فيديو.. السيسي يتقدم جنازة «شهداء الفرافرة»: دمهم في رقبتنا

تقدم الرئيس عبدالفتاح السيسي، القائد الأعلى للقوات المسلحة، الأحد، الجنازة العسكرية، التي أقيمت بمطار ألماظة ل22 من شهداء القوات المسلحة، الذين سقطوا خلال الهجوم على إحدى نقاط حرس الحدود بالقرب من واحة الفرافرة، السبت.
وقدم السيسي العزاء لأسر الشهداء، قائلًا: «والله يا ريتني كنت أنا».
ورد عدد من أسر الشهداء على السيسي، قائلين: «كلنا فداك يا ريس».
وقال السيسي: «إوعوا تفتكروا إن اللي بيحصل ده هيبقى أول وآخر، لا دي معركة كبيرة».
وأضاف: «كان قدامنا خيارين يا الناس تموّت بعضها، يا الجيش يخش يموت، فاخترنا إيه.. أه هما ولادكم وولادي وولادنا كلنا وخلوا بالكم اللي مات واستشهد مش ابنك أنت بس، ده ابننا كلنا وابن كل المصريين، وراح فدا كل المصريين، وراح عند ربنا اللي مابتضيعش عنده حاجة».
وتابع: «لكن المجرمين مش هنسيهم»، مضيفًا: «دي أول مرة مصر بتستهدف كده، وعايز أقول لكم على حاجة تبرد ناركم ونارنا، إوعى تفتكروا إنكم اللي مهمومين وزعلانين، والله أنتم زعلانين وإحنا زعلانين وأنتم مهمومين وإحنا مهمومين، لكن بصوا حوالين منكم كويس وأنت تعرفوا إيه اللي كان ممكن يتعمل عندنا، وربنا نجانا منه».
ومضى قائلًا: «أنا بعزيكم وبعزي كل مصري وأقول له ده اللي استشهد فدانا كلنا، وكمان دمه في رقبتنا، وأنا مش بنسى وأنتم كمان مش هتنسوا، والجيش والشرطة مش هينسوا لإن إحنا عايزين الخير والإصلاح».
وشدد: «عايزين نشوف بلدنا كويسة، وعايزين الناس تعيش في أمان، إنما هما عايزين إيه، بصوا حوالين منكم وأنتم تعرفوا، ودي أكبر أزمة بتمر بالمنطقة بالكامل».
واختتم: «يعز عليا دموعك يعني، وتصدق وتؤمن بإيه، يا ريتني كنت أنا، والله يا ريتني كنت أنا، ولا أقف قدامكم كده.. وفيه لجنة مشكلة عشان تراجع اللي حصل».
وتعالت أصوات الحاضرين من أسر الشهداء: «كلنا فداك يا ريس، والشهداء هيناموا مرتاحين لما الكل يدور على حقهم».
حضر الجنازة المهندس إبراهيم محلب، رئيس مجلس الوزراء، والفريق أول صدقى صبحي، القائد العام للقوات المسلحة وزير الدفاع والإنتاج الحربي والإمام الأكبر الدكتور أحمد الطيب، شيخ الأزهر، والفريق محمود حجازي، رئيس أركان حرب القوات المسلحة، وقادة الأفرع الرئيسية، واللواء محمد إبراهيم، وزير الداخلية، وعدد من الوزراء والمحافظين وكبار قادة القوات المسلحة والشرطة المدنية وأسر الشهداء.