مصورة فيديو «متحرش الأتوبيس» تكشف تفاصيل الواقعة

قالت دعاء أحمد، مصورة فيديو التحرش بأتوبيس الدقي، إنها لاحظت الواقعة في البداية من نظرات المتحرش لطفلة صغيرة كانت تحملها والدتها.
وأضافت: "صورته الأول وبعدين اتكلمت عشان مينكرش، والناس كانت سلبية، اللي يقولي استري عليه واللي يقولي معلش، أنا مش فاهمة الناس مالها".
وتابعت: "الناس كلها كانت ساكتة، محدش اتحرك، ولما قولت لهم انتوا مفيكوش رجالة، الراجل اللي جنبي قام ومسكه من قفاه، بس لما لقي نفسه لوحده، سكت ومحصلش حاجة".
وأردفت: "لما نزل الناس قالت لي استري عليه وامسحي الفيديو، ما عدا بنت وراجل قالوا لي افضحيه وانشري الفيديو".
واستطردت حديثها قائلة: "رد فعل الناس كان صادم بالنسبالي أكتر من اللي عمله المتحرش، وصورته عشان آخد حقي، وعشان في الفترة الأخيرة كانت ديه الطريقة المثالية، وأنا صورته والناس بتغلطني وتقولي استري عليه، أومال لو مصورتش؟".
وطالبت بضرورة ضبطه وإحضاره، قائلةً: "لو أنا مقدرتش أخد بطاقته، نفسي يتمسك، عشان مايعملش قدام أي بنت كدة تاني".
كما قالت: "زوجي شجعني وكان هيعمل محضر، بس قالوا له لازم تعرف هو مين، ولو عرفت هو مين أكيد هاعمل محضر".
كانت جهات التحقيق قد بدأت أمس البحث عن المتهم بالتحرش بفتاة من قبل شاب في أحد الأتوبيسات في الجيزة، وطالبت بسرعة التحريات حول الواقعة وضبط المتهم.
وكان مستخدمو مواقع التواصل الاجتماعي "فيس بوك"، قد تداولوا مقطع فيديو لفتاة توثق لحظة التحرش بها من قبل شاب داخل أحد أتوبيسات خط الدقي الجيزة الساعة 11 صباحًا.
وظهر بالفيديو أن الشاب يقوم ب«فعل خادش للحياء» وهو جالس بجوار الفتاة، حيث قامت الفتاة بتصويره وتوثيق التحرش بها، واستنجدت بالركاب بصوت عالي وقام الركاب بالتعدي على الشاب، الذي فر هاربا.