أكد الفريق أول عبد الفتاح السيسي، وزير الدفاع والإنتاج الحربي، الأحد، في كلمته التي ألقاها في ختام الاحتفال الذي نظمته القوات المسلحة بمناسبة الذكرى الأربعين لحرب أكتوبر، باستاد الدفاع الجوي، إن الشعب المصري لا ينسى من وقف إلى جانبه، كما أنه لا ينسى من وقف ضده. ووجّه «السيسي» التحية للدول العربية المساندة لمصر، وقال: «الشعب المصري شعب أصيل لا يمكن ينسى اللي يقف جنبه وكمان مابينساش اللي بيقف ضده». وأضاف أن الجيش «تحت أمر الشعب»، موضحًا: «لغاية يوم 73 من غير ما حد يقول، كل المستشفيات وكل مستشفيات مصر، كانت الزيارة من كل المصريين بلا حدود، وده يوم من أيام النصر فحد بقى يندهش ليه إحنا بنحبكم، وليه إحنا تحت أمركم لأن أنتم دايما جنبنا ومعانا وكمان قدامنا». وتابع: «فيه ناس كتير تفتكر الجيش ممكن ينكسر، شايفين الهرم اللي قدامكم.. جيش مصر زي الهرم، بس هو هرم عشان معاه شعب مصر»، موجهًا التحية لرجال الجيش والشرطة. وقال: «خلوا بالكم التحدي كان ضخمًا جدًا، وحماية إرادة الناس وحرية اختيارهم كان أمر جلل وعظيم وخطير، والشعب والجيش والشرطة إيد واحدة، وإحنا كمان بنحبكم والله، وعاوز أقول لكم مش عايزين ننسى شهداء مصر، وفي الحرب كان فيه شهداء من إخواتنا العرب، وتحية لشهداء الحرب من مصر والعرب، وتحية لكل المصابين، كل مصابين الحرب الذين أصيبوا في الحرب، تحية لهم جميعًا، وأثنى «السيسي» على آخر أغنية تم تقديمها في الاحتفال، بقوله: «الأغنية الأخيرة اللي أحبابنا قالوها عن العروبة والعرب بتستدعي حاجات جميلة جدا جدا، يارب اليوم ده يسمع منا ويجمع بينا بين كل العرب». وتابع: «اسمحوا لي بالمناسبة دي أجدد التحية والتقدير والشكر لكل الأشقاء العرب اللي وقفوا جنب مصر، وعاوز أقول لهم أن الشعب المصري شعب أصيل لا يمكن ينسى اللي يقف جنبه وكمان مابينساش اللي بيقف ضده، وخلي بالكم لا بينسى اللي بيقف جنبه ولا بينسى اللي بيقف ضده، وإذا كانت مصر هتبقى قد الدنيا فاعملوا حساب لليوم ده، إوعوا تكونوا مش مصدقين إن مصر مش هاتبقى قد الدنيا، لا هتبقى الدنيا، وبكرة تشوفوا والصغير منكم يفتكر الكلام ده عني». وأضاف: «نحن مسؤولين أمام الله وأمامكم يا مصريين وهنكمل التفويض ونقول كمان يا عرب عنكم جميعا، نحن بفضل الله سبحانه وتعالى سنحمي مصر والمصريين وإرادة المصريين.. ده عهد زي ما أنتم أمرتم وفوضتم، وإحنا حريصين على هذا الأمر». وطالب «السيسي» المصريين بالنضال في العمل، موضحًا: «أنا ليا طلب عند المصريين، صحيح عايز أقول لكم إن مصر مستنية منكم وعايزة منكم النضال في العمل والصبر والإخلاص، وما تكسروش بخاطر مصر، من فضلكم نشتغل ونصبر ونتحمل، وإوعوا تفتكروا إن قد الدنيا من غير ثمن، لكن فيه ثمن لازم ندفعه، مصر مستنية مننا كلنا إننا نخلي بالنا منها كلنا ونكبرها ونحافظ عليها». واختتم كلمته بشكر المصريين موجهًا لهم التهنئة بمناسبة مرور 40 عامًا على ذكرى «نصر أكتوبر».
