رمضان والصيام ..و أزمة المواصلات

يا عم اوعا كدة الجو حر والواحد صايم ومش طايق.....اووووف هي ناقصة واقفة...براحة يا هتخطبنا...الواحد لو مشي كان أرحم...اللهم إني صائم..
نسمع مثل هذه العبارات أثناء ركوب المواصلات والتي يعتبرها الكثيرون أزمة أثناء الصيام، و خصوصا مع حرارة الجو المرتفعة و الازدحام الذي لا ينتهي.
و يحافظ البعض علي هدوئه أثناء الصيام و البعض الآخر قد لا يسيطر على أعصابه و ينفعل وتحدث أحيانا مشاحنات كثيرة في المواصلات لدرجة قد تفقد البعض صيامهم.
و قامت بوابة أخبار اليوم برصد ما يثير غضب الشارع المصري أثناء الصيام، فكانت الآراء كالتالي :
قال "عواد" دايما السواقين بيبقوا عصبيين جدا وهما صايمين لدرجة إنهم ممكن يشتموا بألفاظ صعبة، و الموضوع ده بيعصبني جدا لأني بحس إن صيامي راح من اللي بسمعه، و اللي بيضايقني أكتر إني بحس إنه مش فارق مع السواقين أي حاجة.
و أضاف "محمد" و بردو الرغي الكتير و الواحد بيبقى مصدع ومش مستحمل أصلا، وغير كدة سلوكيات بعض الناس.
أما "عبير" فقالت كله كوم بقى و أزمة الركنة كوم تاني لأن الشوارع كلها بتبقى زحمة وعشان الواحد يشتري حاجة ولا يركن عند شغله ولا أي حاجة بياخد سنة و اللي بيضايقني لما حد يركن مكاني بحس بقلة ذوق.
و قالت "رضوى" الصيام نفسه مع قلة الأكل بيخلي الواحد غصب عنه متعصب و ممكن أعصابه تفلت على أقل حاجة مثلا عياط أطفال، عصبية سواق، الحر، الزحمة كلها حاجات بتعصب.
"أصلا مجنون اللي يركب مواصلات وهو صايم" قالت هذا "شروق" مضيفة : أصلا مأساة إن حد يركب مواصلات وهو صايم في الحر ده، وخصوصا لو مش مجبر وعنده شغل مثلا أو عنده مشوار ضروري، ده الواحد بيبقى عربيته وعلى آخره يركب كمان مواصلات ده يبقى هو اللي جنى على نفسه بقى.
و علقت "ندى" على الموضوع قائلة : صيام وحر و زحمة مواصلات وكمان اخوان أحمدك يااااااااااارب، بصراحة الصبر بيروح من الواحد بسرعة بسبب الأحداث الموجودة في البلد دلوقتي و طبعا بيزيد الموضوع مع الصيام و الحر الفظيع اللي احنا فيه، بس بردو الواحد بيحاول يمسك أعصابه عشان اليوم يعدي على خير.