حكاية "الشاطر حسن‬ ‫والشاطر محمد والشاطر علاء الدين‬"

صلوا ع النبي:‬ ‫كان فيه واحد عنده تلات صبيان "الشاطر محمد‬ ‫والشاطر حسن والشاطر علاء الدين" بس أم قال لهم ‫أبوهم: يا ولاد أنا رايح الحجاز، كل واحد يطلب اللي هوه‬ ‫عايزه، أجيبهوله معايا، الشاطر حسن قال له هات معاك طقم‬ ‫حلو ولما تيجي تجيب لي حصان.
والشاطر محمد قال له وأنا‬ ‫أما تيجى هات لي لِبس وهات لي حاجة حلوة.‬ ‫وانت يا شاطر علاء الدين.‬ ‫قال له هات معاك كورة ومضرب.‬ ‫قال له طيب.‬ ‫جه الراجل من الحجاز.‬ ‫قال لهم خد انت يا شاطر حسن اشتريتلك حصان والطقم اللي انت‬ ‫عاوزه .‬ ‫وانت يا شاطر محمد خد اشترتيلك اللِبس اللي انت عاوزه.‬
‫وانت يا شاطر علاء الدين خد اشتريتلك الكوره والمضرب.‬ ‫الوله قال طيب.‬ ‫قاموا قالوا احنا يابا عايزين نتجوز.‬ ‫فز الشاطر محمد قال هاجيب منديل وأفضل ألف بيه‬ ‫واللي يطير مني عليه هاخطب منه.‬ ‫خطب.‬ ‫المنديل جيه على بيت ناس كويسين، اتجوز منه.‬ ‫ده الشاطر محمد.‬ ‫الشاطر حسن راخر برضك قال وأنا هامشي كده.‬ ‫البيت اللي يعجبني أتجوز منه.‬ ‫الشاطر علاء الدين قال وأنا هاضرب الكوره، مطرح‬ ‫ما ترسى الكوره هاتجوز.‬ قالو طيب.‬ ‫راح ضرب الكوره، جت الكوره، لقاها وقعت فى‬ ‫خرابه.‬ ‫ومطرح ما الكوره وقعت لقى "قردة"‬ ‫قال خلاص أنا هاتجوز القردة، مش كل واحد بيتجوز‬ ‫اللي وقعت من نصيبه، أنا هاتجوز القردة.‬
فقال لها أنت من نصيبي.‬ ‫كلهم بقى راحوا بيتهم، وهو اللي قعد فى ‫الخرابة يضرب فى القردة. وفضل يضرب وهى تقول "أه‬ آه" وتلطم بإيديها كده على وشها ويضرب فيها، ويسيبها في‬ ‫الخرابه ويمشي. يلف لفته وييجى ويضربها.‬ ‫فأبوهم قال لهم يا ولاد أنا جاي أزوركم.‬ وبعت الخدامة بتاعته للشاطر محمد قالت سيدي جاي‬ ‫يزوركم بكره.‬ ‫وراحت للشاطر حسن وقالت له سيدي الكبير جاي يزوركم‬ ‫بكره.‬ ‫قالو أهلا وسهلا.‬ ‫ ً‬ ‫ ً‬ ‫وراحت لعلاء الدين لقته ماشي في السكه.‬ ‫قالت له يا سي علاء أبوك جاي يزوركم بكره.‬ ‫قال لها طيب.‬ ‫كانت مراته بقى دعكت الخاتم. قال لها شبيك لبيك.‬ ‫قالت له أطلب سرايه مش موجودة في الحته.‬ ‫والخدم فيها والحشم والسلم رخام، كل اللي يطلع عليه‬ ‫يقول له أهلا وسهلا. والنازل يقول له مع السلامة.‬ ‫ ً‬ ‫ ً‬
بس وبعدين.‬ ‫راحت بعتت لمراة الشاطر محمد الخدامه بتاعتها هي‬ ‫ومراة الشاطر حسن.‬ ‫وهي ملكة بس متخفيه فى قردة، جلد قردة.‬ ‫راحت الخدامة للأولانية قالت لها: ستي بتقول لك إديني الزعافه إلى عندك‬ ‫واديني حبة زبل فيران تحطهم على وش الفته لسيدي‬ ‫الكبير، لأنه جاى لنا النهارده.‬ ‫قالت لها والنبي ما عندي، قاقوم أنفض الدار يمكن الاقى ‫شوية أحطهم أنا على وش الفته.‬ ‫قالت لها طيب. وراحت للتانيه.‬ ‫قالت لها ستي بتقول لك اديني شوية زبل فراخ‬ ‫نحطهم على وش الفتة لسيدي الكبير جاي النهارده.‬ ‫قالت لها والنبي ما عندي، أنا هاقوم دلوقتى أنفض‬ ‫القفص وآخد الشويه اللي هلاقيهم واحطهم على وش الفته‬ ‫بتعتي.‬ قالت لها طيب، وراحت القردة بقى عملت سفرة مهوله،‬ ‫والسفرة تتحط لوحديها، وتقول أهلا وسهلا بسيدي الكبير،‬ ‫وتتعان لوحديها، وتقول آنستنا يا سيدي الكبير، والقهوة ‫تنزل لوحديها وتقول أهلا وسهلا بسيدي الكبير. وبعدين أبوهم فات على مرات الشاطر حسن جيه ياكل لقى زبل‬ ‫فيران.‬ ‫قال لها شيلي الأكل.