طلبات المدرسة وسنينها!

يوميات الأخبار

سارة الذهبى
بصى هما مش كاتبين عايزين اد ايه يا دعاء فا هنجيب 20 متر يادوب كده... نبقى جبنا بزيادة واللى يتبقى نفصّل بيه فساتين!!
- ماماااااا.... يا ماماااااا انا جبت ورق السابلاى ليست.
= ياختى على الحلو الصغنن اللى رايح المدرسة... روح ارميها لبابا فى حجره واجرى... ما تقفش قدامه.. اسمع مني..
- بابااااااااا انا جبت ورق السبلايز من المدرسة..
ورقة ايه يا ضنايا؟؟ ده استدعاء ولى أمر؟! انت اترفدت من أولها يخرب عقلك!!!
- السبلااااااايز... يا بابااااا... اترفدت ايه بس!!
يعنى ايه يا ضنايا وغلاوتك مش فاهم.
= يعنى ورقة طلبات المدرسة يا محمد..
هى بقى اسمها صبلايزز!!! الله يرحم أبوك وأمك كانوا بياكلوا الأستيكة أم ريحة... ورينى كده المدرسة عايزة مننا ايه!
- عايز اول ورقة والا التانية والا التالتة؟
3 ورقات!! هما كاتبين الطلبات على ورق النتيجة الصغنن والا ايه... حد يضحك عليا ويقولى انهم مش كاتبين الصبلايز فى ورق فلوسكاب!!
- اه يا بابا.. فلوسكاب فعلاً.
ياخررررراشى دول فلوسكاااااب بحق وحقيق!!!! يا مُرّك يا محمد!!!!
هات كل الورق ده شكلوا يوم كاروهات....
عايزين ايه من الدير ريسبكتد نيلة بيرنتس؟؟ كليتهم؟؟؟ طحالهم؟؟؟ اؤمروا؟؟؟ والله ما هنستخسر فيكم حاجة..
سيبونى بقى اقرا بتركيز..
بلاستيك بوكس «39* 39 سم» ده ايه التباتة دي؟؟؟!!!
بلاستيك إبرون؟؟؟
علي.. علي... بص اجرى اسأل ماما يعنى ايه إبرون بس اعمل كإنك انت اللى مش عارفها.. اوعى تقولها بابا بيسألك سامع يا علولة يا حبيبى؟؟
- انا عارف معناها يا بابا.. يعنى مريلة.
مريلة ايه هو انت بنت عشان تلبس مريلة.. وفالح بس تقولى انا الإنجليزى بتاعى محصلش! قال مريلة قال!! روح اسأل ماما كإنك انت اللى مش عارف معناها..
- مامااااااا بابا بيقولك يعنى ايه إبرون مش عارفها؟؟ وعمره ما سمعها..
بعتنى بكام يا عشرى! قصدى يا علي..
= إبرون يعنى مريلة بتتلبس لما يلونوا أو يدهنوا أى حاجة.
تعال يا زفت انت مش عارف إبرون يعنى ايه؟!!! آدى آخرت المدارس الانترناشونال اللى بندفع فيها دم قلبنا!!!!
خلينا نكمل العريضة اللى مبعوتة دى...
عايزين 3 علب كمامات من كل طالب و2 لتر كحول متجاب فريش من معامل كلية صيدلة القاهرة و4 علب جوانتيات! على هو انت عندك مادة تشريح السنة دي!! بقى دى طلبات لطفل عنده 6 سنين!! وبعدين اشمعنى صيدلة القاهرة! ماله كحول صيدلة عين شمس والا هى أى مشاوير وخلاص! ورينى باقى الطلبات.
سبورة بيضا صغيرة «لييييييه هو احنا اللى هنشترى السبابير كمان ما ناقص نشترى الطباشير!!!!».
- طباشير ايه يا بابا دى وايت بورد!!!!
سورى يا خويا... نسيت...
