المذاكرة وعمايلها

يا ماما دى منى جايبة التورتة وجاية عشان نعملك العيد ميلاد!!! والتورتة بكام بقي؟؟

تكتبها اليوم :د. سارة الذهبى [email protected]
هتذاكرى لولادك..
و ماله..
الجرأة حلوة مفيش كلام
لا هو عيب..و لا حرام...
الموضوع مش أزمة خالص..
بصى يا ستى دى تعليمات بسيطة للمذاكرة.
افتكرى إن ده ابنك..ضناكي...حتة منك..متخليش حاجة تافهة تخسّركوا بعض..مش ده يوسف حبيبك ابنك البكرى اللى استمنتيه من الدنيا ولبستيله لبس حمل من الشهر التانى وزهّقتى بيه كل اللى حوليكي...
هوا والا مش هوااا؟؟ اعترفى...
مش ده اللى كنتى بتقولى امتى يكبر بقى وكنتى بتعِدى الأيام عشان تخلصى من الرضاعة والبامبرز...
اهو يويو كبر بسم الله ماشاء الله وبقى أهم مسببات الجلطة بالنسبالك... وأديكى بتقولى فى سرك ولا يوم من أيام القشط يا يويو يا حبيبي.. البسى بقي...
حاولى تختارى الوقت المناسب..لأنه بعد ما بيرجع من المدرسة بيكون تعبان وبعد ما بيتغدى بيتقل وبعد ما بينام الضهر بيقوم وخمان..و بعد ما بيستحمى بيعوز يريح..و بعد ما بيتفرّج على التلفزيون بيهيّبر وبيفقد تركيزه فاختارى وقت غير دول!!!! هيبقى مصحصح ومفوق معاكى بس انتِ قولى يارب..
خرّجى أى أطفال من أوضة المذاكرة عشان فجأة هيحب أخته اللى كان لسه مديها شلوت وملبسها فى الحيطة... وهيكتشف فجأة ان عنده أخ أصغر منه وهيتفاجئ أكتر ان اسمه على وانه عايش معاكوا بقاله 3 سنين... سبحان الله !!!!
خلى قُلة مياه جنبك أو زير أو كولدير... اللى تلاقيه عندك..لأنه هيعطش 50 مرة...
بس حاسبى تتهوري..بلاش قُلة لحسن الشيطان شاطر والانسان ضعيييييف..
خلى جنبكوا عِجل..ادبحوا تيس...حمرّيله ديك رومي... هاتيله الشيف بوراك يعمله الغدا عشان هيجوع منك 100 مرة...مرة تديله فخدة العجل..مرة ورك الديك...عشان تخلصى من زنه..
ذاكرى فى أوضة جنب التواليت عشان هيتزنق منك كل خمس دقايق.. وممكن يجيله جفاف فخلى معاكى محلول احتياطي.. − شيلى أى حاجة من قدامه حتى برى الاقلام عشان هيلعب بيه ويعمله چيبة لاخته...خلى المكتب أقرع خالص...
متضيعيش شقى عمرك على الاستيكرز....هيزهق منها بعد يومين وهيلزقهملك فى قفا اخواته...
قولى المعلومة ما لا يقل عن مليون مرة..و النبى ما هيجرى حاجة..قوليها بصدر رحب وانتى مفرفشة كده بدل ما تخسروا بعض على مادة ما تستاهلش أصلاً..
استحضرى فرفشة الفنانة فيفى عبده فى فيديوهاتها بتاعة 5 امووووواه..5 هوانيوووووو... هتفرق معاكى اوي...
جو التحفيز بالشيكولاتة والكاندى ده بقى فاكس أوي...شجعيه وقوليله لو خلصنا الهوم ورك هنحرق الكتاب يا حبيبي..هيبقى فورييرة!!
ما تسأليهوش انت بطل؟؟ هااا البطل بيعمل الواجب؟؟؟ عشان هيقولك الأبطال على المذاكرة..على......، ما تعصبوهمش بقى احنا ملصمينهم بالعافية ما تتوقعيش انه هيتحول سوبر مان ويخلص قلمين رصاص من الحرت بعد البؤ ده..
اقفلوا التلفزيون فى البيت كله وما تخليش حد يتكلم عشان هو راشق ودنه فى أى حوار...اكتموا نفَسكوا كمان لمزيد من الهدوء.. − وهو بيذاكر هيفتكر يحكيلك ان آسر صاحبه قرصه انهارده وان مازن أكل قطمة من سندوتش عمر وان التيتشر عطست مرتين...لأ..عطست 3 مرات عشان الدقة...على قلبك مراوحك الظريفة وقوليله لما نخلص هنرغى زى ما انت عايز...