‬ ‫راح على مرات الشاطر محمد، برضك حطت زبل‬ ‫فراخ.‬ ‫قال لها شيلي شيلي بلاش قرف. راحت شيلاه.‬ ‫راح هناك عند مرات علاء الدين.‬ ‫يدور على الخرابه لقى سرايه كبيرة وخدم على الباب.‬ ‫أول ما دخل جوه لقى السلم يقول له أهلا وسهلا.‬ ‫يدوَّر على اللي يقول الكلام ده.. ما فيش حد.‬ ‫لحد ما قابلته مرات ابنه، اهلا وسهلا بسيدنا الكبير.‬ ‫القهوة جت "اتفضل يا سيدنا البيه" يدور على اللي‬ ‫جاب القهوة مين؟ مفيش حد.‬ ‫وبعد ما خلص اتشالت لوحديها، وبعدين السفره‬ ‫اتحطت لوحديها، الحاجات أصناف ما اتوصفتش .‬ ‫الراجل مشي أخر انبساط.‬
‫وقال لها يا بنتي انتو لازم تجوني عندي. بكرة حفله‬ ‫كبيرة.‬ ‫أنا لازم أعزمكم، واعمل لكم ليله وفرح كبير.‬ ‫بعت لمرات الشاطر محمد والشاطر حسن.‬ ‫وقال لهم ضرورى تيجو الحفله بكرة وعازم جميع‬ ‫العالم.‬ ‫عشان خاطر مرات علاء الدين.‬ ‫راحت هي بعد ما مشي البيه الكبير، دعكت‬ ‫الخاتم، رجعت الخرابه ورجعت قردة.‬ ‫وجه علاء الدين.‬ ‫قال لها قابلتى أبويا، أوعي تكونى كلتيه، أوعي تكوني‬ ‫هربدتي مصارينه، تقول له "آه آه" وتلطم بإيديها على راسها.‬ ‫أبويا قال بكره عنده حفله كبيرة.‬ إوعي تعضي الناس هناك، واوعي تهيجي العالم،‬ ‫اوعي تاكليهم وتفضيحنا.‬ ‫ويضرب فيها ويمشي.‬ ‫وبعدين الصبح راحت هي عامله السرايا اللي‬ ‫كانت موجوده ودعكت الخاتم قال لها شبيك لبيك. السعد بين ايديك.‬ ‫طلبت حنطور بسبعه خيل تركب فيه.‬ ‫هي والدادات بتوعها وقدامها مزيكة تزفها لحد البيت.‬ ‫وقبل ما تروح،‬ ‫بعتت لمرات الشاطر حسن قالت لها ما عندكيش زعافه‬ ‫أركب عليها لحد بيت سيدنا الكبير.‬ قالت لها والنبي ما عندي إلا زعافه واحدة هاركب أنا‬ ‫عليها.‬ ‫وراحت بعتت لمرات الشاطر محمد ما عندكيش وزة ‫اركب عليها لحد بيت سيدنا الكبير؟ قالت لها والنبي ما عندي إلا وزة واحدة هاركب أنا‬ ‫عليها.‬ ‫بس.‬ ‫الزينه اتنصبت هناك.‬ ‫وفرح.‬ ‫وأول ما جت دِكهة راكبه الوزه "قاق، قاق" ‫ايه ده ايه ده راكبه وزه، دخلوها بسرعه.‬ ‫والتانيه جات راكبة الزعافة، ‫قال أيه ده؟ دخلوها بسرعه.‬ ‫وبعدين.‬ ‫صاحبتنا جايه بالمزيكه والحنطور.‬ ‫قالوا دي مرات علاء الدين، العالم وقفت كلها يتفرجوا.‬ ‫ِْ ‫مرات علاء الدين جايه بالزفه.‬ ‫وصاحبنا يطل من بعيد ويقول دي زفه مراتي أنا؟ دى‬ ‫مراتي أنا؟ مش معقول.‬ ‫الشاطر حسن والشاطر محمد قعدوا يقولوا لأ يا أخي‬ ‫انت متجوز ملكه وتضحك علينا وتقول دي قردة.‬ ‫تعالى شوف تعالى.‬ ‫قال لما اروح أشوف الخرابه.‬ ‫راح، ‫لقى مطرح الخرابه سرايا آخر حلاوة ومكتوب سراية‬ ‫علاء الدين.‬ ‫ودخل جوه السلم يقول أهلا وسهلا.‬ ‫راح داخل المطبخ لقى الجلد بتاع القردة اللي بتلبسه.‬ ‫قام حرقه.‬
‫وهي قاعدة هناك قالت ريحه انس مش من الجنس ريحه‬ ‫جلودي بتتحرق،‬ ‫قال لها حرام عليكي‬ ‫جابوا لهم الأكل أوم هي تاكل تكُب الملوخيه كده تنزل‬ ‫دهب.‬ ‫تاخذ معلقه رز كده وتكُبها على هدومها تنزل ياقوت.‬ ‫لما بقت كده دهب وكده ياقوت.‬ ‫سلايفها عايزين يعملوا زيها، يجيبوا الملوخية تنزل‬ ‫ملوخيه، الرز ينزل رز.‬ ‫أبوه أعد يبوس فيه من هنا ومن هنا واخواته.‬ ‫وقال لازم اعمل فرح أربعين ليله.‬ ‫وعملوا زيطه وعاشوا فى تبات ونبات، وخلفو صبيان وبنات.‬ ‫وتوته توته خلصت الحدوتة.‬
من كتاب "حكايات شعبية"، جمعها الشاعر الراحل
مجدى الجابرى‫.‬ ‫