا سكر زيادة زيك يا حودة؟
سادة سادة بس قوام دماغى خلاص هتتفرتك!
طب ما عملهالك بسكر زيادة يا محموووود؟!
اللهم طولك يا روح، خلاص روحى اعمليها بسكر.
بس احنا معندناش سكر يا محمود، مقاطعينه من ساعة ما غلى يا حبيبى، هعملهالك سادة بقى وخلاص!
ماشى اعمليها سادة اعمليها حتى بتراب بس الحقينى بيها اعملى معروف!
بس احنا أصلاً معندناش قهوة يا محمود اجيبلك سلطة ياحبيبى؟!
هو الراجل اللى جنبنا مجابش النهاردة سكر لمراته؟
كويس فكرتنى يا حبيبى، دقايق وارجعلك
رايحة تستلفيلنا ملعقتين سكر وملعقة بن؟
لا رايحة اسخنلك السلطة يا حبيبى!
يا رب خلصنى من الولية دى!
على فكرة يا محمود الراجل اللى جنبنا جاب فرخة صاحية لمراته يا حبيبى!
بتفكرى فى إيه يعنى؟!
تحب اسرقهالك يا حودة؟!
على آخر الزمن عايزة تأكلينا حرام، طب منظرنا إيه الصبح لما الجيران يكتشفوا ان فرختهم اللى هى فرحة عمرهم ضاعت ويطلعوا كلهم يدوروا عليها؟!
ماحنا هنطلع ندور معاهم، خليك حويط يا حودة!
يعنى قصدك نقتل القتيل ونمشى فى جنازته؟!
باموت فيك وانت نبيه كده يا محموووود!
روحى يا شيخة الهى تموتى فعلا، بس مش فيا!!