سوزان مبارك رئيسة فريق الباليه المائى

شهدت صفحة حركة شباب‏6‏ ابريل علي موقع الفيس بوك جدلا ساخرا حول قصاصة صحفية منشورة في مجلة الجيل التي كانت تصدرفي خمسينات القرن الماضي‏ لباب صحفي عنوانه تذكر هذا الاسم يتضمن صورة لسوزان ثابت قرينة الرئيس السابق حسني مبارك في عمر ال‏15‏ عاما‏. , . ومعلومات عامة عنها كطالبة في مدرسة سانت كلير ورئيسة لفريق رقص البالية المائي وتهوي السباحة والقصص البوليسية وتتمني العمل كمضيفة جوية.
وسخرت تعليقات كثيرة مماجاء بهذه القصاصة قائلين: تهوي قراءه القصص البوليسية.. لذلك حولك مصر بالكامل لدولة بوليسية, الرقص علي مقدرات الشعب, يعني كانت بتقف علي صوابع رجلها.. وعرفت توقف الشعب كله علي دماغه.. ونعم التربيه, كانت أكبر أمانيها أن تعمل مضيفة جوية؟.. وجوزها كانت أكبر أمانيه أن يكون سفيرا.... سبحان الله, يعز من يشاء و يذل من يشاء, حمدا لله و شكرا لفضله انه استجاب لدعوة المظلومين و أذلهما حتي يعلم الناس أن الله هو العلي القادر, احمد يعز يعزف درامز ويعيني آل مبارك يصفقون ولو خرج عن السلم الموسيقي سرور يفصله والباقي يلم النقطة, ههههه والله هو كان كبيرها فعلا رئيسة فرقة الباليه.
وتستمر التعليقات الساخرة: لا وبيقولك تهوي الروايات البوليسية لا يا عم الحاج دي ألفت مجلدات في امن الدولة وبوش كان بيبعتلها المساجين بتاع جوانتانمو عشان تعذبهم, ان شاء الله هتكون في فرقه سجن القناطر للباليه, هههه مكتوب أمنيتها تكون مضيفة جوية وعشان كده وقعت الطيار وإتجوزته, بتحب القصص البوليسية واظن انتو متاكدين من كده بقالهم30 سنه بيلعبو معانا شعب و حراميه.
لكن الغريب أن عددا كبيرا من قراء صفحة حركة شباب6 ابريل رفض السخرية من هذا الموضوع واعبره أمرا شخصيا لا يجوز الخوض فيه, وكتب هؤلاء: نقفل يا جماعة الموضوع ده بقي ونركز في اللي جاي.. والله انا مش بحبها خالص لكن مش هي دي الطريقه اللي نأخذ حقنا منهم بيها احنا أكبر وأحسن من كده, نحن مسلمون لانخوض في اعراض المسلمات حتي لوكانت سوزان مبارك.. حسابهم عند ربنا, للأسف ان الجريمة الكبري لحسني مبارك هو تجريف عقول الشباب وتحويلهم الي مسوخ تعاني من انحطاط فكري واخلاقي وهو ما يظهر جليا في هذه التعليقات فهناك من قارن بين الراقصة وراقصة الباليه للاسف قمة في التفاهة وانعدام العقل, مع احترامي لكل التعليقات بس أنا مش نفسي نبقي كده صحيح هما خربوا مصر بس احنا لسه بنتعلم الديمقراطيه ملناش دعوه بحياتهم الشخصيه عشان احنا لو قسنا ده مثلا بالصور بتاعت بنت البرادعي ده اكيد ارحم انا بقول ان احنا ملناش دعوة بالحياة الشخصية لكل واحد لانه حر فيها ياريت تفهموني.