يوميات الأخبار

ولي زمان الهزيمة وجاي زمان النصر

سماح يا اهل السماح
وانا باكتب – الاسبوع اللي فات – عن الكبير ناجي شاكر، ما اعرفش ايه اللي صاب عقلي وانا باقول عن شقيقه الفنان الكبير ايهاب (الراحل)، وايهاب من كام سنة مهاجر لكندا، وانا عارف كده بس تقولو ايه لخرف الشخشوخة، وانا النهاردة بارجو اخونا ايهاب (الله يطوّل لنا ف عمره)، وبارجوكو تسامحوني علي السهوة الفظيعة دي، وح ابقي طماع كمان في كرم اخلاقكو وسماحتكو، لأني كنت وعدتكم أكلمكم النهاردة عن معرض ناجي شاكر الأخير، بس مضطر أأجل الكلام ده لمرة جاية ان شاء الله، وسماح يا اهل السماح.
المثقفين: حبة فوق.. وحبة تحت
كتير من الكتاب والمفكرين كتبوا عن موضوع المثقف والسلطة، منهم لينين وادوار سعيد، وحتي جرامشي وهو بيكلمنا عن المثقف العضوي كان بيحوم وبيقرب من الاشكالية دي، وجدلية الثقافة والسلطة قديمة أوي في التاريخ، من أول ما الانسانية بقت انسانية، وسبب الاشكالية ببساطة ان الانتلجنسيا أو النخبة الثقافية ما هماش طرف مباشر في أي صراع طبقي بين الناس اللي فوق والناس اللي تحت، ولأن المثقف بحكم تفرغه للعمل الذهني بيبقي أول مين يوصل للمعرفة، والمعرفة دايما مصدر قوة للي بيملكها، من أول الانسان البدائي اللي كان عايش علي قطف الثمار والصيد ونجح في ترويض الحيوانات، لشيخ القبيلة والعراف والكاهن، للكاتب المصري المقرفص القديم لميكيافيلي وصولا للمثقف في العصر الحديث، وبفضل المعرفة اللي بيملكها المثقف بيقدر يعيش كويس في اي مجتمع انساني، وفي أي نظام : عبودي أو اقطاعي أو رأسمالي أو اشتراكي، المعرفة اللي بيملكها بتدي له وضعه في أي مجتمع، لأن المجتمعات كلها محتاجة للمعرفة اللي عنده.
وبييجي وقت علي المثقف ويسأل نفسه : القوة اللي جاية من المعرفة أوظفها لحساب مين ؟! لحساب نفسي ؟ ولّا لحساب ناسي ؟، لحساب أنانيتي ؟ ولا لحساب انسانيتي ؟، وكتير من المثقفين بيختاروا يوظفوا معرفتهم لحساب ذواتهم المقدسة (من وجهة نظرهم)، فيتقربوا من الناس اللي فوق، ويحطوا معرفتهم في خدمة نفوذهم وسلطتهم، وياخدوا مقابل كده شهرة ومال ونفوذ ووجاهة اجتماعية، وكتير – برضه – من المثقفين بيختاروا يوظفوا معرفتهم لحساب الناس اللي تحت، ويبقوا صوت اللي مالهمش صوت، ويمكن يغضب عليهم الناس اللي فوق، بس محبة الناس اللي تحت بتدفي قلوبهم، وتهوّن عليهم مشوار الشقا اللي اختاروا يمشوه، وبيفضلوا ماشيين في طريق الحق والخير والجمال، وينوروا طريق البشرية علي مدار العصور، وعندنا من النوع ده في العصر الحديث سلسال طويل من عبد الله النديم لبيرم لفؤاد حداد لصلاح جاهين لأمل دنقل وعفيفي مطر وقاعود واحمد فؤاد نجم وغيرهم كتير من الشعراء، ومن نجيب محفوظ ليوسف ادريس لبهاء طاهر ليحي الطاهر لأبو المعاطي أبو النجا للمنسي قنديل لطابور طويل من القصاصين والروائيين، وفيه صنف تالت من المثقفين بياخدو سكة تالتة، بيبقي انتماءهم وولاءهم للناس اللي تحت، وللحق والخير والجمال، بس بيقربوا من الناس اللي فوق، عشان يحققوا اللي بيحلموا بيه لناس بلدهم وللانسانية كلها، وعندنا من الصنف ده برضه، سلسال طويل من الشيخ حسن العطار لرفاعة الطهطاوي لعلي مبارك لطه حسين لاحمد بهاء الدين لصلاح عبد الصبور.
والمسألة من أولها لآخرها لحظة اختيار بين الأنانية والمكاسب الشخصية، وبين الانسانية وعشق الحق والخير والجمال، وكل حي بيعمل بأصله، والناس معادن، فيه الدهب وفيه الفالصو وفيه القشرة !!!
