مؤامرة

خطة ومدبرة كل كام يوم مجزرة مين اللي بيخطط يامصر علشان يدمر أي نصر.
علشان يدمر كل شيء حلو وجميل
مين اللي باعك واللي خانك أنت ونهر النيل
مين اللي مش عايز لنا سكك ميسرة
مؤامرة
مين اللي كارهك
واللي خلي كل شعبك
حزمة قصب في معصرة
مؤامرة
مين اللي نصبوا علينا
وشبعونا بالوعود والمنظرة
بيضة ومقشرة
فاكرينها ليهم وحدهم
مش أمنا لأ أمهم
يارب قبر يضمهم
نظير ما دقنا سمهم
ودمرونا ورجعونا
كام سنة تاني لورا
مؤامرة
دول مش كلاب
لأ دول قطط
ناكرين جميلك يابلد
نازلين خطط
هي إيه ح تدوم لهم
ما كفاية تخريب كام سنة
لوكان حاكمنا فرد صالح
كان شعبنا داق الهنا
مانتش فقيرة يابلد
فيك القناة فيها الملاحة
فيك الزراعة والصناعة
ورغم ده بنقول مجاعة
الخير ف أرضك وزيادة
ولاده يامصر ولاده
علشان كدة العدا منكاده
مين بيتآمر عليك ياسفينة
إحنا راكبينك ورغم تعبك دايرة بينا
بس ياخسارة اللي بيدمر منا فينا
علشان رغيف العيش حفينا
مش صدفة كل اللي حصل
ولا صدفة تتفتح سجون
ولا صدفة دم أخوك يهون
مش صدفة تتلون وشوش
يندسوا وسط شباب بريء
لا يعرفوا عدو من صديق
وفجأة تتحول وحوش
يدمروا ويخربوا
وعلي الشاشات تلاقي في وجوههم رتوش
قال إيه ياناس متضررة
مؤامرة
م اللي مش حاسين بأم
قاعدة تندب ابنها ومتحسرة
م اللي ذهلوا من شبابك في يناير
م اللي كانوا قبل ثورتهم ديابة
ولففوهم ع السجون كعب داير
م اللي دفنوا ف قلبهم كل الضماير
وسابوا ناسك فكرهم تايه وحاير
مؤامرة
في المحلة في بورسعيد في القاهرة
مش مجرد ماتش كورة
يبقي فيه سبعين شهيد
دمهم زي النافورة
مش عندنا الفوضي تكون مش عندنا
إقرأوا كتابنا وشوفوا مين نبينا
أرضنا أرض السلام والأمان
مصرنا رمانة الميزان
جندنا مالوش مثيل
في الشجاعة والشهامة والرجولة
قالها هتلر وقبله قالها نبينا
وفي أرضنا درر مجهولة
علماؤنا طاقة مهولة
يشهد لها العالم بجد
كان خط برليف أقوي سد
وعدناه
عرف العدو إننا مش أي حد
والكون دري باللي جري
مؤامرة
كل النظام اللي فسد
جمعوهم أجمعين في ليمان طرة
ياكلوا من كنتاكي
ويلعبوا طاولة وكرة
ويقزقزوا فشار أو دره
فرقوهم بعد إيه
ماكانش يحصل بدري ليه؟
فين العقول النيرة
مؤامرة
كل ما تهدا البلاد
كل ما يزيد العناد
أتباعهم الأحرار
سبب الفساد
والفلوس أحسن سلاح
يقبضوا شوية ولاد
مسجلين خطر علي بلطجية
أطفال شوارع أرزقية
أما شرطتنا الهفية
بعد ثورتنا العفية
لانافعة زينب ولا لوزة
تقدر تقول مالهاش عوزة
حتي جيشنا رغم إعزازنا الكبير
ورغم أن الدور خطير
يشوبه جزء من التقصير
مين اللي قتل الشهداء؟
مين اللي نهب الدولة؟
مين اللي دمر منشآتها؟
معروف بالصوت والصورة
مش محتاجين للتذكرة
مؤامرة
إسرائيل والأمريكان
ليهم ديول في وسطنا
ومنا فينا م الفلول
م اللي أخدوا ع اللحوم والاستاكوزا
وأكلونا يوماتي فول
وسهل جدا
يعود لناتاني الأمان
ونلم دول
الفلول والبلطجية
وأي واحد ليه أجندة خارجية
وبلاش نأجل في المحاكمة
الجريمة واضحة جدا
ع اللي دمرونا ورجعونا
كام سنة تاني لورا
مؤامرة
قصيدة‏:‏ للشاعر جمعة أبوالنيل


إضافة تعليق

البيانات مطلوبة

اسمك
*


بريد الالكترونى *
البريد الالكتروني غير صحيح

عنوان التعليق *


تعليق
*