جوازة فى المشمش!

يوميات الأخبار

العلاقات الصح علاقات واضحة وحطى تحت كلمة واضحة مليون خط.. خطوطها العريضة واضحة زى الشمس
سارة أنا بحب راجل متجوز.. وهو فعلًا مش مرتاح مع مراته بس المشكلة انه وعدنى مليون مرة انه هيطلقها ونتجوز بس ده محصلش..
وكل مرة يطلع بحجة شكل.. مرة انها تعبانة و مرة عشان امتحانات الولاد و مرة انه مضغوط فى شغله فا مش ناقص ضغط أكتر و لازم أصبر عليه لأن القرار مش سهل...
بس دلوقتى بقى فى شوية تجاوزات وأنا وقفتها بس خايفة أستمر فى علاقة تخسرّنى نفسى و خايفة من ربنا..
أنا عندى 28 سنة وهو عنده 45 سنة ومخلّف منها 3 عيال..
انا بحبه جداً وحاولت كتير أبعد بس لما اتأكدت منه انه هيطلق مراته ومش عايز يكمل معاها بدأت أقرّب منه وخصوصاً بعد ما وعدنى بالجواز العلني .. هو قعد يزن عليا شهور لحد ما صدقته .. مش أنا اللى أخدت الخطوة الأولى وده اللى جارحنى لأنى حساه دلوقتى بيتهرّب منى وبيصدّنى علطول بعد ما كان دايماً معايا و بيكلمنى !
المشكلة ان عدد العرسان اللى بقوا بيتقدمولى قلّ وآخر عريس جالى من اسبوعين وأهلى شايفينه مناسب جدًا و هو الحق يتقال كويس بس أنا مش حاسة ناحيته بحاجة و قافلة منه لأن تفكيرى مع الشخص اللى بحبه.
وطبعًا لو صارحت أهلى ان فى شخص تانى متجوز، مش هيفهمونى أبدًا و استحالة هيوافقوا عليه بالوضع ده وهيشوفوا ان أنا اللى خربت البيت و دى مش الحقيقة، وخايفة كمان ان بابا ممكن يجراله حاجة بسببي... ساعدينى أرجوكى انا بحبه أوى و مقدرش أتخيل حياتى من غيره..
أولًا بعد استئذان صاحبة السؤال بمشاركة الرد فى اليوميات أحب اسأل كل بنت لسه متجوزتش ومحتارة زى صاحبة السؤال ليه تقبلى بظروف زى دي؟
ليه ضاقت بيكى الدنيا انك تربطى قلبك بشخص متجوز؟
ليه تسمحى لنفسك تخربى بيت تانى و حياة تانية ممكن جدًا تكون مستقرة و انتِ اللى بيتضحك عليكى وبيتلعب بيكى عشان تقبلى تكونى مجرد علاقة فى الخفاء أو توافقى بعد ضغطه على الجواز فى السر ؟؟
ليه ترضى انك تتحطى فى خانة الاحتياطى وكل يوم عايشة قلقانة وخايفة فى علاقة المفروض انها لو كانت سوية و سليمة كانت هتطمّنك مش هتخّوفك؟
وهتسعدك مش هتشيلك الهم؟!
يا بنات الدنيا مضاقتش..
ما تسيبوش براح الكون وتتشدّوا لراجل متجوز مهما حاول بيقرّب منك.. صُديه..
العالم مليان شباب لسه متجوزش، مليان أرامل، مليان مُطلقين.. لو من الأول اتعاملنا باللى أمرنا بيه الدين مكناش هنوصل لعلاقات مش فاهمين فيها راسنا من رجلينا...
لو من الأول احترمنا الحدود فى العلاقات بين الراجل والست مكناش هنشوف كمية المشاكل اللى بتخرب البيوت بسبب ما نطلق عليهم « زمايل فى الشغل» !!
العلاقات الصح علاقات واضحة وحطى تحت كلمة واضحة مليون خط.. خطوطها العريضة واضحة زى الشمس.. راجل مُعجب بيكى يخبط باب بيتكم و يتعرف على أهلك ويطلب ايدك وتتخطبوا وتتجوزوا على سنة الله ورسوله.. غير كده عك .. خصوصًا لو متجوز...
