من قبل قبلُه بشَهَر لمّوا الورق ألوان قصّوا الورق بناطيل جابوا العجينة فْ طبق وحسين عليه الفِتَل ويَّاها لوح مسامير من كل رُزْمِة ورق عملوها عُقد كبير طلعوا سلالم خشب علشان يرصّوا العقود بالطّبع بعد العَصِرْ رقصِت ما بين لِحْطان ******* كمان عيال البلد بيحضّروا الفوانيس أشكال كتيره بشمع بتنوَّر الضّلمة ونبُصْ نِلقي البلد بعد العِشا والعه ساعِتْها تِصْبح عَجَب تقولْش نورها باريس ******* شايف دا عمي الحَسَن بيطبّق السُنَّة صايم من اول رجب صايم تِنين وخميس ******* أمّي دي طول السّنة بتجَمَّع الغلَّة عَمَّال تربّي فْ طيور ما عرَفْشِ ليه لامَّه ع السّطح تِلقى البلح مِتْعدد الألوان والسّمن بلدي فْ عِلب نايمة في حتَّه أمان لمَّا أنا شوفت العَجَب قوم قُلت أسألها وبسرعة ردّت وقالت أُسكت دا ذاد رمضان ******* متولّي جايب طوب ضاربُه في قلب الغيط عَمَّال بيبني فْ دواير من غير ميزان ولا خيط طوب نَيّ مش محروق طينة ما راحش قَمير بعديها حَط الصّواني جرَّب في نفس اليوم أتاريه هَيعمِل كُنافة للنّاس في شهر الصُّوم ******* الخَلْق متجمعة قدَّام شاشات وشاشات المُفتي قاعد وساكت دلوقتي يِعلنْها أهو قام يقول كِلْمِتُه يارب بكره صيام خَطَف القلوب ويَّاه خَدْها يفرَّحْها وفْ لحظه بشّر وقال صوموا دا بان الهلال ******* جِهِز الفطار ياولاد إصبر علينا شوَيّ هَنْحَمَّر اللّحْمات والرُّز لسَّاه نَيّ فاضل دقيقة ونُص دا اتأخّر المدفع أطلع لحَدّ الباب ألقى الأدان أرجع ******* أغرب طقوس رمضان سمُّوها رِفْرَافة عاده وبقالها زمان دي خدوها من لِجْداد قال لازم أول يوم تاكلوا لُحوم ياعباد ******* صابِر فؤاد عمِّنا بيلف آخر الليل ماسك في إيده العصا يِنْقَحْ بها الطّبله تِسمع وِدانّا نقوم ونحضَّر الوجْبة باقي شهور السَّنة بينادي ع الضّايع عنزه قرونها طوال شارده من اصحابها تايهه بقالها يومين حلوانها خمسة جنيه ******* من حِكْمِتُه هوَّه يهدي العُصاه بالصّوم يِدّي الفقير الغني من جيبُه بالميَّات حتّى اللّي ماركعهاش بقى يجري ع الصّلوات