فرفش كده.. القوات تتقدم!

أحمد مصطفى شعبان
هو النهاردة مادة إيه؟ تاريخ.. عربى يعنى.. لا ده تاريخ عالمى والدنيا مقلوبة ومجلس الأمن مجتمع والأمم المتحدة.. ليه كده؟..
فى حرب عالمية ثالثة هتقوم عشان روسيا هتغزو أوكرانيا.. بجد، والأوكرانيين هيعملوا ايه؟..
مرعوبين طبعاً وبيستعدوا للحرب وفى جيش من المدنيين يضم ممرضات ومحامين وحتى قساوسة حاملين السلاح وبيدربوا على بعد 40 كيلو من الحدود على روسيا ده غير اللافتات اللى فى الشوارع بتدعوا السكان للانضمام لكتائب الجيش الأوكرانى.. دى أجواء حرب فعلاً.. بس خلينى أقولك إن دى حرب نفسية والحقيقة الروس بيديروها بامتياز.
مش فاهم! إزاى بيدربوا السكان و»خلى السلاح صاحي» وتقولى حرب نفسية؟. روسيا لو عايزة تغزو أوكرانيا الموضوع بالنسبة ليها مش صعب خاصة إن موسكو محاصرة الجمهورية السوفيتية السابقة من 3 جهات عبر نشر 130 ألف جندى بمعداتهم مستنيين الرئيس الروسى يقولهم «القوات تتقدم».
يعنى روسيا مطوقة أوكرانيا بالجيش ده كله وتقولى مش هتحتلها؟..
أيوة لأن موسكو ملهاش أى مكاسب سياسية من هذا التحرك وكمان هيتفرض عليها عقوبات أكبر من أمريكا والغرب وده هيزود الضغوط الاقتصادية، «ده اقتراحى فى القضية يعني».
كل اللى روسيا عايزاه عدم تمدد قوات حلف شمال الأطلنطى «الناتو» بزعامة واشنطن، شرقًا وإغلاق ملف انضمام أوكرانيا للحلف. حتى إن بوتين نفسه قال «نرى البنى التحتية للناتو قرب بيتنا».
فالراجل عايز ضمانات أمنية أن الناتو مش هيتوسع باتجاه الحدود الروسية وطول ما هو مش محقق ده هتفضل الحرب النفسية دى شغالة.
وروسيا كل يومين تحرك معدات وقوات تجاه حدود أوكرانيا وشوية تسحب جزء وشوية تعمل مناورات عسكرية فى بيلاروسيا المجاورة والبحر الأسود.
وكل ما موسكو تعمل حاجة، تطلع أمريكا تقول الحقوا خلاص روسيا هتغزو أوكرانيا.
فترد روسيا إنها مش هتعمل حاجة «كبرتوا الموضوع ياشباب»...
حتى الأوكرانيين اللى بيستعدوا للحرب بسبب حالة الذعر اللى أمريكا أكبر سبب فيها، بيقولوا أن روسيا لن تشن هجومًا وشيكًا، آه فى قوات على الحدود بس مش مستعدة للتحرك العسكرى وأن الوضع تحت السيطرة.
الرئيس الأوكرانى نفسه منزعج من التحذيرات المتكررة من واشنطن وقال بالنص «أفضل صديق لأعدائنا، هو الذعر فى بلدنا».
مبقتش فاهم حاجة؟ فى حرب ولا مفيش؟..
أنا بقولك مفيش لأنه لو فى حرب جديدة فى أوروبا هتأثر على العالم كله حتى علينا..
يا عم احنا فين وأوكرانيا فين؟..
لا دى حرب عالمية بقولك «هنموت كلنا»..
متخافش ربنا هيسترها ومفيش حاجة هتحصل يلا قوم فرفش كده وجهز خوذتك.
إقرأ أيضاً|فرفش كدة.. وصفة الهروب