الرئيس لأهالي الشهداء: مش هننسي ثأرهم ولا هنسيب المجرمين

السيسى يقدم العزاء لأهالى الشهداء
كلمات بسيطة.. في محنة عظيمة.. كلمات عكست تلاحم القائد والشعب في مواجهة عدو.. يتربص بالجميع.. يريد الشر لوطننا.. يسعي حثيثا لتفرقة أهله شيعا.. لا يجيد إلا لغة الخسة والندالة والدم.. يتحين الفرصة ليوجه ضربة جبانة لأبطال وطننا وحراسه.. كلمات الرئيس عبدالفتاح السيسي لأسر شهداء حادث الفرافرة في الجنازة العسكرية خير دليل علي حزن القائد لألم بعض ابناء وطنه.. فقدوا العزيز لديهم.. وعكس أيضا صدق هؤلاء الاهالي في حبهم لوطنهم الذي تهون دونه دماء ابنائهم الذكية وانتظارهم للثأر والقتلة.. هذا طلبهم.. وهذا وعد الرئيس لهم.. وجه الرئيس كلامه لإحدي الأسر قائلا: شد حيلك.. اطمئن.. وخلي بالكم كلكم واسمعوا اللي ها أقوله أوعوا تفتكروا إنه ده أول وآخر حاجة لا دي معركة كبيرة.. معركة بدلكم أنتم.. المعركة دي بدل المصريين أنا قلت لكم مرة قبل كده.. أمامنا خياران يالناس تموت بعضها أو الجيش يدخل يموت.. اختارنا إيه؟ .. هما ولادكم وولادي.. ولادنا كلنا.. خلي بالكم اللي مات ده واستشهد ده مش ابنك انت بس، ومش أخوك إنت بس.. ده ابننا كلنا ابن كل المصريين وهو راح فين اليوم.. راح عند ربنا اللي ما بيضعش عنده حق.. لكن دول المجرمين اللي موجودين يرهبونا.. لأ مش هانسيبهم.. لأ مش هانسيبهم.. وأنا قلت لكم الكلام ده قبل كده قلت لكم خلي بالكم.. دي أول مرة.. تبقي مصر بتستهدف كده.. أنا عايز اقول لكم علي حاجة تبرد ناركم ونارنا.. أوعو تفتكروا إنكم انتم بس اللي مهمومين وزعلانين لا والله انتم زعلانين وإحنا زعلانين وانتم مهمومين وإحنا مهمومين بصوا حوالين منكم كويس وانتم تعرفوا إيه اللي كان مفروض يتعمل عندنا وربنا نجانا منه.. نجانا بأخوك ونجانا بابنك وهاينجينا بناس تانية.. أنا أعزيكم وأعزي كل مصري بأقول له ده اللي استشهد ده فدانا كلنا وكمان دمه في رقبتنا.. أنا مش بنسي وافتكر انه إنتم كمان مش هاتنسوا وافتكر إن الجيش والشرطة مش هاينسوا ابدا حق.. لاننا احنا عايزين الخير وعايزين الاصلاح.. لا عايزين نخسر ولا عايزين نهد.. عايزين نشوف بلدنا كويس، بلدنا بخير وسلام عايزين الناس تعيش في أمان مش عايزين اكثر من كده إنما هما عايزين إيه بصوا حوالين منكم وانتوا تعرفوا دي أكبر أزمة بتمر مش بمصر بس لأ والله بتمر بالمنطقة كلها بالكامل شوفوا ده كويس.. يعز عليَّ دموعك.. تصدق وتأمن بإيه.. فأجابه أحد الأفراد لا إله الا الله.. فاستطرد الرئيس: ياريتني كنت أنا يا أخي.. فرد مجموعة منهم: كلنا فداك ياريس.. فقال الرئيس: وأنا واقف معاكم كده.. ياريتني كنت انا.. فقال احد أفراد الاسر: أحنا هانبقي مطمئنين لما الكل يدور علي حقه.. عايزين ندور علي حقهم احنا وانتم (موجها كلامه للرئيس والحكومة).. فرد الرئيس دول فدا بلادنا والناس اللي في مصر الغالية.. فيه لجنة مشكلة بتراجع كل حاجة.. فرد عليه مجموعة من ممثلي الاسر: ربنا يخليك وما يحرمناش منك.. فقال الرئيس: لجنة بتراجع كل حاجة عشان تشوف إيه اللي حصل.. وقال أحد أفراد الاسر: أنا خلصت الجيش من 5 سنين ولو عايزين أدخل الجيش والله أخش تاني.