علق أحمد حسام « ميدو » المدير الفني السابق بنادي الزمالك على ارتفاع عقود لاعبي كرة القدم المبالغة، مطالبًا في الوقت نفسه برفع أجور العاملين ب القطاع الصحي والتعليمي، وذلك على خلفية الأزمة التي تضرب العالم من انتشار فيروس كورونا المستجد، والذي يتصدى له القطاع الطبي في كل دول العالم. ونشر « ميدو » على حسابه الرسمي على موقع التواصل الاجتماعي «تويتر»: «أكثر حاجة لازم الدولة تتعلمها أن لازم يحصل تعديل في الموازنة العامة، لازم الصحة والتعليم يتخصص لهم نسبة أكبر بكتير، لازم يتم تخفيض عدد الموظفين الحكوميين، لازم الفلوس اللي بتتصرف على الكورة والإعلام والفن يتم تخفيضها بشكل كبير!! لازم يتعمل سقف مرتبات للاعبين والمدربين والإعلاميين!». وقال: «ماينفعش العاملين ب القطاع الصحي والقطاع التعليمي يبقوا بيعانوا واللاعبين والمدربين والإعلاميين والفنانين بيتقاضوا مئات أضعافهم، وهنا الموضوع مش موضوع أرزاق، الموضوع موضوع عدل!!، لازم يبقى في نسبة وتناسب، لازم نستغل الظروف اللي بنمر بيها وحاجات كتيره تتعدل!!». وأضاف: «مثلا ماينفعش لاعيب أو مدرب في الدوري المصري المتواضع جدًا فنيًا يكون دخله مئات أضعاف العاملين في القطاع الصحي والقطاع التعليمي بالذات، أه لاعيب الكورة والمدرب لازم يتم تقديره بشكل جيد لأنها موهبة ومهنة صعبة جدًا، لكن الفروق لازم ماتكونش بعيدة أوي كده!!». وتابع: «مثلا زوج أختي دكتور مخ وأعصاب في مستشفى كبيرة جدًا، وعندما علمت عن دخله السنوي صعقت!! إزاي واحد درس سبع سنين طب موت نفسه فيهم وبيشتغل أقل حاجه 16 ساعة في اليوم يكون ده دخله!! على فكرة ده الوضع في العالم كله مش في مصر بس، في رأيي إن كل ده لازم يتغير!!». واختتم: «لازم الوزير أشرف صبحي والأستاذ عمرو الجنايني يشتغلوا أه مفيش عقد لأي لاعب أو مدرب يتم اعتماده إلا بسقف معين يزيد كل 3 سنوات السقف ده 15%، الأندية المصرية كلها بلا استثناء بتخسر ملايين.. وأيه العائد؟ مفيش أي عائد!! دوري تعبان من غير جمهور بيفرز 2 أو 3 لاعيبة مميزين كل موسم!!». تدوينات أحمد حسام « ميدو »