قصيدة لم تنشر للشاعر الكبير الأبنودى

نجوم من مصر .. فاتن حمامة

أديتى للفن قيمته.. ساهمتى فى رفعته ولاهمك العابثين م اللى سبب نكبته لكل انسان يا فاتن.. فكرته.. وسكته
واخترتى انتى الطريق الصعب وصمدتي
ولا فى طريق الأسواق المغرية.. بعتي
م البدء راسمة الهدف واضح وصممتي
بلغتى عالى القمم.. على الصخور سرتي
لما قلتى آه.. كنتى أم الصابرين انتي
بقيتى نور كل شاشة.. وغيرك اتشتتوا !!
------------------
الفن كان قبل منا وبرضه هيكون بعد
بس المهم اللى أخلص له وعينيه.. ع الغد
والغد اهو جه يا فاتن واحنا اهه على الوعد
نكتب كلامنا البسيط محبة وتحية
يا رمز للفنانين اللى خدوها.. بجد
------------------
كنتى أما تبكى بنبكى تئني... كنّا نئن
ولما تبتسمى كان القلب مفتوح لك
ممكن عشان كنّا لسه عيال صغار السن
لكن كبرنا ولسه قلوبنا.. بتروح لك
------------------
وكنتى صادقة يا فاتن... صدق ماهوش سهل
وقريبة منا كأنك واحنا عيلة... وأهل
انتى اللى متخصصة فى لعبة الاتقان
يعشقها طفل.. ويعشقها الشباب.. والكهل
------------------
زى الحمامات تطير فاتن حمامة.. تهم
تطلع سلالم علاها.. فيلم بعد فيلم
منين تجيب وقت تاكل.. وقت تخرج.. وقت
بعد السنين ما انطوت ورا مرور الوقت
سنين ماحدش قدر يقطع عليكى الحلم !!
------------------
وإزاى قطعتى الطريق... بكل جدية
من يوم سعيد فى الطفولة لآخر الأحلام
بمثيلك انتى تظل القمة... مصرية
فى الفن دائما... ومهما طالت الأعوام
يا فاتنة الفن يا مصرية الطابع
انتى القمر عالى نور فننا السابع
رحلة مجيدة وأمجادك... بتتابع
وانتى تاريخك يشرف الف فى الميه
(فاتن حمامة) كفاية الاسم فى الأفلام !!