يوميات الأخبار

يا دنيا دُوري.. انزاح يا ليلنا ورُوح
من الساعة دي الدنيا ح تروح شمال
من قصيدتي «قبل الطوفان الجاي» سنة 2009

عن الإرهاب سألوني
بمجرد ماانتهت السلامات والتحيات بيننا وبين صاحبي جنرال القهاوي المتقاعد، أخد مكانه ف وسط الشلة، وابتدت الاسئلة ترف عليه من كل ناحية : «إيه رأيك في إعلان الحرب علي الإرهاب؟» تفتكر رايحين علي فين يا جنرال ؟!، وضحك صاحبي جنرال القهاوي المتقاعد، وابتدا يغني علي طريقة زكريا أحمد والست : عن الإرهاب سألوني..وانا في الحرب لا أفهم، وضحكنا كلنا، بس واحد م الشلة قطع علينا لحظة المزاج دي وأصر علي السؤال : تفتكر مين اللي ح يغلب : الدولة ولا الإرهاب ؟!، وانفجر صاحبنا الجنرال وزعق فينا كلنا: هوه ماتش كورة بين الدولة العميقة وبين الإرهاب، واحنا الشعب مجرد متفرجين بنشجع اللعبة الحلوة، واللي يغلب فيهم ياخد تاج الجزيرة ويحكمنا ويشكمنا ؟!!! وزي ما تقول كده نزل علينا كلنا سهم الله وبلّمنا، واتعدل الجنرال في قعدته، وراح حاطط العصاية اللي بتسند شيخوخته تحت باطه وكأنها عصا الماريشالية، واتنفخ كأنه قائد عسكري خطير، وكأن القهوة دي غرفة قيادة عمليات، وابتدا يشرح، وقال لا فض فوه بهدوء الواثق : واحد من الاستراتيجيين العظام زمان، (يمكن يكون فون مولتكة)، قال مقولة عبقرية : الحرب هي السياسة من فوهة البندقية، يعني الحرب هي استمرار السياسة بس بالقوةالمسلحة، يعني لما التناقض بين طرفين ما يتحلش بالسياسة، يلجأ كل واحد منهم لمحاولة كسر إرادة خصمه بالقوة، علشان يفرض عليه شروطه، وده اللي خلي كليمونصو رئيس وزراء فرنسا زمان يقول ان الحرب مسألة أخطر من اننا نتركها للعسكريين وحدهم، دي مسألة تخص المجتمع كله، ومن كام يوم شفت الشيخ نبيل نعيم في برنامج تليفزيوني علي محطة عربية بيقول كلام رعبني، والشيخ نبيل ده راجل إرهابي وتكفيري قديم وتاب علي إيدين دولة مبارك، يعني خبير بعقلية حركات التكفير الإرهابية، وعارف ألاعيب الدولة العميقة، وعشان كده لما يقول انه لا يستبعد المصالحة بين الدولة العميقة وبين المعتدلين المنشقين علي جماعة الإخوان !! لازم احط إيدي علي قلبي واقلق واترعب كمان، ولما نشوف ان قايمة اللي أفرج عنهم – بعد الوعد الرئاسي – ونلاقيهم كلهم من شباب الإخوان ومفيهمش واحد من الثوار اللي كلنا نعرفهم، لا علاء ولا ماهينور ولا يارا ولا عمر حاذق مثلا، لازم يزيد قلقي ورعبي، وده مش معناه اني باطالب بإقصاء كل اللي انضموا أو مشوا ورا الإخوان، لأ طبعا، اللي أجرم يتحاسب، واللي كان مغرر بيه وما أجرمش في حق البلد والناس، يرجع لحضن شعبه وبلده، بشروط الشعب ومش بمساومة مع أجهزة الدولة ومسئوليها، ونرجع لموضوعنا : الحرب علي الإرهاب،وعشان نكسب الحرب دي لازم قيادتنا الاستراتيجية تكون شايفة صح : مين العدو؟ وعايز ايه ؟ يعني ايه هدفه الاستراتيجي ؟، واحنا مين ؟ ومين حلفاءنا ؟ وازاي نرتب قواتنا ونحشد مواردنا ؟ وازاي نحول معركتنا الاستراتيجية دي لمجموعة معارك تكتيكية تقربنا من أهدافنا الاستراتيجية ؟ وازاي نحضر ساحة القتل عشان نكسر إرادة عدونا ونقضي علي أحلامه ؟
ونخش علي أول سؤال : هوه مين العدو؟، والجواب بالطبع : الإرهاب، بس لو نفتح عينينا علي آخرها ح نشوف ورا الإرهاب مجموعة قوي اقليمية ودولية هيه اللي زرعته وكبرته وسلّحته وطلقته علينا، بس ما حدفتهوش علينا من السما، ده لقي تربة وبيئة سمحت له إنه يكبر ويترعرع في بلادنا المليانة مشاكل صنعها الجهل والتخلف والظلم الاجتماعي، يعني الإرهاب ده - طلع ولا نزل - مجرد أداه في إيد العفريت الشراني العجوز اللي كلمتكو قبل كده عنه، واللي بيمثل مطامع الرأسمالية المتوحشة - من يومها - في نهب خيراتنا.
طب وده، أو دول كلهم، عايزين ايه ؟ إيه هدفهم الاستراتيجي ؟، هدفهم الواضح من أول العصر الحديث للنهارده، انهم يمنعونا من التحرر والتقدم، ونفضل موحولين في مستنقع الجهالة والتخلف والفرقة والتبعية، والإرهاب ده آخر كارت بيلعبه معانا العفريت الشراني العجوز، ولأنه عارف ان العرب ما تقوم لهمش قومة من غير مصر، وان نهضة مصر هيه اللي ممكن تقود العرب كلهم للتحرر والتقدم، فتركيزه كان دايما علي مصر، تنهض مصر مع محمد علي ورفاعة، فيتدخل العفريت الشراني العجوز، ويوقف نموها بمعاهدة لندن، ترجع تنهض مع اسماعيل، يتدخل بجيوشه ويكسر جيش عرابي ويحتل مصر، ويبرطع في المنطقة، ويزرع دول عمولة، ويرسم حدود علي هواه، ويرمي بذرة اسرائيل ولما تنهض مصر من جديد مع ثورة تسعتاشر وطلعت حرب وتبتدي تشد حيلها شوية في وسط محيط من