أغانى الأطفال الشعبية فى موسوعة مصرية

أصدرت الهيئة المصرية العامة للكتاب في مشروع مكتبة الأسرة سلسلة تراث "الموسوعة المصرية لأغنيات الطفل.. الشعر الشعبي"، إعداد وتصنيف مسعود شومان، رسوم وإخراج محمد بغدادي، إشراف د.أحمد مجاهد.
ويؤكد شومان فى مقدمته أن فكرة هذه الموسوعة بدأت منذ ما يربو على عشرين عاماً، ولم يكن الجمع الميدانى قد تجاوز تسع محافظات، لكنه وصل الآن إلى عشرين محافظة، شارك فيه نحبة من الأدباء والباحثين، مشددا على أن هذا العمل لا ينسب لفرد وإنما ينسب لأمة، وأنها خطوة أولى تسعى إلى جمع وتوثيق وتصنيف الأشعار التى كُتبت أو أُنشدت أو رويت للطفل فى مراحل عمره المختلفة.
ولا تقتصر الموسوعة على نوع من الشعر بعينه، وإنما تقدم الإبداع الشعرى المصرى الذى أُبدع على مستوى الأفراد أو الجماعة الشعبية مواكباً لدورة الحياة؛ لذا تأتى الموسوعة لتقدم فى البداية فى ثلاثة أجزاء، هى: "الشعر الشعبى (أى التراث الفلكلورى فى هذا المجال) – شعر الفصحى الموجه للطفل– شعر العامية (فى نفس المجال)", وهى بهذه الأجزاء تفتح باباً لأجزاء متسعة لتضم شعراء ونصوصا أخرى.
ويشير المصنف إلى أنه اتبع فى جمع الأغنية الشعبية –موضوع الجزء الذى نتناوله اليوم- طريقتين متزامنتين، هما الجمع الميدانى عن طريق الاستعانة بما تم جمعه من مادة فلكلورية قام بها عدد من باحثى الفولكلور والأدباء المهتمين بالتراث والمأثور الشعبى، والجمع المكتبى: وذلك بالاستعانة ببعض المؤلفات التى تضم بعضا من أغانى الأطفال الشعبية، لتتواشج الطريقتان فى تقديم هذا الميراث من الأغانى الشعبية.
وتصنف الموسوعة المادة المؤلفة تصنيفا موضوعيا حسب ترتيب الموجودات الكونية, بدءا من الطبيعة بموجوداتها مروراً بالإنسان فالحيوان والطيور والحشرات والنبات، وصولاً إلى الأشياء الجامدة.
أما بالنسبة لتصنيف الأغنية الشعبية وأنواعها، فقد كان التصنيف طبقا لدورة حياة الطفل.
وينقسم هذا الجزء الخاص بالأغنية الشعبية من الموسوعة إلى قسمين: الأول أغانٍ تُغنى للطفل، والثانى: أغانٍ يغنيها الطفل، ونقدم فى هذا العرض نماذج من القسمين.
أولا: أغانى تُغنى للطفل
أغانى الميلاد
لما قالوا لى عروسة
لما قالوا لى عروسة
قلت الحبيبة المدسوسة
ادُّو المبشر جاموسة
إدو له حلة بغطاها
واربع معالق منقوشة
(المدسوسة: أى التى كانت فى بطن أمها)
انشد ضهرى وانسند
لمَّا قالوا ده ولد
انشد ضهرى وانسند
وجابو لى البيض مقشر
وعليه سمن البلد

أغانى السبوع
حلقاتك برجالاتك
يارب ياربنا
تكبر وتبقى قدنا
حلقاتك برجالاتك
يوم ورا يوم تكبر شنباتك
تتجوز على قد حالاتك
حلقاتك برجالاتك

أغانى التهنين والهدهدة
نام.. نام
نام.. نام
وندبح لك جوز الحمام
باضحك عليك يا حمام
بس الولد ينام
سوسة
سوسة سوسة سوسة
سوسة.. واللى يسقَّف
سوسة.. بابا يكسيه
سوسة يا توب حرير
سوسة يتمخطر بيه


أغانى الختان
قيدى الشمع
يا ام المطاهر
رشى الملح سبع مرات
يا ام المطاهر
قيدى الشمع سبع شمعات
يا ام المطاهر
زفى المطاهر
سبع زفات

أغانى الفطام
يا بابا تعالى
يا بابا تعالى بجيوبك ملانة
حمص ولوز وكعك الفطامة
يا بابا تعالى بجيوبك ملانة
بندق وفسدق ولبان السلامة

أغانى الرُقى
أبو الريش
أبو الريش
ان شالله تعيش
وتكبر لامَّك
وتبقى عريس
***
أبو الريش
ان شالله تعيش
وان عشت لبُكرة
هتبقى عريس

