طريق النور

وتحية للستات

الدنيا دوارة يا صاحبي.. والصفر في حياتنا هو الشيء المهم وأول وآخر القول.. والثورة خلتنا مهاويس سياسة وخبرا وعلما بنفتي في كل حاجة وأي حاجة ونزيد ونعيد ونقول.. لحد ما صبحت طبقنا المفضل بعد طبق الفول.. نأكل سياسة بالليل والصبح نرغي بصوت عالي والنهيق موصول.. إعلام »أونطة« بيطبل ويزمر ويلعب في دماغنا عمال علي بطال.. الكل يقوم مسطول.
يا نقول »نعم« يا تصبح م»الغنم« وتستاهل ضرب »الجزم« علشان مش بتسمع الكلام ولا عارف مصلحتك ولا أنت من أصحاب العقول.. والساقية ياما بتدور واحنا دايرين معاها زي لمؤاخذة العجول.. ويفضل الصفر في حياتنا هو الهمزة والفاصلة والضمة والفاتحة نقراها علي كل راجل فينا كان كل همه يتكلم في الرياضة زمان وكل شيء أهبل عبيط إلا الكلام في السياسة اللي كانت بتسبب »أرتكاريا.. وهرش وأكلان« وبتجيب الهم والغم وصداع مزمن يمسك في الدماغ ويكلبش في الايدين والرجول.
الكل نزل وشارك.. وهني وبارك.. ونسبة نجاح أعلي من المأمول.. يارب بس نلقي القبول.. والعجلة تمشي والغلبان يغير حياته وينسي طبق الفول.. ويا كل فراخ وحمام ولحمة حمرا ويحلي »بجاتوه وسالزون« ويشرب عصير »فريش« ويحبس بشيشة تفاحة وحبتين ترامادول.. علشان يعدل الطاسة ويعمر مزاجه بدل ما كان ماشي بضهره وداير في ساقية يغزل في أحزان ويعد أيامه بالعرض وبالطول.. ويحسب ويجمع في مصاريف علاجه وعلاج عياله ودروس خصوصية وأكلة »ترم« البدن اللي كلت وشربت عليه الدنيا وما خلت فيه اللي وصبح معلول.
ياتري حلمك ح تحقق يا عم عبدالرسول بعدما قلت نعم ونزلت وشاركت وطبلت وهللت ورقصت علي دقة الطبول.. أنا عارف انك تعبت والثورة خلت حياتك مرار وشفت أيام »زفت« تلات سنين دلوقت والقول هو القول.. ضرب واهانة وعشت.. وأكوام زبالة وشفت.. وضربة جوية وحت.. شالت ما خلت حد.. وكل ساعة في حال.. والساعة ماشية من غير عقارب لكن لسه فيها بندول.. أما عقارب »الأنس« يارب ياساتر بتتحول كل ثانية مع أي كبير مسئول.. ومادام مصالحك ماشية والدنيا ماشية ايه راح يهمك لما تغير كلامك هو الكلام بفلوس ولا عليه »جمرك« قول ياعم وقول.
ياعم ماتخفشي.. ستات بلدنا عرفوا الطريق وقالوا نعم علي طول.. وعبروا عن رأيهم واختاروا »الراجل« اللي بيعرف يوزن كلامه وبيعرف في الأصول.. فلتحيا ستات بلدنا.. وتحيا الملوخية والبامية والمحشي وطبق الفول.