شد وجذب

تخاريف .. وزهايمر.. وقلة أدب

مصر بعون الله هتعبر الأزمة وهتنتصر علي الاٍرهاب وهتبقي قد الدنيا بجد وهؤلاء لم يجدوا مكانا يستوعبهم الا مزبلة التاريخ
بعد سنوات من الغياب والاختفاء عن المشهد تذكرت الكلاب أنها كانت تعوي كل يوم أيام المؤامرة والانفلات والفوضي.. وللحق كانت الكلاب تستطيع في ذلك الوقت أن تجمع حولها بعض المشتاقين للظهور الاعلامي وكانت تخرج علينا كل يوم بأفكار خيالية وتصدر الاوهام للشعب الغلبان بحجة أنها كلاب متعلمة وبتفهم في الهندسة والطب والإعلام والسياسة واللي ما كنش عنده لقب كان يتم منحه لقب ناشط.. الكلاب اليومين دول عاملين ايه.. نقول بقي.. كل واحد حاسس انه مهمل او ان دوره انتهي لما انكشفت المؤامرة يقوم يلمله 15 واحد من بتوع السبوبة ويقعدهم يغديهم ويعشيهم ويروقهم زي ما كان بيعمل ايام يناير ويسجل فيديو يتطاول فيه علي البلد وعلي الرئيس وينتقد المشروعات الكبري والسياسات ويهدد انه قادر علي الحشد ويستعرض عضلاته ويدعي انه كان قائد ثورة يونيو.. اللي الواحد مستغرب منه ان الكلاب مش عاوزة تصدق انها انكشفت وان ايام لما كانت الناس بتصدقهم كانت مؤامرة كبيرة قوي علي البلد، الشعب استوعبها بعد لما شاف الخراب بعينه.. انا مش هتكلم علي الدكتور الفاشل ولا المهندس الأفشل ولا الناشط اللي نفسي اعرف هو بيشتغل ايه..انا هتكلم علي مصر بلدنا اللي لولا عبد الفتاح السيسي الراجل الوطني المؤدب المحترم ورجال الجيش والشرطة كانت ضاعت بجد ودي طبعا كانت أمنية الفشلة.. بلدنا يا سادة وبفضل الله قدرت تكشف المؤامرة وصمدت امام اكبر قوي الشر في العالم وكانت اول بلد تنتصر علي الاخوان واعوانهم ومش كده وبس دي قبلت التحدي الأكبر وبتحارب الاٍرهاب لوحدها ونجحت بفضل الله في تحجيمه بل والقضاء عليه.. ورغم كل الظروف الصعبة اللي بنمر بيها تلاقي مشروعات عملاقة بتتعمل زي محور قناة السويس والمدن السكنية لمحدودي ومتوسطي الدخل وشبكة الطرق والمحاور والانفاق والمجمعات الصناعية في سيناء ومشروعات الصرف والمياه والري بجانب إصلاح المنظومة الطبية والتعليمية.. اللي يخلي الواحد يشد في الشعرتين اللي فاضلين ان ولاد الحلال اللي بقول عليهم مش شايفين اي حاجة حلوه وعاوزين يرجعونا لورا تاني.. انا مش فاهم ليه.. دول ناس حبين يطلعوا علي الفضائيات يفتوا ويتكلموا وكل واحد فيهم بلغ من العمر ارزلة. ومش عاوزين يصدقوا انهم هيموتو ويقفوا بين يد الرحمن ويتسئلوعن الأفكار المغلوطة اللي عاوزين يصدروها للشعب علشان هما يعيشو وكلنا نموت من الجوع.. انا شايف ان الاعلام الفاسد اللي كان بيسمح لهذه الأشياء ان تظهر علي شاشات بعض الفضائيات عنده فرصة جهنمية انه يتوب ويطهر نفسه ويكشف سر العصافير ويقول حقيقة اللي بيحصل في البلد بجد.. مصر بعون الله هتعبر الأزمة وهتنتصر علي الاٍرهاب وهتبقي قد الدنيا بجد وهؤلاء لم يجدوا مكانا يستوعبهم الا مزبلة التاريخ.. سهل جدا انك تكذب وتشتم وتتفه الأمور لأنك شخص فاشل وتافه ومتحول ومستفيد.. وصعب جدا ان تكون إنسان وطني ومحترم لانه باختصار من شب علي شئ مات عليه علشان انتم شبتم خلاص وتقريبا دخلتو في مرحلة التخاريف والزهايمر وقلة الأدب.. لو كان الرئيس السيسي أنقذ البلد هو وجيش مصر العظيم يبقي لازم الشعب يكمل المشوار اللي احنا اخترناه بكامل ارادتنا.. اوعو تنسو ان احنا اللي نزلنا وأسقطنا الاخوان وبعدين وقفنا في الميادين نقول انزل يا سيسي.. ولما الراجل لبي النداء شرط علينا انه مش هيقدر يعمل حاجه لوحده وان كلنا لازم نشتغل.. الحقيقة انا شايف ان الراجل التزم بوعده واحنا اللي خلفنا الوعد.. خلوا بالكم لو الكلاب ظهرت تاني هتعضنا كلنا علشان بقت مسعوره.. القرار في يد الشعب احنا اللي هنبني ونعمر واحنا اللي هنسمح للكلاب انهم يتصدروا المشهد من جديد..وتحيا مصر.