اتخنقنا

والله بقت عيشة تقرف .. وبلد تقرف .. الواحد ما بقاش عارف يعمل ايه.. لو كان ينفع يهاجر.. ويغور كان عملها.. بقالنا سنة ونص.. طحن في بعض ..وكدب علي بعض .. لغاية ما خلاص الواحد جاب آخره.. تصحي مغموم.. تنام مهموم.. وبقية اليوم قاعد »تتلفت« حواليك مش عارف »الولعة« حتقوم فين.. قاعد مستني ياولداه المليونية علي الألفية وانت مش متهني علي قرص طعمية.. مفيش يوم.. تستريح فيه ..وكأنه انكتب علينا نخلص من حكم كان بيضربنا »بالصرمة« ..لحرية مكفرانا في عيشتنا وبرضه مضروبين فيها »بالبلغة«.
أخدنا ايه من ده، ولا من ده.. من يومنا واحنا مفعول بينا.. ده يجبنا شمال.. ده يودينا يمين .. هي دي بروح أمها الديمقراطية.. ومن حقك »تتكلم«.. اتكلم فين ومين حيسمعني.. ما انا »بااولول .. أهوه«.. ولا حد حيعبرني.. باأقول .. كفاية.. اتخنقت .. حرام.. ولا حد حيبص في وشي.. أنا مش علي الخريطة.. لأني مش اخوان ..ولا سلفي ..ولا عسكري ..ولا فلول .. ولا ثورجي.. ولا شغلي ثورة مضادة ..ولا اي حاجة .. أنا حيا الله بني آدم.. شايف كل اللي بيحصل حواليه وكاتم وحطق من جنابي.
مش عاوز من البلد مصلحة ولا طالب فيها كرسي.. حرام اني أعيش زي مخاليق ربنا.. هو فيه ايه.. ليه ام التعذيب اللي بيحصل فينا يوماتي.. قلتم بلاش دستور .. حاضر.. قلتم انتخابات .. حاضر.. قلتم رئاسة وصناديق .. حاضر.. قلتم اعمل عجين الفلاحة ونوم العازب .. حاضر.. وبعد ده كله ومش عاجب.. لا قانون عاجب ..ولا رئيس عاجب ..ولا اي حاجة عاجبة أي حد .. اللي بنام فيه بنصحي عليه.. لما مشوا مبارك قالوا صلاحياته كتير .. لما شالوا الصلاحيات من اللي جاي .. ولعنا الدنيا.. قالوا مجلس الشعب زي الزفت واللي فيه عاوزين يكوشوا .. لما اتحل المجلس ولعنا الدنيا.
واحنا ماشيين كما »البقر« .. طب احنا فين من ده كله.. وعلينا بايه .. عاوزينا نقول ايه .. أم الرياسة علي المجلس علي الثورة .. خلاص ادينا قولناها.. بلوها واشربوا ميتها .. ده لو طلع منها »ميه«!