تضامنًا مع شهداء أحداث ماسبيرو.. نشطاء يكتبون وصيتهم على "تويتر" احتجاجًا على "العسكرى"

بعد مرور أسبوع على أحداث ماسبيرو، وتضامنًا مع الشهداء، واحتجاجًا على ما اعتبروه استخدامًا للعنف المفرط فى التعامل مع التظاهرات السلمية، ابتكر نشطاء مصريون على موقع تويتر للتواصل الاجتماعى حملة احتجاجية جديدة قرروا فيها الاحتجاج من خلال كتابة وصيتهم.
تأتى تلك الدعوة التى أطلقها أحد النشطاء وسرعان ما انتشرت بشدة عبر الموقع فى محاولة للاقتداء بالشهيد مينا دانيال الذى أوصى أصدقاءه منذ بدء الثورة بأن تشيع جنازته من ميدان التحرير، وبالفعل عندما استشهد مينا فى أحداث ماسبيرو الأحد الماضي شيعت جنازته من الميدان .
ودشن النشطاء تلك الدعوة على موقع تويتر تحت شعار "شهداء تحت الطلب ..دون وصيتك ضد العسكر"، وأعلنوا أن الدعوة مفتوحة لكتابة الوصايا اليوم وغدًا وكتبوا على حائطها "دعوة لتدوين وصايانا كما فعل الشهيد مينا دانيا حين أوصى بأن تخرج جنازته من ميدان التحرير.. أصبح الموت وشيكًا وكلنا مستعدون للموت فداء لمصر...اجعلوها إعلانًا واضحًا صريحًا عن رفضنا آلات القمع العسكرية، ليس فقط المدرعات والبنادق، بل أيضا أدواته الإعلامية الخائنة.. اكتبوا واكتبوا.. ليرى العالم كيف تكون وصية شهداء تحت الطلب...الدعوة مفتوحة للتدوين يومي 16 و17 أكتوبر".
وتركزت معظم وصايا النشطاء حول التبرع بأعضائهم بعد الوفاة لخدمة البحث العلمى أو للمرضي كما شددوا على ضرورة إكمال الثورة ومعاقبة المسئول عن استشهادهم حتى لايضيع دمهم هباء وبالطبع احتلت مصر مكان القلب من معظم الوصايا، كما أعرب معظمهم عن رغبته فى خروج جنازته من ميدان التحرير بينما فضل البعض أن يدفن فيه، كما صبت بعض الوصايا كثير من الغضب على مبنى ماسبيرو و من أبرز الوصايا التى كتبها النشطاء على تويتر :
- أوصيكم بالمجلس شرا وبمصر خيرا وبشعبها رفقا.. وأن أدفن في مدفن جماعي لمسلمين ومسيحيين ويكتب عليه "هكذا أحبوا مصر" وانتم ؟؟!
- "خدوا بالكوا من البلد دي عشان مش هسامح اللي يفرط فى حقها "
"وصيتى أن تستخدم أعضاء جسدى للأبحاث أو تبرعوا بها كلها لمن يحتاجها من المرضي"
- " لا تثقوا فى العسكر ولا تنتظروا من الإخوان خيرا وإياكم والتفريط فى ميدان التحرير لأنه الضمان الوحيد لنجاح الثورة"
- "ادفنونى فى صينية ميدان التحرير"
- "وصيتى: متزعلوش عليا وكونوا مبسوطين دايما علشان تقدروا تكملوا، و متبرعه بعيونى لمصابي الثورة وهما هايشوفو بكرة بالنيابة عنى"
" لو استشهدت قولوا للأجيال الجاية إن فى ناس ماتت عشان البلد دة تكون أحسن بلا عسكر بلا فاسدين بلا ظلم دولة عدل وحرية"
- "عايز جنازتي تلف ميدان التحريروتحديدا قدام المتحف المصري لأني كنت هاموت هناك وقت معركةالجمل, وعلم مصريتربط على قبري".
- "ولادي يعرفوا الحقيقة و يعرفوا قيمة اللي بنعمله وتكملوا بعدي عشان يعيشوا كويس في مصر اللي بنتمناها "
- "ماتنشروش صورى عالفيس وتحطو اسمى علشان والدتى ماتعيطتش كل ماتشوفنى واكتبوا على قبرى راح لدولة العدالة والحرية والكرامة والرحمة"
- "وصيتي ما تطاوعش اللي يستخدم كلام الدين عشان نرضى بقهر أو ظلم ولا تخاف من الفتنة طالما عندك يقين إنك هتموت مرة واحدة يبقى ارضى ربك .. اهدموا كل الأصنام وما تعبدوش وثن .. ما قصدش تكسروا التماثيل اللي في الشارع.. اقصد تكسروا التماثيل اللي في القلوب"
" لو مت شهيد ماحدش يذكر اسمي أبدا من ضمن الشهداء أو يكرمني أو يعطي أهلي تعويضا , بس حد يعرف ابني يعني إيه أبوه مات عشان وطنه".
- "لو مت مدهوسة متنسوش طارى والنبي وفى 200 جنيه فى درج الكوميدينو دول بقى جيبوا بيهم أيس كريم لكل "الفولورز" بتوعى عشان كانوا ناس جدعة و وقفوا جنب الواحد بصراحة "
- "جنازتى تطلع من التحرير وأدفن ف أى حتة إلا البلد عندنا أنا بكره قرايبى استحالة أتدفن معاهم وابقوا شيلوا السلاسل والحظاظات من إيدى مش هينفع ادفن بيهم"
"الجنازة و هي ماشية تلف علي كل الأقسام و تولعوا شماريخ ع روحي وتغنوا طول الجنازة مش ناسيين التحرير وابقي متكفن بعلم الزمالك"
- "لابتوبي نزلوا عليه لعب كتير و إدوه لبابا عشان يتسلى وينسانى قدر المستطاع"
"يدفن جمبى القذافى وتوفيق عكاشة ومرتضى منصور وعمرو مصطفى .. هافضل صاحي لحد يوم القيامة ومش هبطل ضحك".