انا وصلتنى عشرات الرسائل من بنات بتبكى ومقهورة وكلها بنفس السيناريو... بنت صدّقت و حبّت و عادت أهلها عشان تتجوز واحد متجوز وعدها انه هيطلق مراته و فى الآخر « خلع» ... اختفى من حياتها...فص ملح و داب!
اللى غيّر موبايله و اللى بيرد ببجاحة و يقول ان وعد الجواز ده مطلعش من بؤه و اللى يهزق و يهين و اللى يقفل السكة فى وشها.. كلها سيناريوهات قلة قيمة للبنت و انعدام رجولة من الشخص اللى دخلت معاه العلاقة...
وياما فى رجالة بتتشد لبنات معاهم فى الشغل و يرتبطوا بيهم فى السر عشان ياخدولهم حبة حب و اهتمام و يحسوا انهم لسه مرغوبين و أول ما يلاقوا البنت بدأت تطالب بالجواز اللى اتوعدت بيه بيهربوا و يختفوا من الوجود.. أول ما يحسوا ان بيتهم هيتخرب أو ان زوجاتهم ممكن تشم خبر كل الوعود دى بتتمسح بأستيكة و محدش يقدر يمسك عليهم حاجة.. أنا بحكيلكم اللى بيحصل فى الواقع لأن لسه فى بنات ساذجة بتصدّق نفس الاسطوانة بتاعت أصل مراتى مش مريحاني... أصلى عايش معاها على الورق بس... احنا أصلا نعتبر منفصلين بس متطلقناش عشان خاطر نفسية الولاد و تيجى البنت تكتشف ان علاقته بمراته زى الفل و إنه كان بيسرح بيها مش أكتر....و هى اللى خايبة و صدقته و حبته! و استحالة هيخرب بيته عشانها زى ما ضحك عليها !
ليه بقى انتِ تقبلى بوضع زى ده؟.. انتِ غالية أوى حرام عليكى نفسك!
و لو فعلًا هيطلق مراته بسببك هل هتبقى مرتاحة لما تبنى حياتك الجديدة على تعاسة زوجة مقهورة اتغدر بيها؟
ما هو زى ما باع عشرة عمره و عرف عليها واحدة وحبّها عليها و قعد يتغزل فيها شهور وسنين ما تستبعديش انه يعمل معاكى كده.. وهل هتبقى مآمنة لنوع راجل زى ده؟ أى واحدة تشده؟ أى واحدة بيجرى عليها ؟ أى واحدة ممكن يعرفها شوية و يقلبها و يدخل فى علاقة غيرها؟؟
احنا هنا مش بنتكلم هل الجواز التانى حرام أو حلال لأن رأى الشرع واضح لكن انتِ بنفسك بتقولى انه بيتهرب من جوازكم يبقى اسمها ايه العلاقة دي؟
قادرة تكملى فيها و انتِ حاسة ان ربنا مش راضى عنها ؟
قادرة تواجهى بيها أهلك؟
احساسك ايه و هو واحد كان منمّر على تجاوزات فى العلاقة و لما اعترضتى ، بخ .. خد ديله فى سنانه و هرب؟؟
الإجابة على الأسئلة دى ان مفيش اسم شرعى للعلاقة.. حتى قدام المجتمع دى علاقة فى السر محدش فاهمها و اللى عارفها هيقول كلام مؤذى فى حقك و فى حق اللى رباكى و انتِ أغلى من كده و أهلك ما يستاهلوش منك كده! و لا يستاهلوا انك تحطيهم فى موقف انهم يعرفوا العلاقة دى من بره و يتصدموا فيكي!
هل ربنا راضى عنها ... لأ طبعًا
يبقى بتفكرى فى ايه؟
دى جوازة هتم و هتنجح فى المشمش ده إن تمّت أصلًا..