التبعية، وتنفجر الثورة الفلسطينية سنة 1936، يتدخل زعماء العشائر والدول العربية التابعة عند ثوار فلسطين عشان يبطلوا ثورة ويتعهدولهم يجيبولهم حقهم، وبدل ما يستردوا الحقوق تضيع فلسطين كلها سنة 1948، وتقوم مصر من تاني ويحاول عبد الناصر مواصلة حلم التحرر والتقدم، تتآمر عليه الرجعية العربية ودولها العمولة العميلة، وتهدله دولة الوحدة، وتستنزف جيشه في اليمن، وتسيبه لاسرائيل واللي ورا اسرائيل يهدوا له ويهدوا لنا الحلم العربي في الحرية والوحدة والعدالة الاجتماعية، والنهاردة، بعد فشل مجموعة الأنظمة العمولة والعميلة في تنفيذ مشروع الشرق الأوسط الجديد لحساب العفريت الشراني العجوز، وبعد تصاعد موجات الثورة والمقاومة في المنطقة، طلّع لنا العفريت الشراني العجوز كارت الإرهاب من كمه، وده الكارت الأخير اللي لازم نحرقه له، عشان نستكمل طريق نهضتنا.
طب احنا مين ؟ ومين حلفاءنا ؟، علشان نجاوب ع السؤال ده، لازم نفتح عينينا ع الدنيا اللي حوالينا، ح نلاقي الإرهاب واللي وراه في كل مكان في المنطقة، في سوريا ولبنان والعراق واليمن والسودان والصومال ونيجيريا وتونس والجزاير واهو وصل للكويت والسعودية كمان، وكله إرهاب واحد مهما اختلفت التسميات والشعارات، وكله منبعه الفكري واحد، وكله بيلعب لحساب العفريت الشراني العجوز، واللي بينه وبين أتباعه وأدواته من الأنظمة العمولة العميلة (بما فيها اسرائيل) بعض التناقضات الثانوية اللي طفت علي السطح مع مفاوضات النووي الإيراني، وبرغم ان الإرهاب بيزداد توحشه حوالينا ف كل مكان، إلا ان معركته الكبري، واتجاه ضربته الأساسية هوه مصر، بكل اللي بتمثله للمنطقة العربية، واهو دلوقت بيحاوطنا من الشرق والغرب والجنوب، من سينا وليبيا والسودان، وهدفه – هو واللي وراه – مش بس تفكيك الدولة المصرية، لأ هدفه النهائي تفتيت المجتمع المصري وكل المجتمعات العربية، وإغراقها في حروب مذهبية ودينية وطائفية وعرقية، وده معناه ان احنا (الشعب المصري كله) لازم نواجه الإرهاب ونبقي – دولة وشعب – ايد واحدة ضد الإرهاب، ولأن الإرهاب اللي بيهددنا وبيهدد منطقتنا وبيهدد العالم كله إرهاب واحد منابعه واحدة وأهدافه واحدة، يبقي لازم نشكل جبهة عريضة واحدة ضده، في قلبها الشعب المصري وجيشنا الوطني، وحوالينا كل الشعوب العربية بمقاومتها الشعبية وجيوشها الوطنية، ووراهم كل الدول الوطنية اللي رافضة هيمنة العفريت الشراني العجوز (زي دول البريكس ودول العدالة الاجتماعية في أمريكا اللاتينية)، وكل شعوب الأرض اللي بيهددها الإرهاب (بما فيها شعوب الدول الاستعمارية نفسها)، وده مش معناه -بالضرورة- قيادة عسكرية موحدة (زي قيادة أمريكا للحلف الدولي الفشنك ضد الإرهاب)، لكن معناه ضرورة التنسيق اللوجستي والمعلوماتي بين كل قوي المقاومة الشعبية والجيوش الوطنية في المنطقة العربية وفي العالم كله.
طب ازاي بقي نحوِّل معركتنا الاستراتيجية دي لمجموعة معارك تكتيكية تصب ف مصالح أهدافنا الاستراتيجية ؟! وراحت الشلة واندفعنا نتكلم بألف لسان : آيوة.. ازاي ؟! يا عم الجنرال ؟!!، وابتسم صاحبي جنرال القهاوي المتقاعد وقال : لأ ده موضوع شرحه يطول، نكمّله في القعدة الجاية وعليكو خير.
تحية واجبة لوزير الأوقاف
أنا - بالتأكيد - ضد حرق الكتب، وباشوف ده سلوك همجي وبربري ونازي، بس التحية واجبة لوزير الأوقاف المحترم اللي جمع كتب التراث اللي بتأسس للإرهاب فكريا من المساجد، وحظر تداولها، ده سلوك مستنير وبيتسق مع الدعوة لتجديد الخطاب الديني، وف نفس الوقت بيضع علامات استفهام وتعجب مالهاش أول ولا آخر علي سلوك بعض شيوخ الأزهر اللي استغلوا هذه الدعوة لتأسيس جبهة ضد العلمانية ! ودعوا لعودة الكتاتيب ورفعوا القضايا علي كل من يدعو لإعادة النظر في كتب التراث التي يقدسونها !!!
أوراق قديمة
مش عارف ليه بيلح علي بالي اليومين دول غنوة المقدمة والنهاية، اللي كتبتهم لمسلسل «ناصر» اللي كتبه صديق العمر يسري الجندي سنة 2008، ورفضهم المخرج السوري اللي قتل المسلسل بإخراجه الرديء، وسنة 2012 – استخدمت أغنية المقدمة في احتفالية «حلم وعلم « اللي كتبتها لمدارس المستقبل، ولحن أغانيها المبدع الجميل محمد الطوخي، وأخرجتها وصممت استعراضاتها ريم حجاب.
(1)
ناصر..ناصر..ناصر
حلم ف ضمير الزمن وحلمنا بيه من زمان
لما محمد علي ورفاعة نزلوا الميدان
وجيل ورا جيل اضافوا له كمان وكمان
ومن عرابي لسعد
الحلم طاب ع العيدان
حلم بوطن مستنير
نبنيه بحب وضمير
ولاده سواسيه فيه
والعقل أعدل ميزان
فينك يا حلم الزمن ؟! يا حلم والله زمان !

