غنوة برمهات

هذه القصيدة لا تنتمى بالطبع للتراث الشعبى مجهول المؤلف, لكنها أحد نماذج استخدام شعراء العامية العامية لعناصر من هذا التراث. فقد اعتمد فيها صلاح جاهين على الشهور القبطية موضوع هذا العدد من "ثقافة شعبية"
حسيت به فى ضلوعى، كأنه الحليب،فى بِز مطروده بلا طفلها،
الدمع، لأ ده الدم، لأ ده اللهيب،
لأ ده الكلام، أحمر، ملعلع، رهيب،
كما شمس عز الصيف، بتقدح صبيب
آه يا لهيب زعابيب بؤونة وأبيب،
أنا صدرى قلعة نحاس،
صهدت على الحراس
داخوا،
ولما زاد الصهد، ساح قفلها.
ملعون فى كل كتاب يا داء السكوت،
ملعون فى كل كتاب يا داء الخرس،
الصمت قضبان منسوجين عنكبوت،
يتشندلوا الخَيّالة فيه بالفرس
يتشندلوا الخَيّالة، واشحال بقى،
عصافير غناوى ملونة رقيقة،
حياتها فى الزقزقة.
وانا قلبى طير خير، ان ما غَنّاش يموت،
آه يا حلاوتك يا نسيم شهر توت،
القفل ساح فى الصيف خلاص وانهرس.
رفرف يا طير قلبى، على بيوت بيوت
.. قول للى فى البيت اللى بلا لبلاب ولا ياسمين،
يا ام العيون اللى كلامهم رزين،
والشفتين اللى ابتسامهم حزين،
يا صاحبة الحيرانين،
صاحبك يحبك، من سنين، من سنين.
وحياة ليالى الحنين،
والفجر والسهرانين،
والصبح والعشْمانين،
والضهر والعرقانين،
والعصر والتعبانين،
والمغرب المرعب، وما فيه من عذاب مجانين..
ما ودعك صاحبك، ولا خان هوى،
ولا من هلاك الحب قال يا نجا،
مهما انضنا وابتلا،
ولا عمره قال يا أنا،
تشهد عليه الأرض قبل السما،
إنه أمين.
وعلى العشش، وعلى الحوارى الغواط،
يا قلبى لما تروح،
ما تروحش لا بلبل، ولا وطواط،
روح زى ما انت، قلب له ألف عين،
وألف ودن، وألف ألف لسان.
ولو فى شهر القهر، طوبه الجبان.
اسمع وشوف الهم طالع منين..
يا قلبى يا مليان،
قول للى فى البيت الصفيح، افتحوا،
صاحبكم الغايب رجع، صحصحوا،
صاحبكم اتلطَّم كثير،
اصفحوا.
يا ساكنين الصفيح،
استبشروا وافرحوا.
أنا مانيش المسيح،
علشان أقول لكم،
طوبى لكم غلبكم،
لكنى باحلف لكم،
باحلف بكم.. وباقول،
الدنيا كدب ف كدب، وانتوا بصحيح.
حسيت به فى ضلوعى، كلفح الهجير.
فَكِّيت زراير صدرى – مش بَغْدَدَه –
صدرى ما زال مليان بتنهيد كتير.
تنهيد، وطَرْق حديد، وأناشيد فدا.
هات يا برمهات الربيع، والعبير،
والخضره، والعصافير، ودود الحرير …
هاتهم هنا, يشوفونى من غير قناع،
أنا اللى قلبى استطاع،
يِعَدّى من أمشير أبو الزعابير
ويعدى من طوبة أبو الزمهرير
ويجيلك انت يابرمهات، يا نضير، يابو شمس..
زاعق ما يعرفش همس.
1961