أبو قرش وقرشين

في قانون انتخابات مجلس النواب، وفي الدستور من قبله.. مادة »تحظر« علي أعضاء الحزب الوطني ممارسة العمل السياسي لأنهم كما قيل في أسباب »الحرمان«.. أفسدوا الحياة السياسية، ومع تحفظي علي »الكلمة« لأن أساساً مصر ماكانش فيها حياة سياسية.. إلا أنه.. ماشي.. نقول انهم »أفسدوها«.. لكن كان علي من وضع هذه المادة في الدستور، واللي علشان حلاوتها »كررها« في القانون.. انه ياخد باله من حاجة »مهمة«.. ان »التهمة« دي.. ممكن »تلبس« ببساطة أعضاء حزب الحرية والعدالة »رشق«..، وخدني علي أد »عقلي«.. فمعروف ان فساد بتوع الوطني انهم »ماشوا« الرئيس في كل قراراته، ووافقوه عليها ودعموها، وساندوها (بالروح بالدم نفديك يا ريس) سواء كانت قرارات علي غير رغبة الشعب أو مرفوضة من باقي القوي السياسية المعارضة في ذلك الوقت بما فيها الإخوان.. »مضبوط«.. طيب مابتوع الحرية والعدالة.. عملوا نفس الحكاية وبالمقاس.. مش كلهم بربطة المعلم وقفوا ورا كل قرارات الرئيس وبرروها أفضل تبرير.. حتي اللي اتراجع عنها بعد كده لأنها غلط.. مش كانوا معاه قلباً وقالباً في التصويت علي الدستور اللي كثير كانوا رافضينه.. سواء شعب أو قوي سياسية.. مش هللوا له لما »عين« نائب عام جديد وشال القديم.. ولما رجع مجلس الشعب وعمل إعلانات دستورية وحصن قراراته.، وغيره.. وغيره.. يبقي »وطني« زي إخوان مش كده ولا إيه؟! ادي واحدة..، وإذا كان المقصود بالمادة »فساد« »نواب« مجلس الشعب بتوع الوطني لأنهم كانوا بيمرروا القوانين علي مزاجهم..، وواخدين المجلس »لحسابهم« مقاولة، ومش مخليين المعارضة لها »حِس«.. طيب.. إذا كنت نسيت اللي جري.. نجيب الدفاتر.. تنقرا.. فمعروف.. ان الأخ »سعد الكتاتني« لما كان رئيساً لمجلس الشعب كان بيعمل »قعدة« صباحية طبق الأصل من »قعدة سرور« مع مجموعة من الإخوان كان يتفق خلالها ازاي حيمشوا »الجلسة«، وفي أنهي اتجاه حياخدونا وعاوزين يطلعوا منها »ببيان« ضد مين ولا مع مين.. ومعروف كمان انه لما كان التوجه »مايهاجموش« المجلس العسكري أيامها ماكانش يتهاجم، ويتقفل علي الموضوعات ويتقال.. (تحال إلي لجنة)... أما بالنسبة لمجلس الشوري فحدث ولا حرج فهو يكاد ينطبق »بالنص« والحرف وحتي الحركات مع ما كان يقوم به أعضاء الوطني في تمرير القوانين.. و(كلنا سمعنا ده علنا وجهراً من السلفيين).. وحتي في تلقي التعليمات بالتليفون من خارج المجلس.. (سبحان الله »كوبي«)، وبعدين علشان أبو قرش زي أبو قرشين.. وأحنا بنقول الوطني »شرح« الإخوان.. ليه؟!.. لم يحاول أعضاء الحرية والعدالة ولا »الكتاتني« تغيير لائحة مجلس »سرور« اللي قالوا عنهم »فاسدين«.. لأنها كانت بتديهم الحق يتصرفوا زي ما هما »عايزين«.. ولنا في اللجنة التأسيسية »عبرة« يا أولي الألباب.. ولو كان الأخ الذي وضع مادة عزل بتوع الوطني لأنهم فاسدين.. »بمعني« انهم استفادوا من وجودهم في البرلمان.. فحتي دي.. حصلت.. من نواب في الحرية والعدالة..، ومش عاوز أقول لك انه فيه رئيس لجنة منهم طلع علي حساب وزارة لحضور مؤتمر.. بالإقامة كاملة.. وبعد ما المجلس ما كان »انحل«.. يعني طالع علي حساب »جهة« حكومية بيراقبها.. وكمان بعدما المجلس اتحل ومابقاش عضو فيه.. وعندك »نواب« منهم اللي بني علي أرض زراعية ومنهم من عين »ابنه« مع انه لم يكن له الحق في ذلك، و»خد بالك«.. بتوع الوطني بقالهم 30 سنة لكن بتوع الحرية والعدالة ماكملوش 3 شهور!!! قلت بقي.. »بتوع« الوطني اتعزلوا ليه.. آه.. طيب ماتخليك جدع وتطبق المبدأ بشرف علي الكل.