حكايات صحفية

ملحق النهاردة أجازة بيدور الايام دي علي كوسة ولا واسطة عند رئيس التحرير..!! بصراحة الملحق عايز يخلع كده كام اسبوع ياخدهم اجازة طوال شهر رمضان والسبب طبعا ان الملحق ابن الايه ساعات كده بيفوت حاجات ما تنفعش في شهر رمضان الكريم يعني مثلا صورة نص كم ولا صورة شفتشي وماحدش يقول يعني ايه شفتشي؟! اهي كلمة زي ميني وميكروجيب ولا مافيش حتي جيب!!، لذلك قرر يخلع من القراء ويروح ياخد كام غطس كده في مية بلطيم ولا رأس البر.. لان حالته تعبانه وميقدرش يروح مارينا.
وعشان كده وعشان محدش يزعل هنعمل ملحق جديد لانج طول فترة غياب اخونا ملحق »النهاردة أجازة« هو ملحق »رمضان جانا«... والله العظيم ملحق هينسيكوا أي حاجة مش بس الاكل والشرب والتدخين.. حتي ينسيكم كل العمايل الوحشة اللي عملاها فينا حكومتنا الذكية.. بل أتحداكم إنه هينسيكم حتي الدكتور يوسف بطرس غالي اللي ماشي يعد علينا كل حاجة حتي النفس!! ونفسه يأصول مننا أي حاجة يدعم بيها حصالة الحكومة.
ملحق »رمضان جانا« هياخدكم في جولة نشوف فيها الدنيا كلها بتعمل ايه في شهر رمضان. ملحق هيقدم لكل ست بيت..سواء كانت خايبة ولاشاطرة..أكلات تاكلوا صوابعكم وراها ونتحدي به كل ستات البيوت والشيفات 5 نجوم.. وهتكون معظمها أكلات علي أد الحال.. يعني اورديحي مفهاش لحمة ولا فراخ لأنها مضره قوي بالصحة زي ما حكومتنا الذكية بتقول لنا.
وكمان لان الناس وخاصة المدخنين بيزرجنوا شوية في رمضان وروحهم بتبقي علي الاخر هنقدم لهم مجموعة كبيرة من الالعاب المسلية والكلمات المتقاطعة واللي مش متقاطعة.
هنروح بيوت الفنانين ونشوفهم بيعملوا ..بيعرفوا يطبخوا ولا زي خيبتها!!
هنعيش مع المشاهير في كل المجالات ونعرف بيعملوا إيه ونسمع حكاياتهم ونوادرهم.
وبنوعدكم انه بعد العيد علي طول يرجع المخفي اللي اسمه النهاردة أجازة ولكن هيرجع بشكل تاني يجنن سواء في إخراجه أو صوره أوحتي اخباره وحكاياته.
عموما احنا لسه قدامنا عددين وبعدها يبدأ رمضان الكريم ومعه الملحق الجديداللي هينسيكوا كل حاجة.
وهتكلوه أكل بدون ماتفطروا وكل سنة وأنتم بألف خير.