قصيدة‏:‏علي الهامش

منيش إنسان علي الهامش أنا عايش بفكك روحي وأغزلها بميت رسمة
وميت قسمة بقسمها وأنا فاضي
أنا راضي أكون إنسان
بميت معني
بإيدي
ألم عيالي وأحبسهم ف نني العين
تجلجل عيني بالموال
أقول الله كمان زيدي
يفور الدم ف وريدي
أقول للنسمة مش جايلك
أنا عايزك هنا تجيني
أنا واحد تلف الدنيا لفتها
وأنا باقي علي حالي
أفوت ف الزحمة
والعتبات تناديلي
ف منديلي
بخضر أرضي وأرويها
أناديها تناديلي
بلهفة شوق وحنية
ف أرضي ساكنة جنية
بقالها سنين مصحباني
ف عز العتمة تلقاني
بغنيلها مواويلي
يطول ليلي علي طوله
ومعشقهوش
أنا مرووش
بخض الليل بتنهيدي
أنا سيدي
وتاج راسي
حنين القلب للمجهول
أنا مش غول
ولا قاطع طريق أرعن
أنا اللي حفرت ف السكة
عيون ميه
أنا غية
بيشغيها الحمام زاجل
أنا عاجل ومش آجل
أنا اللي فتحت ع الجبهة
طريق مرصوف
أنا الموصوف
لكل جبان بيستقوي
ومين أقوي
من اللي هواه وكيف كيفه
يموت لجل النسيم يحيا
تطل الشمس من ناحية
ومن ناحية القمر طالع
لهيب والع
ف قلب حبيب لمحبوبته
طوفان العشق لو يعلي
تهون الدنيا ف عنينا
وبإيدينا
نخططها ونزرعها
ولا نعلم
مين اللي هاييجي يجنيها
ف كام جيهه
ياخدني حنيني للمرسي
يدوب هنسي
حكاية كنت بحكيها
تموت الناس ولا يبقي
غير اللي بإيده
بيعافر
عشان يحيا
شعبان عبدالعزيز
جهينة فاقوس شرقية


إضافة تعليق

البيانات مطلوبة

اسمك
*


بريد الالكترونى *
البريد الالكتروني غير صحيح

عنوان التعليق *


تعليق
*