عرقنا مطر خير

زهقت طهقت وكتير أنا مليت
وساقية تدور تروي لنا الغيط
ياما بالأمل مع صوتها غنيت
ياما مايتها طهرتني واتوضيت
***
ياما من خير أرضنا إتغديت
سكتت مننا الساقية وأنا خسيت
ياما من قطن أرضنا اتكسيت
يوم بعد يوم ياهو أنا اتعريت
***
عيب مفيش مؤونة في البيت
على جوع ولادي حبايبي بكيت
ياناس العمل أمل ياما ناديت
عرقنا على التروس لها زيت
***
ليه الدم يسيل في كل ميدان
ليه أرواح ولادي بقت نسيان
ليه تسمعوا وسوسة الشيطان
أنا زهقت من صوت الغربان
***
تايه و أنا بعيد عن المصنع
اشتقت لنحل العسل لما يلسع
إمتى بقى نقول للخراب ودع
إمتى من خيرك يا مصر أجمع
***
يا ناس اسمعوا للعقل الرشيد
ربنا حذرنا من الخراب بوعيد
يالا نبنى نعلي كل يوم جديد
اشتقت أعيش بالأمن سعيد
***
صوت الاستغاثة جوايا أتخنق
مع حلم حلمته بالنهار أتحرق
صوت الألم هو كمان أتشنق
في بحر من الخوف بنا غرق
***
أنا لسه في قلبي فيكم أمل
دا إحنا خير الأجناد بالعمل
عرقنا مطر خير يمحي الوجل
يجمع مع الفجر كل العسل