حكايات صحفية

النهاردة أنا الحمد لله رايق وميت فل واربعتاشر ولاني اتعودت اقولكم علي كل حاجة فيبدو والله اعلم إن ربنا كتب لي في نهايات أيامي اني اكون من عائلة الملك خوفو ولا حتي من عائلة الملك امنحتب .. وان الاله حورس ربنا يبشبش الطوبة اللي تحت دماغه يبقي عمي. ومنعا للحسد مش هقول لكم إن جدتي هي الملكة نفرتيتي وبجد هي شبه الست امي ربنا يخليها. ولو إنها احلي من ميت نفرتيتي.
خير اللهم اجعله خير جريدة الدستور ربنا يحرسها هي والعاملين فيها باعتبارهم زخر الصحافة والحقيقة كتبوا ان الاجهزة الرقابية بتبحث عن ثروتي انا ومراتي وولادي في الأقصر. وبكده ممكن بالفعل يلاقوا لي كام حاجة يكون أبويا الله يرحمه كان مدكنهم ومش معرفنا مكانهم. وآه لو يطلعوا حتة ولاحتتين أرض في البر الغربي عشان من بكرة اروح اقعد فيهم وانقب عن الاثار وأئب علي وش الدنيا بدل شغلانة الصحافة اللي بندم علي اليوم الاسود إني اشتغلتها.
ياما أبويا الله يرحمه قالي سيبك من الشغل عند الناس ولا عند الحكومة مفيش احسن من الشغل الحر.. ياما عرض عليَ امسك تجارته وكان دائما في ايامه الاخيرة يقول مصيبتي السوده اني علمتكوا كلكم ومفيش حد هيمسك تجارتي بعد مااموت.. لكن الحمد لله آهي اخرت الشغل عند الحكومة ولو ان الجرايد مش ملك الحكومة اخرتها حلوة وميت فل وصدقوني انا دلوقتي براجع كل اوراق عيلة القط.. الظاهر انها من عائلات الاسرة الثانية التي حكمت مصر معرفش سنه كام عشان اخويا وحبيبي الدكتور زاهي حواس ميكدبنيش وساعتها والله العظيم هروح ميدان التحرير واظل معتصم فيه لحد اما يدوني ورثي.. كام تمثال.. علي كام مسلة علي كام حتة انتيكة وطبعا اللي له في الاقصر له كمان في اسوان بحكم القرابة. وياريت حد يدور هناك علي بقية املاك عائلة القط التي حكمت مصر منذ 8 آلاف سنه وكانت أزهي عصور النونوة.
العمود قرب يخلص وانا لسه عايز افضفض.. عموما الاسبوع الجاي نكمل ويارب يديكم كلكم زي ما اداني.. ولا بلاش.. ربنا مايوريكم عمي الحاقدين والفاشلين الذين سوف يموتون كمداً وغيظاً وغلا ودستور يااسيادنا..!!