حكايات صحفية

بكرة الانتخابات.. ياريت كل واحد فينا يروح يدي صوته ويختار بنفسه اللي هيمثلوه في مجلس الشعب .. وصدقوني أي مشاركة أوسع من جانب الناس في الانتخابات هي أقوي الأسلحة التي توجه ضد عمليات التزوير أو البلطجة.
مشاركة الناس هي الحارس اللي هيضمن لنا نزاهة الانتخابات ويضمن حقنا في اختيار رجالة وستات قادرين علي العمل والعطاء والمشاركة الايجابية في عملية اثراء الديموقراطية.
كلنا طبعا عارفين إن فيه بعض الناس المغرضين عايزين الانتخابات تبقي جنازة ويشبعوا فيها لطم من خلال إثارة بعض الخناقات والمشاحنات.. يعني شوية بلطجة لزوم الفضائيات اللي ميهمهاش غير انها تشوه صورة مصر والمصريين.
كلنا عارفين ان مصر عاملة زي الشوكة في حلق بعض القوي الخارجية من خلال مواقفها اللي بتفرمل أي محاولة للانفراد بحلول لا تتفق مع مصالح عالمنا العربي.. عارفين موقف مصر من المستوطنات.. عارفين موقف مصر في الدفاع عن أمن الخليج العربي.. عارفين موقف مصر تجاه فرض نماذج معلبة للاصلاح الديموقراطي لا هدف لها سوي البلبلة وإثارة الشكوك وعرقلة مسيرة مصر والعالم العربي والاسلامي من أجل التنمية والتحديث والتطوير.
كلنا عارفين محاولات جماعة الإخوان المسلمين ولعبتها المكشوفة في خلط الدين بالسياسة رغم انها جماعة محظورة بحكم القانون.. لكن للأسف الشديد القانون كان باله طويل قوي وحباله مطاطة وطنش حاجات كتيرة بيعملوها علي أمل إنهم يصلحوا من نفسهم.. لكن للأسف الشديد استحلوا العملية.. واعتقدوا إن ليهم كلمة مسموعة وان حيالهم المفضوحة هتخفي عن الناس.
بكرة ياريت كل المصريين يروحوا اللجان علشان يقولوا للعالم كله ان مسيرتنا للحرية والديموقراطية بتحرسها عيون الناس وعقولهم وقلوبهم.. اطلعوا بكرة قولوا رأيكم.. اختاروا اللي بتحبوه وبتثقوا فيه سواء من الحزب الوطني أو أي حزب تاني.. لكن أهم حاجة ان كلنا نتصدي بكرة لمحاولات التشويه المدفوعة الأجر مسبقاً، والتي سيلجأ لها بعض المأجورين في محاولة لتنفيذ أجندات هدفها أن تنال من مصر.. تنال من استقرارنا وشعورنا بالأمان.. تنال من سفينة وطن يواجه الأنواء والأمواج العاتية التي تمثلها مصالح متضاربة وعالم القوي فيه بياكل الضعيف.
ويارب احرس مصر.. احرسها من كل أعدائها حتي لو كان فيهم للأسف الشديد قلة من أبنائها ضلوا الطريق.