وعايزين 5 أقلام للوايت بورد.... اومال هما اللى هيشتروهم... ده حتى ميصحش!!!!
عايزين كمان 10 فايلات «5 زُرق و5 بينك»... بس بسوستة.. ده ايه الذل ده!!!!
وعايزين ألوان خشب تخينة وألوان خشب رفيعة وألوان مياه وألوان جواش «لييييييييه هما فاكرينك ليوناردو دافينشى» مش عايزين نشترى بوية من جوتن بالمرة!!!!
وإيه الكلمة دى كمان؟؟ crayons!!
- آه يا بابا دى ألوان شمع.
طب ما يقولوا ألوان شمع.. لزمتها ايه الخايلة الكدابة دي!
اصبر عشان أكمّل عايزين 3 علب صلصال play dough!!! هو حتى اللعب واللغوصة احنا اللى هندفعها!!!!
وخد عندك 5 بينسيل شاربنر «ما يقولوا 5 برّايات» هى الناس دى مالها متأنعرة علينا ليه يا دعاء؟!!! انتى مزعلاهم فى حاجة؟؟
و5 أساتيك ومقصين و5 اسكتشات رسم وعلبة اقلام رصاص ماركة faber Castell!!!! ده انا مجبتهمش الا فى اعدادى هندسة!!! المدرسة عايزانى اجبها للمفعوص ده! بس واضح ان المدرسة بتحب رقم 5..
و3 باكيتات مناديل عادية و3 باكيتات ديتول «دى باكيته الديتول بالشىء الفلانى حرام عليكو.... يعنى حبة المناديل دى دخلالها فى 300 جنيه»!!
استنوا بقى واسمعوا دى بقي... محتاجين معجون سنان وفرشاة سنان وفرشاة شعر وملابس زيادة...
يا دعاء نسيوا يكتبوا شبشب وبيچاما ما تنسيش تبعتيهم مع على أول يوم عشان شكلها مدرسة داخلي... اصل استحالة دى هتكون طلبات مدرسة عادية... هتوحشنى يا على والله..
ومحتاجين فُرش ألوان تخينة وفوم بجليتر وفوم من غير جليتر..
- علبة tounge suppressors يا دعاااااء هما عايزين خافض للسان ليه!! هما العيال كلهم جوا عندهم اللوز يا دعاء؟؟؟ احنا كمان هنصرفلهم على الدكتورة بتاعتهم؟!!!! شوفيلنا الموضوع ده لحسن يبقى فى فلوس كشف واحنا منعرفش بس قوليلهم يعملولنا تخفيض عشان معايا كارنيه نقابة المهندسين!!!!!
وعايزين معقم لليدين «ديتول» نهار مش معدى.. مش لسه جايبين وايبس ب300 جنيه فوق!!!!
- 20 ورقة بيضا «A4»
- 40 ورقة ملونة «A4» وجلاد شفاف... بصى هما مش كاتبين عايزين اد ايه يا دعاء فا هنجيب 20 متر يادوب كده... نبقى جبنا بزيادة واللى يتبقى نفصّل بيه فساتين!!
وزودى على الطلبات 3 شنط بسوستة؟!!! ليه وعشان ايه طيب؟!!
بس استنى كده لحسن طالبين كونستركشن سكيتش!!!!
دعاء انا آخر طلبين مش فاهمهم بس شكلهم خلاص هيدخلوا الواد هندسة... شكلهم قرروا خلاص فا اسأليهم بس القاهرة والا عين شمس عشان مبقاش زى الأطرش فى الزفة بس مش أكتر...
دعاااااااااء دعاااااااااااء... تعالى لو سمحتي.
بصى انا قدامى حاجة من اتنين يا ادفع فلوس المدرسة يا فلوس الصبلايز دي... يا اما نطلعه من المدرسة دى خالص وافتحله بالفلوس دى مكتبة كده قد سمير وعلى وهناكل من وراها الشهد....
