ثلاث قصائد

الورد فستان الندي من قماش الورد فستان الندى / ألوان .. الاخضر : ربيع حلم سايل لعابه ع الشجر غنوة
الاحمر : شهيد مظلوم باح بسر الهوي
عِنوة
الابيض : حكاية حب فى الزمن الضنين قال ..
الحياه حلوة ،
والحلم يشبه ضحكتين الفل ساعة شروق
مسروق زمان الوصل كان بيننا
شباك حياة مفتوح
بيطل ع الدنيا ..
نهار
الصمت آخر مواليد القرار
اتكلمي
وتعالى نرسم غنوتين للصبح
يعرفنا ..
لا سكوت
ولا شهوة موت تكتفنا
حاطين خوفنا فوق شفايفنا
ودايسين عليه

واحد بيشوف محذوف
للبحر طعم الحياه
وللندى فوق جبين الورد شامه ..
بتزينه
والحلم يموت فى بيوت ..
ع الحيط ..
ويقولوا ده مكان تخزينه
وادى الطريق
وادى اللى ماشيينه ..
واحد بيشوف محذوف
والتانى ضرير
بانده عليكِ وصوتى مش كروان
طالع على المواسير
تربستى ليه البيبان ؟
قطّعتى ليه الحبال وهدومى مبلولة ؟
مش وعد كان والوعد دين؟ ..
لو يوم جرحنى الهوا
تبقى انت مسئولة ؟
ياوردة والربيع مخصوص ..
لناس غيرنا
مش كان ضرورى ف كشوف غرامك
تكتبى سطر ف حضورنا ؟

وبتبعدي
وبتبعدي
وأقولك بلاش
مش كل نكسة حلم ف عيون المها
يبقى انتهى .. لا
ماتولّفيش
وماتخلطيش التعب بالحلم ف عروقي
وماترسميش على وش بكره ف غنوتى حسرة
أنا حزنى عيل جبان
بيكش من نظرة
وبيختفي
زى المراكب جدّفي
ه تلاقيني
مع أول موجة
جايه ف بحورك تصب
أمال يعنى إيه حب ؟!
وللا ليه !
والعمر شطين إنشطار قمر السنين ..
محتل
أمال يعنى إيه ضل ؟!
وانت هناك واحنا هنا
يربط مابيننا الدهشة وجراح العنب
وأنا لسه حي
مابقتش لسه حصان خشب
وبتبعدى ..