"صندوق الشوار".. أو "حكايات الأبريق والقُلَّة"

فى مطلع هذه الألفية (2001) صدر عن هيئة الكتاب ديوان من شعر العامية يتحدث فيه الطمى بعد ان صار فخارا, وتدور رحى الصراع والخصام ويضطرم الحب والغرام بين إبريق منكسر البزبوز, لكنه جرىء فى الحب,
وبين عرائس الفخار من قلل حمراء وبيضاء, وحتى الكنكة الألامونيا لم تسلم منه! مما أثار اللغط فى مجتمع أدوات ذلك المنزل الريفى الشعبى, وجاء الزير العظيم متسندا على حمالته يستطلع الأمر, فلم يتعظ الإبريق ولم يرعو, ورد على الزير بالجامد قوى.
هذا ملخص الحكاية الثانية عشرة من " حكايات الإبريق والقلة"(أو "صندوق الشوار" ) للشاعر ناجى شعيب الذى أنشأ عالما من الصور والكائنات مستلهما من مفردات الحياة المنزلية اليومية عند أبناء الشعب البسطاء خاصة فى الريف,وفى زمن قبل هذا الزمان, ربما بقرن أونصف قرن.
وإذا كان العالم ريفيا فى صوره فاللغة بنت مدينة. وخفة الظل أيضا مدينية.
ووسط الشجاروالطجرمة والخيال الجامح, وخلف قناع الفكاهة الفظة, يترسب
شجن من نوع ما,فى قاع ذلك الإبريق المنكسر البزبوز.

الحكاية (12)
مش عارف يا أخى هو انت جبلة.
إزاى تقدر تستحمل كل اللى بيجرالك ده.
دى فضايحك بجلاجل وسط الفخار والمواعين.
دا كأن ما فيش غيرك ف البيت كله.
القُلَّة الحمرا مع الكنكة ما هماش ناويين لك على خير.
دايرين وسط المواعين ف المطبخ بيجيبوا ف سِرتك للرايح والجاى.
بيقولوا إنك خباص وملاوع وجبان. تِنِك تِدَّحلب ع القُلَّة البيضة.
لما ضحكت عليها وخدتها تحت النملية.
قال إيه المصفة شافتكم من ع الرف.
بس النملية صراحة بتحلف وبتتحالف ان كلامهم ما حصلش.
يقولوا لها اسكتى ياولية ياضلالية
واهى قاعدة تدارى على فضايحك وسط المواعين ف المطبخ.
بيقولوا القُلَّة البيضة يا ولداه ع الشباك قاعدة بتستفرغ ميتها.
هيه صحيح حامل منك؟
ما صدق أبريق الشوم المقطوش لما سمعهم جرى على الزير يحكى له.
ما انت يا أبريق ما عملتش خاطر للزير برضه.
ما هو أصله كبير الفخار والقُلَّة البيضة فى معَزّة بنته.
أصل الأبريق الفخار مش ناسى يوم ما قطشت له بزبوزه.
خلّيته ف وسط الفخارمُسخة.
واهو كل ما يطلب إيد قُلَّة تقول له ازاى.
ما هو أصل اللى ما يقدرش يصون بزبوزه.
هايصون شرف اللى هايتجوزها ازاى؟
الزير حالف لو شافك ليطين عِيشتك.
وقليل ان ما كسر لك ودن
مش تتلم شوية عن الفخار وتسيبه ف حاله؟
ح تتنَّك طايح كده ورا كل المواعين.
لحد ما خليت سمعتهم زى الزفت.
انت ما بتحرمش يا أخى.
هو انت ما كفّاكش اللى جرالك من تحت راس الكنكة.
جاى المرة دى عشان تتشطر على قُلَّة وليّه.
أهى قاعدة تعيط ع الشباك وتقول أنك خدتها بالغصب.
حطيت بزبوزك ف ودنها وجريتها بكل عافيتك تحت النملية.
من خوفها لاتتكسر دخلت وياك مش بخاطرها.
مستعفى ع القُلَّة الغلبانة يا ناقص؟
علشان عارف ان ما فيش حد من الفخار يقدر يرفع عينه ف عينك.
ولا يقدر لك.
طيب لو هيه نحاس أو الامونيا.
كنت هاتقدر تعمل كل اللى انت عملته مع القُلَّة الفخار.
هاتراجع نفسك ميت مرة.
بس احنا كده.. نتشطر ع الغلبان اللى ف وسطينا.
الكنكة وعارفين أنها هاتطرشق منك م الغيظ.
طيب والقُلَّة الحمرا حطَّاك ليه فى دماغها وزاعقة؟
عمالة تهلل وتزعق واللى تقوله تعيده.
وكل ما تِهْدَى الكنكة شوية تدلدق ع الموضوع جاز تانى تشعللها.
صَحِّت كل الحلل النايمة على الرف.
كل حريم البيت عاملين هليلة.
غيرة نسوان.
ما هو كُلِّتهم من جواهم يتمنوا يكونوا مكان القُلَّة البيضة.
بس هاتعمل إيه فى الجُبن بقى.
عينهم تِندَّب فيها رصاصة.
وسَعْت الجد قال إيه شرفى يا أبريق أخلاقى ما تسمحش.
إبعد لحسن حد يشوفك.
واهو كُلِّتهم ع الحال ده.
بص يا أبريق اليمة التانية هناك.
الزير راكب على حملته وجاى نواحينا.
أنا ماشى يا عم سعيدة.
القربة اللى اتخرمت شيلها لوحدك.
مش ناقص قُلَّة أدب الزير,أتْعَك معاه على ايه؟
إحنا صحيح أصحاب.
بس انت اللى خارمها.
واد يا كانون رايح على فين؟.
أستنى ح اقول لك كلمة يا واد.
أما باجور إنما ندل صحيح
قال إيه استنى يا واد يا كانون
استنى هاقول لك كلمة.
بيدَوَّر على حجة عشان يخلع منى ف وقت الزنقة
ودا إيه كمان الجاى على حمالته ومنفوخ ع الفاضى
عم الزير
دقى يا مزيكه
خليك على قدك لاحسن ابعترهم لك.
الحبة الفاضلين فى كرامتك قدام الفخار.
كلمنى كويس
وبلاش النفخة الكدابة اللى بتعملها عليهم.
لاحسن اضَّيع هيبتك وسطيهم من غير لازمة
تقدر تنزل من ع الحمالة لوحدك؟
لو زير بصحيح إعملها.
أحسن حاجة تدَوَّر لك على أى نواية.