الاسئلة بتاعة الفلاسفة زى ليه الكورة مدورة وليه مش بناكل التراب ومش بنتغدى ورق شجر...كل ده هيهل عليكى وانتوا بتذاكروا...طنشى خاااااااالص وافتكرى انه ضناكى واتوحمتى فيه على تين شوكي!!
خلى دايماً وقت المذاكرة فى ملوخية ورز احتياطي... معرفش بتطلب معاهم ليه ملوخية ورز فى أوقات عجيبة..
اوعى تقوليله ان التيتشر قالت حاجة غلط...كله الا كلام التيتشر...لو قالت وردة يعنى apple.. تبقى apple... بيقتنعوا بكلامهم بشكل غير طبيعى لأ وبيعدلوا عليكى، يعنى حضرتك بدكتوراتك مش عارفة تقنعى ابنك اللى قد البلية ده ولازم هيقنعك ان وردة يعنى apple!!!!!
التيتشر دى خط احمر يا أمي... وقدامك حل من اتنين يا تكّبرى دماغك يا هتتشلي.. اختارى انتِ بقي..
ما تستغربيش من جو الحنان المفاجئ المفرط والمشاعر الجياشة اللى بتهب فجأة دي..و انتوا بتحلوا الواجب يقوم يبوس ايدك ويقولك عايز أروح أحضن بابا وأحِب على رجل أختي...كل ده متوقع..
الحب ولع فى الدرة..
لو قالك ضهرى قافش عليا... الحبل الشوكى لافف عليا وكعبلني..الترقوة اتكسرت..الفقرة الرابعة بتنقح عليا..ودن من طين وودن من عجين بقي..و لا تتهزي....
حاولى تنجزى عشان ابنك مش ثانوية عامة..و عشان مرارتك وصحتك وعشان المشوار لسه طويل.. لو جالك شلل رباعى من دلوقتى مين هيكمل معاه المسيرة يا غالية..و لسه فى بليتين غيره داخلين على تعليم وممكن يكون هو أشطرهم....ازاى الحال بقي؟؟ − لو لقيتى اى اعراض غريبة عندك...زغللة...هذيان...تهتهة...بتعرجي...ظهور ميول انتحارية...روحى للدكتور علطول..انتى ملكيش صاحب واللا ايه؟؟ انتى روح بردك
الحموات الفاتنات
ماما ازيك يا حبيبتي، وحشاني، بصى جبتلك ايه يا ست الحبايب
ممممممم حلو بس يعنى مكنتش عارف تجيب حاجة قماشتها أحسن من ده شوية...الصراحة شكله يقلب البطن !!
ليه بس كده يا ماما، عامة المرة الجاية بقى ان شاء الله هجيبلك قماشة أحلي... = ده فرز تاني؟؟ جايبة بالجملة صح؟؟
لأ طبعاً يا ماما.. اومال شكله عامل كده ليه؟؟ داهية يكون غالي!! ده انا بجيب العباية دى من العتبة بسبعين جنيه ولو قرصت فى الفصال هاخدها بخمسين جنيه...
دى مش عباية يا ماما، ده مونتوو من زارا = مانتوو؟؟ أنت خنفان ليه يا حبيبي؟؟ عندك برد... والا تكون عندك كورونا وانت مش واخد بالك وتِعدينى أنا وأبوك واحنا أصلاً بنتلكك عشان نعيا.. اسمه بالطوو.. بالطووووو... انا اتوغوشت عليك والله! وبعدين هى فين ست الحُسن والجمال.. عارفة انك اشتباه كورونا والا بترغى فى الموبايل مع صحباتها وتُقطم وسطك فى دفع الفواتير واللا تلاقيها قاعدة تتفرج على نتفليكس وبتلضم المسلسلات فى بعض ما هى فاضية وقادرة!!
فكرت الست هانم تعملك شوربة تدّفى بيها صدرك والا تسلقلك فرخة والا مبناخدش منها حاجة الا وجع القلب والطلبات اللى ما بتخلصش؟؟؟
ايه يا ماما كل ده! ارحميها شوية هى عملتلك ايه بس لده كله!! وبعدين بتفّولى عليا ليه ان شاء الله متكونش كورونا ولا حاجة... المهم بقى نرجع لموضوعنا؛ عجبك المونتوو يا ماما؟؟
قماشته مش قد كده، تحسه خيش كده وريحته كارفة على فروة خرفان...هو غالى البتاع ده؟؟ − تعيشى وتدوبى يا ست الحبايب...عنيا ليكي..