فين أيام الكشكول الصفحة وصفحة والكراسة التسع تسطر ودمتم!!!
دعاء بقولك شوفى كده وردّى عليا وياريت البطاطس اللى بتحمريها دى تفرديها على ورق الصبلايز بدل ورق المناديل اهو يبقى استفدنا منه بحاجة.....
وابقى كلمى المدرسة اسأليهم عايزين كليتى واللا مسامحين فيها... لحسن الناس دى ما بتعتقش!!
مش «جوز الست»
مرة كنت قاعدة بتناقش مع ستات فى موضوع ما لقيت واحدة بتقول «أصل مراته ممشياه».
اتعصبت جداً من الجملة دى فمقدرتش اسمعها وأعدّيها عادى...
حبيت افهم مراته ممشياه ازاى يعني؟؟
الرد كان «أصله بياخد رأيها فى كل حاجة ولو مش راضية عن حاجة بيقعد ياخد ويدّى معاها ويتناقشوا لحد ما يوصلوا لحاجة تريحهم هما الاتنين مع ان المفروض ان الراجل هو اللى يقرر!! مش هو الراجل برضه!! مش المفروض الكلمة كلمته والا ايه!!!! رجالة آخر زمن!!
منتهى الاستفزاز لما تلاقى الكلام ده طالع من ست؛ لأنها ست زيها زى اللى بتنتقدها وأكيد تتمنى جوزها يعملها قيمة وياخد رأيها ويتناقش معاها لإنهم فى مركب واحدة، صحيح ان القرار النهائى فى ايد الراجل بس فى غرفة عمليات قبلها بتتعمل بين الراجل ومراته بيوصلوا فيه لحل يرضى كل الأطراف قبل ما يطلعوا بالقرار النهائى اللى بيقوله الراجل.. لإن فى منظومة الجواز الراجل والست بيكمّلوا بعض مش واحد فيهم يكون مسيطر على كل حاجة والتانى بيتفرج وبس أو بينفذ الأوامر وبس..
ساعات الست بتشوف حاجات مبيشوفهاش الراجل عشان طبيعتها اللى بتميل للحب والحنان والعطاء وساعات الراجل بيشوف حاجات متشوفهاش الست عشان طبيعته العملية وقدرته انه يحَكم عقله أكتر من مراته.. لإن ربنا خلق لكل واحد فيهم طبيعة غير التاني..
معرفش ليه مجتمعنا ساعات بيحسسنا ان الستات المفروض تقول حاضر بدون قيد أو شرط!
ملهاش حق تتناقش بأدب!
ملهاش حق تتكلم وتفهم!
ملهاش حق تعَبر عن رأيها..
غلط ان يتعملّها حساب عشان جوزها بيحبها ويهمه راحتها! بيعتبروا ده فى كثير من الأحيان فيه انتقاص لرجولته مع ان دى الرجولة فى أبهى صورها!
الراجل بجد هو اللى تفرق معاه مراته... هو اللى بيعاملها انها فعلاً شريكة حياته، مش شخص هامشى بيعرف القرارات ويطبقها من سكات من غير ما تعبّر عن أحاسيسها ومشاعرها أو يكون ليها رأى!
كفاية ضغط على الرجالة المحترمة واتهامهم بانهم بيتساقوا أو انهم ملهمش كلمة عشان دول أنضف أنواع الرجالة وأكثرهم تربية واحتراماً!
بلاش تطلعوا عُقد النقص اللى عندكم وتجرحوا بيها غيركم لإنكم من جواكم بتتمنوا تلاقوا اللى يعملكم حساب ويهمه مشاعركم بالظبط زى الرجالة والستات اللى بتنهشوا فى سيرتهم دول!
الراجل اللى عامل قيمة لمراته راجل وسيد الرجالة.. بس انتوا اطلعوا منها وبطلوا كلامكم اللى موراهوش الا الخراب ده!!