شيماء مصطفى تكتب: تأثير قرار «الفيدرالي الأمريكي» على مصر

كلمتين بس.. عشان الهري اللي شغال من ساعة قرار الفيدرالي الأمريكي برفع سعر الفائدة 0.5% وكأنه حدث جلل وخارج التوقعات رغم إن الفيدرالي نفسه لمح أكثر من مرة من فترة طويلة أنه هيرفع سعر الفائدة أكثر من مرة على مدار 2022 عشان يكبح جماح التضخم اللي وصل لأعلى مستوياته منذ 40 عاما.. تلاقي ناس عمالة تقول الدولار هيولع وهيوصل 25 جنيه و30 جنيه وناس تانية تقولك البنك المركزي المصري هيعمل اجتماع استثنائي بكرة في الإجازة.. سبحان الله.. عشان يلحق.. واللي يقولك الحق 5 دول خليجية زودت سعر الفائدة ودول اوروبية كمان وهما طبعا عشان مش فاهمين ولا حتى عندهم معلومة أن الدول الخليجية عملاتها مربوطة بالدولار فشيء طبيعي جدا أن ترفع سعر الفائدة زى أمريكا.. نيجي بقى لمصر.. مصر وضعها مختلف احنا عملتنا مش مربوطة بالدولار فقط مربوطة بسلة عملات بجانب الذهب ده غير أن معدلات التضخم عندنا مازالت في حدود المستهدف اللي وضعه البنك المركزي المصري، وعندنا قيادات ومستشارين وخبراء على أعلى درجة من العلم والكفاءة والخبرة والمعرفة شغالين خلية نحل في البنك المركزي ومتابعين لكل اللي بيحصل في الأسواق عالميا ومحليا وبيدرسوا أى قرارات قبل ما يقروها فمتقلقوش ولكم في اللي حصل من احتواء لأزمة كورونا في مصر مع القرارات والإجراءات الاستباقية اللي خدتها الدولة والحكومة والبنك المركزي المصري خير دليل.. وارد طبعا أن البنك المركزي يرفع سعر الفائدة او ميرفعهاش وارد جدا أن سعر الدولار يزيد تاني احنا في أزمة عالمية على فكرة.. بس الأكيد انه مش هيحصل قفزات كبيرة في سعره زى اللي حصل مع صدمة رفع المركزي المصري لأسعار الفائدة في 21 مارس.
مش كل اللي بيتكتب يتصدق ولا كل اللي بيكتب فاهم وعنده معلومة وقدرة على التحليل، وفيه من اللي كاتبين عن الموضوع ونازلين هرى وبكاء وولولة ورؤية سوداوية منهم أما ناس لم تحقق شيء في حياتها ونفسها تشوف الدنيا وحشة وفيه بعضهم إخوان نفسهم ينتقموا من البلد، بجانب بعض الراغبين في المناصب، بالإضافة إلي بعض الحاسدين من الأشخاص وبعض المنتفعين ممن يريدون الحفاظ علي مكاسبهم، بجانب بعض المنحرفين الدين استبعدوا من مناصبهم، بالإضافة لدول كثير تشعر بالغيرة من مصر خاصة أن مصر رغم كل الظروف اللي مرت بيها خلال ال11 سنة اللي فاتوا الا انها مازالت صامدة واقتصادها قوي وبتحقق معدلات نمو كمان ومعندناش الحمد لله نقص في السلع الاستراتيجية والغذائية.
مصر محروسة وميتخافش عليها ومتقلقوش من كل اللي بيحصل في العالم ولكن الحذر والحرص واجب على كل مصري.