صونى اللى اتبقى من كرامتك و ما ترخصيش نفسك...
فى بنات من كُتر الضغط باعوا نفسهم لرجالة وعدوا بالجواز و لما البنت بتفقد عذريتها بيفلسعوا و ساعتها الغلط بتشربه البنت لوحدها و الراجل بيبررها بكلمة « نزوة « و ان كل حاجة حصلت برضاها... هو مضربش حد على ايده.. وهى اللى محافظتش على نفسها ؟
هتستنى معاه لحد ايه و امتي؟
أنا مضطرة أفوّقك و أقولك ان الباشا ممكن تكونى بالنسباله مجرد نزوة, واحدة عجبته بس استحالة يآمن يتجوزها !
وأديكى قولتى قدامك شاب كويس و انتِ مش قادرة تديله فرصة بسبب تعلقك بواحد انتِ و لا فارقاله! واحد بيلعب بيكي!
تفتكرى الشاب ده لو حس بحاجة عن العلاقة دى هيقبل بيكى كزوجة ؟
استحالة..
و لو أهلك عرفوا انتِ قولتى ان أبوكى ممكن يجراله حاجة واستحالة يوافقوا.. يبقى ازاى الحال دلوقتى ؟
لو فعلًا الراجل ده صادق و حياته فاشلة وشاريكى كان خبط باب أهلك و شرح ظروفه وحتى لو اترفض كانوا هيحترموه وكنتِ هتحسى انك غالية وحافظتى على كرامتك، مش هو بيتهرّب وانتِ اللى بتطارديه عشان ينفذ وعد هو اللى وعدك بيه !
مبدئى و رأيى انى ما انجرفش فى أى علاقة كلها شوك ومطبّات و وجع قلب.
ليه أدخل فى علاقة مش مضمونة و ممكن أظلم فيها حد وممكن أخرب بيها بيت و أدمر أسرة و أولاد؟
خلاص رجالة العالم خلصت؟؟
فى رجالة فعلًا بتستحيل الحياة بينهم و بين زوجاتهم وبيتطلقوا وكل واحد بيكون ليه الحق يبدأ حياته الجديدة مع شخص جديد بكل وضوح و صراحة و أمانة...
علاقة على مية بيضا، مفيهاش لف ولا دوران ولا مسلسلات بتتألف عشان أماطل فى علاقة عجبانى بس مش هكمل فيها..
ممكن كلامى يوجعك بس الأحسن انك تفوقى دلوقتى قبل ما تغرسى فى العلاقة دى أكتر أو تسلبك العلاقة دى احترامك لذاتك و كرامتك! .. اقطعى العلاقة دى وخدى انتِ الخطوة ما تستنيش لما هو اللى يتهرّب منك.. وانهى العلاقة دى بوضوح معاه.. انا مش عايزة أعرفك تاني.. ومش هسمع منك تانى و مش هقلّ من نفسى تاني.. وارجوكى لو رجع يتقرّب منك أو يوعدك بجواز أو عمل أى حاجة اقفلى الصفحة دى و كملى حياتك.. كلنا بنغلط و بنتعلم بس الغلط الأكبر اننا نكمل فى الغلط.. انتِ تستاهلى علاقة مريحة و واضحة.. شاب يستاهلك و يقدّرك و يعززك..
يخبط بابك و يطلبك من أهلك و كل أمنيته انك توافقى مش واحد بتجرى وراه و بتقنعيه يتجوزك!
علاقة تسندك و تطمّنك و تحميكي..
علاقة فى النور .. واحد بيتباهى بيكى و انتِ فخورة بيه...
علاقة ما ظلمتيش فيها حد و لا ظلمتى نفسك. ..
علاقة محدش بسببها دعا عليكى وسمّاكى بسببها «خطافة الرجالة وخرّابة البيوت» ....
انتِ غالية أوي... اوعى تقبلى بأى وضع انت فيه مش غالية ولا مرفوعة الراس...
ربنا معاكى ويخلف عليكى وينور بصيرتك و يرزقك باللى يعوضك و يحبك و يصونك بجد..