باريس..والشعر العربي..تاني
وعدتكم في العدد الماضي بنشر قصائد للفائزين في مسابقة الشعر العربي، التي أقامها المكتب الثقافي المصري، وقلت لكم ان الفائزة بجائزة أحسن قصيدة هي شابة مصرية عمرها تسعتاشر سنة، واسمها آلاء علي حسنين من مواليد الزقازيق وبتقيم حاليا بالسعودية بالقصيم (البريدة)، وأسعدني اني طالعت في العدد الماضي من أخبار الأدب أختنا العزيزة عبلة الرويني وهي بتقدمها بقصيدتها المهداة إلي ريتا جراهام، وبتقول انها سبق وقدمتها لقراء أخبار الأدب من مدة، وده أكد لي صواب اختيارنا لآلاء في مسابقة باريس، وانا النهاردة باقدمها في قصيدة تانية، وح اقدمها لكو دلوقت بقصيدة تانية من قصايدها اللي اتقدمت بها للمسابقة :
مرثية إلي نفسي
لا وقت للإيمان
أمام أرنب بري يقاد نحو مسلخ
لا وقت كي يصلي
عصفور وسط عاصفة
إنه ليس زمن التطلع للسماء
والتحلي بالصبر
إنه ليس زمن الفلاسفة والمنجمين
إنها الحرب
حيث يقاد الناس كقطيع من الخراف أو الغزلان إلي ساحة
حيث يكون من الترف
أن يموت إنسان برصاصة
رصاصة واحدة وصغيرة
آه، إنها موتة محببة وسهلة
إنه زمن يري الناس الله واقفا في طريق
ويعبرون من طريق آخر
إنه زمن يرتدي فيه الله زي قتلة وسفاحين
إنه زمن يرتدي فيه الله أشكالا كثيرة جدا
ويرتدي فيه الموت أشكالا أكثر
إنني كلما وليت وجهي
رأيت الله
والموت
يسيران في طريق واحد
متشابكي الأيدي
كأنهما شخص واحد
لا أب لي
إنني يتيمة جداً
أضيّع وجهي في كل مياه أنظر إليها
وأظل طوال الفصول
أركض بجوار النهر
ألاحق العصافير التي شربت منه
وأفتش في رمال الأشجار التي رواها النهر
وفي شباك الصيادين
في أفواه أطفالهم وبطونهم
أبحث عن وجهي
..أبحث عني
إنني هوّة سحيقة
يرمي الناس فيها الحجارة
واحدة واحدة
..ويعدون حتي أكثر من تسعة وتسعين خروفا
قبل أن يسمعوا ارتطامها
إن رأسي بئر
ينظر الناس فيها
ولا يرون وجوههم
..إن رأسي مثل روحي
معتم وكئيب
لقد كان علي الله أن يخلقني
كما كان مقررا لي أن أكون
صخرة صماء
أو منجم فحم
أو بقعة داكنة في سماء بعيدة
بدلا من أن يفعلها
ويختار أن يعذبني ببشريتي
وسيفعلها الله مجددا
ويختار
أن يعذبني ببشريتي الطويلة.. الطويلة
إنني في التاسعة عشر
وعلي عكسك يا لوركا
فإنني لن أنطفيء كنجمة في منتصف عمري
لن تختفي جثتي كصافرة
ولن يفتشوا في المنازل والمصانع والمخازن
عنها..عني
إنني سأموت
أمام الجميع
عارية ووحيدة
جافة كغصن
..أو ملقاة علي شاطيء كسمكة صغيرة
سأموت
أمام الجميع
ولن يلقي عليَّ أحد حبة رمل واحدة
..سيجف جسدي
وينكمش
أمام الجميع
وأبدا أبدا
لن يهبط أحد علي وجهي
.ويغمض عيني
آلاء علي حسانين
فبراير 2015
والتالتة تابتة !!
