قصيدتان

عَمَلْت نايم عَمَلْت نايم وقلت استنى لما تجينى ف الحلم كالعادة علشان نلعب سواونحط همومنا على بعضيها ونطيّرها ف السما واحنا باصّين عليها وبنضحك
هيه ضعيفة قد ايه
واحنا ازاى لما بنضحك
ولا يقدر علينا أى وجع
ولا أى طريق مسدود
يمشينا عكس اللى احنا رايحين له.
عَمَلْت نايم واستنيتها كتير تيجي
ولما اتأخرت بعتّ لها روحى المدرسة
لقيتها ف حصة العلوم
فاتحة الكتاب- واللى جواه صورتي-
ولما دق الجرس
روّحنا مع بعض ..
هيّه حاضنة كتاب العلوم
وانا حاضن هواها اللى بيرسم جناين
ومطيّر القصّه
هيّه سابت شنطتها ع الترابيزة
وجَرْى على سريرها
وانا واقف بتفرّج عليها ..
عَمَلِت نايمه وفضلت مستنيّه
لما اجيلها ف الحلم
علشان نلعب سوا



مش جميلة
بتفرح..
لما حد يعاكسها ف الشارع
ويقولها يا غزال
تعمل مش واخدة بالها خالص
ورجليها تخبط فى بعض
وتنادى على باب البيت يقرب
ويقطف تفاح وشها الفاير..
من كلمتين حلوين
خلوها تدخل عل سريرها من غير غدا
وتحلم بحد ماسك ايديها ع الكورنيش
فى عز الشتا.. وبياكلوا (آيس كريم)
وبطاطا
وجميلة كانت زمان..
موقفة الشارع على رجل
وقليل لو حد يستحمل نظرتين منها
وما يبقاش مطرب عاطفي!
معقولة دي..
كام شعرة بيضا وسنة واقعة
وعيلين صغيرين
متشعبطين فى اديها زى العمارات العالية
اللى كاتمة على نفسنا من كل ناحية
خلوا الربيع يعجز قبل الأوان
وجميلة..
تبقى مش جميلة خااااااااالص ؟!