شِعرى مالوش ف التورية ولا ف الخريطة الثورية ليه ف الجمال والحرية وف عظمة الشعب السوري شعرى خلاص غادر قلبي هاجر .. مع فرحى وحبي وحتى دربى .. ترك دربي وصاحب الشعب السوري
تلج الشتا بقى نار يا ماغوط وانا ع ( الحدود ) مش لاقى القوت نازح .. وعينى هناك بتموت على غُربة الشعب السوري
الفيل يا سعدالله ياونوس داس ع الحياة واستحلى الدوس باع الوطن أقمار وشموس وباع سما الشعب السوري
اتجمعوا كل الأحلاف اجلاف عرب .. أغراب اجلاف اهل الخلاف على بنى سياف بيدبحوا الشعب السوري
جيوش صهاينة وفرس وروم بيقسموا الفجر المظلوم وبيحرموا الوطن المحروم من ضحكة الشعب السوري
زلزال غشيم .. بركان هزات يحدف جثث وسموم وغازات على صوابع على فرزات ومواجع الشعب السوري
بسمة وطن باهتة بتنهار والرعب دار ف بواقى الدار انقاض وطن ف ايدين تجار بيكرهوا الشعب السوري
الصبح طالع بيعّمر طعم الحياة وشرفة ف دُمّر بس الشيطان ماشى يدمر ف عزيمة الشعب السوري
ولا لاقى خطئى ولا صحك والموت ف روحى بيتمحك والحمصى كان نكتة تضحك بقى جرح للشعب السوري
من الجولان لجبل قاسيون الموت شبح .. ملعون .. مجنون ساب القبور وسكن ف عيون اهالينا م الشعب السوري
معلولا .. قديسة .. وتراتيل متكلمة بلغة الإنجيل ردوا عليها ب ( البراميل ) بتفجر الشعب السوري
أنا وحماة .. وصوت النواعير دايس علينا خف بعير صنم أسير فكر التكفير بيكفر الشعب السوري
الموت على وجه السرعة نسج الكفن بمقاس درعا لا ساب بشر ولا ساب مرعى ولا زرعة للشعب السوري
القتل وتجارته الرابحة عداد .. يعد على السبحة من هجرة .. لإعاقة .. لدبحة لمؤامرة ع الشعب السوري
حكواتى سوق الحميدية شايل ربابة .. دموية مافيهاش حكاية وردية يحكيها للشعب السوري
بيقطّعوا وطنى أمامي الإدلبى غير الشامي اصلّى ف الفجر الدامي وادعى للشعب السوري
جوة الوطن اصبح لاجئ طريد ومش لاقى ملاجئ يا عربى فوق ولا تتفاجئ لو كرهك الشعب السوري
اخواتى .. وباسم الرحمن والغرب بسم حقوق انسان حرمونى اشرب وانا عطشان من مَيّة الشعب السوري
مابين دمشق وبين ريفها الدنيا تايهة ف تخاريفها عايزة الربيع بس خريفها طَوّل على الشعب السوري
مال السنين والشام مالها دا انا قلبى جه يحج سعى لها طال المطال والخوف طالها وقفلها ع الشعب السوري
ف كهف ارهابى مجوسي سجنوا الجمال الطرطوسي والدم طرطش ف كابوسي من قهرة الشعب السوري
فين التيجان ف جبال يبرود وصوت حلب بيغنى قدود وفين صباح فخرى على العود بيطرب الشعب السوري
فين الصبايا ندى واغراء وشهر آب .. جبل العذراء وفين نزار عطر الشعراء عاشق من الشعب السورى
الطفلة دى مين ح يغيتها فين أمها وفين امتها الخوف يا ناس ح يموتها وبتبكى ع الشعب السوري
والطفل ده ساند جده مع ان كل الكون ضده حُكم ومعارضة بيهدوا ف ملامح الشعب السوري
كاس الوطن من دمع العين وطن دريد لحّام راح فين بلد الحنان قسوتها منين ردوا على الشعب السوري
وادى العيون .. وعيون وادي من بَرَدى .. من سوريا بلادي فيهم جدودى واحفادي وكلنا الشعب السوري
للحلو مشتى مالوش تاني إلا ف صيف الزبداني عنوانى .. طول ما انا عنواني أُخوة الشعب السوري
أنا ودمشق وبلح الشام بايتين سوا ف دار الأيتام ننسج خيوط حلو الأيام ولا ينحنى الشعب السوري
وف المعرة يا معري اجيال بتقرا .. وبتقري ولا الكيماوى ولا الذري ح يهزموا الشعب السوري
