ناس من مصر

ماسح الأحذية !

عم محمد : أول مهنة اشتغلتها بالوراثة عن أبويا كانت «قرداتى»
في عز البرد القارص وجدته جالساً خارج أحد الكافيهات بشارع جامعة الدول العربية، أمامه صندوق خشبي صغير وفرشاة يمسح بها حذاءً, كنت وقتها مدعوة علي «سحلب» في هذا الكافيه مع مجموعة من الأصدقاء, الجرسون منعه من دخول الكافيه للاحتماء من البرد وممارسة عمله داخله, سمح له فقط أن يأخذ الأحذية ويخرج بها إلي الشارع يلمعها ثم يعيدها إلي أصحابها, اقتربت منه عند انصرافي من الكافيه وهو يمارس عمله, سألته عن اسمه فقال: «محمد عبد الرحيم عبد الرحمن سعد», عمره 64 عاماً، ولد بمحافظة سوهاج بصعيد مصر, يقيم حالياً في منطقة المطار بإمبابة, أنجب خمسة أبناء وزوّج منهم ثلاثة ويعيش معه اثنان, واحدة منهما حاصلة علي دبلوم تجارة لكنها غاوية تمثيل كما يقول وذهبت من قبل للالتحاق بالدفعات التي تتقدم لمركز إبداع القاهرة لكنها لم تقبل وتكرر الخطوة كلما علمت أن الباب فتح أمام دفعة جديدة, وسألني: «ماتقدريش توصي عليها مدير المركز, دا أنا كومبارس قديم والبنت غاوية تمثل زي أبوها», وعدته خيراً وطلبت منه أن يروي لي حكايته مع التمثيل ومسح الأحذية.
ضحك عم محمد قائلاً: « أنا مش عارف الدنيا ليه بتعاندني.. اليوم إللي اتولدت فيه الملك فاروق اتشال من الحكم, ويوم مادخلت المدرسة حرب 56 قامت ووقتها كنا في الإسماعيلية والمدرسة اتقفلت ومرجعتلهاش تاني لأننا هاجرنا إلي القاهرة, واليوم اللي اتجوزت فيه عبد الناصر مات, وأول عيل خلفته الرئيس السادات منع «اللحمة», ويستطرد عم محمد قائلاً: أنا أول مهنة اشتغلتها بالوراثة عن أبويا كانت «قرداتي» وقعدت في المهنة دي لغاية مابقي عمري 25 سنة, بعدها اشتغلت فكهاني، أسرح بعربية عليها الفاكهة, ومرة وأنا واقف أبيع أمام استوديو الأهرام لاقيت واحد بينادي عليا, وقالي اركن عربيتك علي جنب وتعالي اتصور كام لاقطة مع المجاميع في السينما وعرفت ان دا واحد من الإنتاج المهم، كان العمل اللي اخدوني فيه اسمه «قلب الليل», حبيت الشغلانة وبقيت اروح الاستوديو دا علطول, واشتغلت في مسلسل تاريخي ديني اسمه «تحت ظلال السيوف» وبعديه مسلسل تاني اسمه «القضاء في الاسلام» وفي كل الأعمال دي كمبارس ضمن المجاميع مش بتكلم ولا جملة, ولما قولت لمدير الانتاج ان الأجر مش عاجبني طردني من الاستوديو وقال لي ماتجيش تاني وساعتها اعتزلت التمثيل, بعدها اشتغلت ماسح احذية ومن يومها وانا علي الحال دا.
سألته هي مهنة ماسح الأحذية بتحتاج لرأس مال كبير؟, قال أبدا دا كلها صندوق خشب بيتعمل عند النجار ب 20 أو 30 جنيهًا وفرش وورنيش وصبغة, يعني الواحد يبتدي المهنة دي ب 150 جنيهًا, قلت له هي مهنة ماسح الأحذية محتاجة لخبرة واحتراف ولا أي حد ممكن يمارسها, قال بصراحة اليومين دول كل من هب ودب واللي مالوش شغلانة بيعمله صندوق ويقعد في الشارع يمسح احذية, لكن المهنة محتاجة فعلا خبرة واحتراف خصوصًا مع الأحذية «الشامواه» وكل جلد وليه طريقة في التعامل معاه, يعني الجلد الطبيعي غير الجلد الصناعي. سألته هل سعر مسح الحذاء موحد, فقال: لا طبعا وعمومًا انا أنتقل من سكني في امبابة إلي المهندسين لان زبائن الكافيهات فيها بيدفعوا كويس واقل سعر حصلت عليه في تلميع الحذاء 2 جنيه, والدنيا بتضحك معايا في الصيف لان السياحة العربية بتبقي علي اشدها في هذا الوقت.
قلت لعم محمد انا حاسة في كلامك بالرضا والقناعة لكن ايه اللي انت بتتمناه من الدنيا, قال بأسي شديد: انا وبنتي مهددين بالطرد في الشارع لأني ساكن في شقة ايجار جديد من 15 سنة, كل فترة المالك علشان يجدد العقد يزود في الايجار وانا دخلي محدود ورزقي يوم بيوم, طالب منه يجددلي العقد لكنه منحني مهلة شهرين لانه عايز يبيع الشقة تمليك وبيقولي يا تملكها او تخرج منها والمبلغ اللي طالبه لو قعدت سنين اشتغل مش هقدر اجمعه, فأنا طالب من الله ولا يكتر علي الله ان المحافظة تشوفلي سكن اعيش فيه انا وبنتي اللي فاضلي من العمر .
هند النمر