أول ما اتقابلت مع صاحبي جنرال القهاوي المتقاعد بعد طول غياب، رميت عليه السؤال: وبعدين يا جنرال ؟ رايحين علي فين يا صاحبي ؟ ضحك ملو فمه وقال : ولي زمان الهزيمة وجاي زمان النصر، وبعدين لقيته اتجهم شوية وقال : بس يا خوفي يا بدران !!! علي كل حال التالة تابتة !!!، ونزل عليا سهم الله ولقيت أسئلة الشلة بترفرف حواليه وحواليه كأنها أسراب عصافير : هزيمة إيه ؟! ونصر إيه ؟! ومين بدران ده ؟! وايه حكاية التالتة تابتة دي ؟!، واتعدل صاحبي جنرال القهاوي المتقاعد وابتدا يقول : سبق وقلت لكم ان العركة الدايرة في العالم كله دلوقت في مراحلها الأخيرة، قصدي طبعا العركة بين العفريت الشراني العجوز وبين الإنسانية كلها، يعني بين الرأسمالية المتوحشة اللي بتقودها أمريكا وأوروبا الغربية واليابان، واللي عايزة تحول العالم كله لأسواق وتحول البشرية لزباين، وبين الشعوب اللي عايزة تعيش بكرامة ف أوطان حرة ومستقلة ويبقي خير بلادها ليها ومش للعفريت الشراني العجوز، وسبق برضه وقلت لكم ان امريكا المأزومة حاليا قررت تركز علي عداوتها مع روسيا وكوريا الشمالية وتتجه لأوراسيا والباسفيكي، وسايبة حلفاءها وأتباعها وأدواتها يلعبوا لعبتها في الشرق الأوسط، وكلنا شايفين دلوقت ان العركة الدايرة حوالينا هي بين شعوب وقوي شايفة ان معركتها الأساسية مع اسرائيل واللي وراها، وان معركتها مع الإرهاب ح تصب حتما في صالح القضية الفلسطينية، وبين الأنظمة اللي دايرة في فلك العفريت الشراني العجوز، ومُصرّة تدفع المنطقة لحروب عرقية ودينية ومذهبية تسهّل تفتيت الدول والكيانات الكبيرة، ومن هنا لغاية ما ايران وأمريكا يوصلوا لاتفاقية النووي علي آخر يونيو، ح تحاول الأنظمة دي توصل لهدفها، وح يفضل العفريت الشراني العجوز يحلب فيها ويبيع لها أسلحة بالمليارات تنعش اقتصاده المأزوم، وح تفضل الشعوب والجيوش الوطنية بتقاوم مشروعات التفتيت والتقسيم، ولو بصينا حوالينا كويس، ح نشوف بوادر انتصار جبهة المقاومة الشعبية والجيوش الوطنية في اليمن وسوريا ولبنان والعراق برغم الكوارث الانسانية وبعض الجيوب الإرهابية هنا وهناك، وح نشوف اسرائيل قلقانة وبتعمل مناورات لحماية جبهتها الداخلية، وحتي حماس بتصطدم دلوقت بالدواعش في غزة وبتعتقل بعض قياداتهم، وسبق وقلت لكم برضه ان العفريت الشراني العجوز لما كسر مصر الستينيات، قدر بعدها يكسر المنظومة اللي كان اسمها اشتراكية ويقضي علي استقلال الدول اللي كانت وطنية، ويبدأ تقسيم العالم علي هواه تمهيدا لابتلاعه، والنهاردة بارجع واقول ان 99,9 % من أوراق اللعبة ف إيد مصر، لو اتعافت كده وشدت حيلها ورجّحت كفة الشعوب علي كفة العفريت الشراني العجوز وحلفاؤه واتباعه ف منطقتنا، واندفعت الأصوات تقول : وده يحصل ازاي واحنا أسري المعونات الخليجية، وشباب الثورة في السجون، وديول مبارك في كل مجال، في الاقتصاد والاعلام ومعششين في كتير من أجهزة الدولة، وضحك صاحبي جنرال القهاوي المتقاعد وقال : عشان كده قلت يا خوفي يا بدران !(علي رأي أدهم الشرقاوي) تكون دي آخر فرصة، والقيادة السياسية الحالية ضيعت لحد دلوقت فرصتين لتحقيق حلمنا الثوري، أول فرصة ف 30 يونيو لما أصرت تشرك في مشهد 3 يوليو بعض القوي المعادية للثورة زي حزب النور، وكانت تقدر ساعتها تقول للشعب الهادر الجبار تعال نقضي علي كل رموز التخلف والتبعية.. بس للأسف ما عملتش كده، وتاني فرصة ضيعتها لما قالت للناس ساعدوني ف مشروع القناة وف تمان أيام جمعت 64 مليار جنيه من المدخرات الصغيرة والمتوسطة، بينما صندوق تحيا مصر بتاع كبار رجال الأعمال ما جابش مليار واحد، كان ممكن ساعتها تقول للناس تعالو نقضي علي نظام مبارك الاقتصادي كله ونستعين بالله وبالشعب وبكتلة البريكس علي تأسيس منظومة إنتاجية وطنية تلبي أحلام الناس في العيش والحرية والكرامة الإنسانية، والنهاردة آدي الفرصة التالتة جاية لنا لحد باب بيتنا : ح نحرر إرادتنا من إملاءات العفريت الشراني العجوز وديوله في المنطقة ؟ ولا ح نضيع الفرصة ؟! لازم نقرر وبسرعة لأن التالة تابتة زي ما المثل الشعبي بيقول !