خلعوك فقالوا

دى مش خالعه
ح تريّح كام يوم فى القلعة
وح ترجع وتكمّل أكلك
ويا اللى كلوها سنين والعه
خلعوك فقالوا أكيد راجع
من شرم ح تحكم وتتابع
والشعب اللى فضلك خاضع
أسوار الكرسى عليه مانعه
خلعوك فقالوا دى قاعدالك
ح تروح من بعدك لعيالك
والموت ح يقول لك لو جالك
فى الجنة وشعبك فى الولعة
خلعوك فقالوا أنت صاحبها
وتسيب الدنيا ولا تسيبها
ولا أيها أيد تدخل جيبها
غير إيدك وجميل الطلعة
خلعوك فقالوا ماتقلقشى
شعبك مسطول وما بيفوقشى
إن كان ع الشوق مابيشتاقشى
باللى بتديه الناس قانعه
خلعوك فقالوا ح تلهطها
والبيه أبو طبله مظبطها
أتاريه من خيبته ملخبطها
وبدل توريث جابلك خلعه
خلعوك فقالوا إنها قله
ناس فاضيه وخارجه بتتسلى
زوبعة والمرة دى ف حله
وح نكسر ورا منهم زلعه
خلعوك فقالوا ح ننهيها
دى عيال فى ساعات ح نربيها
والجمعة إن حكمت نلغيها
والنت حشيش ومفيش جامعه
خلعوك فقالوا أنت قدرها
ومعاك ح تواصل مشوارها
وانت اللى نزلت بمقدارها
وبقدرة ربنا آهى طالعه