أغانى تعليم الطفل
كدا تطير العصافير
كدا تطير العصافير
كدا ننام أمامير
كدا نغسل مناديل
كدا نقف للشاطرين
شوفوا ماما جابت لى إيه
نونو صغير يا اختى عليه

أغانى الباعة
حلوة ولذيذة
هات البريزة يا وله
هات البريزة
أصل الحلاوة يا وله
حلوة ولذيذة
ثانيا: أغان يغنيها للطفل
وقد قسَّم المصنف هذا القسم إلى ثلاثة أقسام، هى: أغانٍ عامة – أغانى المناسبات – أغانى الألعاب... وقسَّم كل منها كما يلى:
أغانٍ عامة: الأشخاص – الحيوانات والطيور – الكُتَّاب والمدرسة.
أغانى المناسبات: المطر – رمضان – العيد – خسوف القمر – أغانٍ وطنية.
أغانى الألعاب: أغانٍ عامة – أغانى الأولاد – أغانى البنات – أغانٍ مشتركة.
وأورد الباحث عددا ضخما من الأغانى فى هذه الأقسام المتنوعة، نختار نماذج منها فيما يلى:

ست الكل
ماما يا ماما يا ست الكل
قلبك أبيض زى الفل
بابا يا بابا ربنا يحميه
جاب لى عروسة وجاب لى حصان
سقَّفى يا عروسة
ارقص يا حصان
الديب السحراوى
التعلب فات فات
وفِ ديله سبع لفات
والدبة وقعت فِ البير
وصاحبها راجل خنزير
ما فاتش عليكو الديب الديب السحراوى
فات فات
وفِ ديله
سبع لفات

قطتى
قطتى يا مشمش
يا محلا عينيكى
ليه بتقولى نونو
باحسبك جعانة
جبت لك اللبن
والسمك البلطى
تعالى اقعدى جنبى
على القطيفة البمبى
بمبى بمبى بمبى
مدرستى بتفتح بدرى
مدرستى بتفتح بدرى
آخد أدواتى واجرى
أجرى من تحت الكوبرى
يا ناس سيبونى
هتعطلونى
***
الدنيا برد
الدنيا برد الدنيا برد
وعمى خليل بيقطّف ورد
وأبله حنان بتشم الورد

رمضان كريم يا حاللو
حاللو.. يا حاللو
رمضان كريم يا حاللو
حِل الكيس.. وادينا بقشيش
لنروح ما نجيش يا حاللو
بوجى وطمطم دخلوا الفصل
بوجى وطمطم دخلوا الفصل
عملوا عمايل ما بتحصلش
قومى يا ماما صلى العصر
قبل ما بابا ييجى من مصر

ماما بتخبز
ماما بتخبز كحك العيد
بابا يصلى صلاة العيد
شفتى ماما جابت لى إيه
نونو صغير يا اختى عليه
ياللا نبوسه من إيديه
ياللا نعضُّه من رجليه

حاج حجيج
حاج حجيج بيت الله
والكعبة ورسول الله
جيت ازورك يا نبى
ياللى بلادة بعيدة
فيها أحمد وحميدة
حميدة وِلدت ولد
سمِّيته عبد الصمد
مشِّيته ع المشاية
خطف راسه الحداية
حِد يا مِد يا راس القرد
هوه ولد واللا بنت

راكب ولا ماشى
أستك.. يا أستك
يا بابور مفستك
بابا جى إمتى؟
جى الساعة ستة
راكب والَّا ماشى
راكب بسكليتة
بيضا والا حمرا
بيضا زى القشطة
وسَّعوا له السكَّة
واضربوا له سلام

فتَّحى يا وردة
فتَّحى يا وردة
قفِّلى يا وردة
هنا وردة (تصفيق)
وهنا وردة (تصفيق)
هنا فيونكة
وهنا فيونكة
هنا حتِّة سكرة
وهنا شمعة منورة
وهنا المَمْ المَمْ المَمْ
وهنا الكخ الكخ الكخ
وهنا الدح الدح الدح

حادى بادى
حادى بادى
كرنب زبادى
سيدى محمد البغدادى
بنت العسكر
راحت تِسْكر
مين سكَّرها
القُمع السُكَّر
يا كتكوت
روح السوق
هات البيضة
م الصندوق
إوعى تاكلها
تطق تموت
إبرة الخيَّاطة
واحد اتنين تلاتة
إبرة الخيَّاطة
خيَّطى لى كُمى
إوعى تقولى لامى
وابويا يدبحنى
والخروف ينطحنى
والمعزة تحوش عنى