جنيَّة ولا ملاك؟

شفت العيال لما بتجرى ناحية آخر الشارع و الشمس نازلة هناك ف قلب النيل و ضِلُّهم فرحان وراهم أكتر منهم أنا كنت مرة زيهم لكن اتكعبلت هما كملوا و أنا خدت جنب و ف عز نقحة شمس يوليو بردت
لإنى كنت خايف منى و م اللى جاى
و زعلت جدا إنى ..
مش عارف أمشى إزاى
قعدت أعيد ف الفكر و اتفلسفت
و غوتنى جنيِّة كتب
شعورها مجدولة بحروف
ننى عيونها
نقطة ال «ن» الفريدة
و جسمها كوفى
و خيالها لما تبوح
بيخدَّر الجروح
و ينَسِّى روحى منظر العيال و هما
سايبيننى وحدى و المسافة..
بتتِّسع
خدتنى جنيِّة كتب
و دخلتنى جوَّه ناس
زيى برضو اتكعبلوا
واتأملوا الأحداث
كتبوا قصايد طبطبة
ع القلوب الطيبة
و حكايات
م الدموع و الضحكايات
تكحت من القلب الصدا
جنيَّه دى ولا ملاك
يا أيها الساكنين هناك
قَبلى و عارفينها قوى ؟!
الجن ما يخليش كسيح
يلاقى رجليه من جديد
و يجرى تانى ف الشوارع
و المزارع
و الزمان
يطوف بعينه ف اللى جى و ف اللى كان
و ف لحظة يشعر إنه جايز
واحد من الشلَّة القديمة
اللى طلعت تجرى ناسية وحدته....