فردة حلق

سرير وسيجارة وحبة ورق
و دوشة عيال الجيران
و مخدة ناخت م العرق
و قصيدة بطعم الحياة
ياما سببت لى الأرق
تبغ بقال حارتنا
اللى اتحرق
لجل القصايد
ضحكة أخويا فى صدر أمى
غيرتى على حبة حنان
من صدر أمى اتسرق
و أنا بكتب قصيدة للحياة
ياه!!
دا أنا كنت باكتب للحياة
و أيدى ع القلم
و القلم زى الزناد
و الرصاص اللى كاتب قصايد
للبنات
ولصوت الحوارى
لكورة شراب
عاشقة الحياة
بين رجلين الولاد
و أيدى ع الزناد
رافضة تخالف ضميرها
رافضة تغتال الحياة
جوة الحقايق
ياه !!
أتارينى كنت بابحث عن حياة
بين البشر
صعبة المساءل كرهتنى فى الجبرتى
وجابر وبن سينا
فسروا كل الأسئلة
إلا سؤالى فى البشر
قلوبهم مش قلوب القصايد
مش ناعمة زى ضى المغربية
مفيهاش أمان
زى صوت الشيخ أمين
بيعلى الأدان
ياه !!
صعب الكلام
صعبة الحياة
فى قصيدة متردش ع الناس السلام
قصيدة بتدارى دموعها
لجل تبقى حلوة فى عيون المعجبين
قصيدة ما تحسش بالشقيانين
اللى عاشوا واللى ماتوا
و اللى لسة مدين الإدين
على أرصفة الإمام
و سيدنا الحسين
ملعونة يا غناوى القصايد
ملعونة أسامى الحريم
اللى خلت شوقى قايد
ونستنى قلب أمى اللى اتحرق
على ضناها اللى سافر فى القصايد واتسرق
و هو بيكتب للحياة
على ضهر الورق
ياه !!
كنت فاكر إنى قادر
أرسم حياة
بلون البنفسج
وريحة نيل بيسلم على المدن
وبيستبارك من ندر اليتامى
على باب الجوامع
مدود قمح الخواجة
ريحته فايحه من الصوامع
زى ريحة عيال الشوارع
اللى رافضة الغناوى
رافضة كل اللى بيوعدوهم
بالحياة
أسف واعذرونى ع الغباء
و التوتر والقلق
أسف لو كنت حطلع م الخلق
دا أنا أمى ماتت وكانت
بتتمنى فردة حلق
حلم أمى مستواش
و لا عمرى نسيت سؤالها كل ليلة
يا واد جبت الحلق
و اضحك وأقول
هى إمتى يدى طالت؟
نخل البلح
هو إمتى ياما؟
شاعر فلح
و جاب الضى ويا الأدان
و فرح والدته
بفردة حلق
عشانه خرمنا الودان