ادوّب ايه ده جايلى دايب خلقه!! انتوا هتبلونى بالحاجة! ياريتك كنت جبتلى بداله اسدال من التوحيد والنور أو بيجامة قطيفة كنت هفاصل واجبهالك ب 90 جنيه..
بس الصراحة لون البتاع ده يقرف متزعلش مني... مكانش فى لون أوحش من كده قدامك؟؟ ومقولتليش هو غالي؟؟؟
خلاص هجبلك اللى انتى عايزاه يا أمى..انا كل فلوسى تحت امرك..
فلووووس؟!! حوووش يا واد!!! ده انت تلاقيك جبتلى بعد ما جبت للبومة بتاعتك شئ وشويات...اوعى يا حيلة تكون بتفرتك كل تحويشة عمرك على هدوم وجزم للمحروسة!!!
انا سألتك السؤال ده فوق ال 100 مرة بقولك هوا البانطووو ده غالي؟؟؟ ياريتك كنت ادتنى 150 جنيه فى ايدى بدال ما اشحّته واللا أديه للبت عايدة اللى بتنضفلى الشقة...هوا غالى يا واد ما تريح قلبي؟؟؟ انا عندى القلب ومش حِمل المناهدة دى كلها! − ميغلاش عليكى يا أمى...
اخلص بس ما انت طول عمرك خيبة وموكوس وبيتضحك عليك عشان كده منى بنت انشراح لفّت عليك وطوِتك تحت جناحها...ده انت غلبان غُلب....قولى البتاع ده بكام بقى بدل ما أرميهولك من الشباك.. − ب 1800 جنيه يا ماما
يانهار مش فايت!!!!!! انت حنيت لعُلق زمان يا ياسر واللا ايه؟؟؟؟ لا انت ابنى ولا اعرفك الا لما ترّجع البتاع ده وتاخد فلوسك على داير مليم وتوريهملى كمان.. − ليه يا ماما بس؟؟؟
متخلنيش اجيب الشبشب وأناولك بيه....انت مكبرتش عليا... − طيب متعصبيش نفسك...بكرة هرّجعه...
الشىء ده مش هيبات فى بيتى لحظة!!! قوم رجّعه يا فالح !!! منها لله منى تلاقى كل لبسها من ظاظا ده!!! قوم فِز خد البتاع ده واحترم نفسك وروّح عشان عفاريت الدنيا بتتنطط قدامي و قولى صحيح المانطوو ده ذوق مين؟
منى مختاراهولك بنفسها والله = باااااااين يا حبيبي، كنت متأكدة والله بس قعدت أكدّب نفسي، عشان مفيش أوحش من كدة الحقيقة!!! قوم الحق روّحلها يا خويا بدل ما هى اللى ممشياك وكلمة منها توّديك وتجيبك... − يا ماما السنة اللى فاتت لما جبتلك بيچاما رمتيها فى وشى وقولتيلى ده مقامى يا...... واللا نسيتي؟ قولتيلى هاتلى لبس بألوفات، نسيتى دى كمان؟؟ = اه نسيت يا خويا...تعالى حاسبنى بقي...روح للغندورة بقى واشكرها على مجايبها..
يا ماما دى منى جايبة التورتة وجاية عشان نعملك العيد ميلاد!!! والتورتة بكام بقي؟؟
يا ماما انتِ شاغلة نفسك بتَمَن الحاجة ليه، تعيشى ونجيبلك يا ست الكل.. = والله العظيم لأنت قايل.. − 300 جنيه = اييييييييييييه!! 300 عفريت لما ينططوكى يا منى يا حرامية!!!! دى بتستهبلك يا واد....تلاقيها ب 100 جنيه وضاربة الباقى فى جيبها.....قوم يا واد من وشى وخد التورتة والمانطوس دول بدال ما أطين عيشتك انت ومنى وبكرة تجبلى بيچاما من التوحيد والنور موهير بترتر وكيلو بسكوت بعجوة من فرن الملكة اللى على أول الناصية...سامع؟؟؟؟؟
الله يخرب بيتك وبيت سنينك يا مني... الله يخرب بيتك..
بوظتيلى عيد ميلادى يا بنت انشراح منك لله...منك لله...
أقول فيكى ايه وانتِ فيكى كل العِبر!!