يا أمة الحق ليه هُنَّا ؟! وفين صرنا ؟!
عصر الشرا والافترا والقهر عاصرنا !
والليل محاصرنا، وانحلِّت أواصرنا !
أعداءنا زرعوالنا شوكة في خواصرنا!
وسَفُّوا خيرنا، ولفّوا ضميرنا في الأكفان
فينك يا حلم الزمن ؟ يا حلم والله زمان !

ولّي زمان الهزيمة وجايْ زمان النصر
يا أمة قومي من الغُمّة، زماننا جاي
نصر العروبة اكتمال مجده عروبة مصر
وحلم ناصر يفكّرنا ف زمن نسَّاي
يا أمة الخير زماننا الجايّ خير وأمان
فينك يا حلم الزمن ؟ يا حلم والله زمان

(2)
ومهما كان يا حلم زمان
زماننا الجايّ خير وأمان
زمان والله ياحلم زمان !
ووسط التوهة والزعابير
أملنا كبير في شعب كبير
قدير وبصير، وقاصد خير
وعمره ما استكان لهوان
زمان والله يا حلم زمان !

يا أمة الخير.. وشر الدنيا طوّقنا
نغرق في خطايانا لو غطّينا أخطاءنا
يا نطقنا بالحق، يا كدبنا وصدّقنا
يا صَدَقنا مع روحنا يا ما حدش يصدّقنا
ونضيع في دنيانا بلا غَاية ولا عنوان
زمان والله.. يا حلم زمان !

يا أمة الحق واصلي حلم آباءنا
داحنا ان واصلنا وحققناه.. يحقّقنا
احرار وإخوة وسواسية..ده مبدأنا
يا سبقنا أشواقنا.. يا انسقنا لأعداءنا
ياما نفسنا يكون وطننا جنه للإنسان
زمان ولله يا حلم زمان..