قصيدتان

مدد أنا كنت شاعر .. وكان لي ف المحبة جلد .. وكنت قطب ..
وكان لي ف النفحات مدد..
وكنت معصوم م الغلط
وكنت شيطان.....
وجسمي نبَت ف الحواري والغيطان
ومالوش حيطان....
وسقفي مكشوف الغطا وبصري حديد
وكان لي مزاج فقي ..وهيئة المجاذيب
وخيال بيانو ف حفلة جاز
تحويله م النهاوند علي عجم ف حجاز
ووافقت في هيئة جماد
أكون البحر رازق .. وملهم
لا ليه اخر ولا ليه باب
ورفضت في هيئة نبات
أكون لبلاب.....
لااطلع علي غيري
ولا أحوش له طلوع
وليا عيشة بعد موتي .....
وصوت مسموع
موال رميت الزهر
رميت الزهر ميت مرة ولا نصفنيش
يدور ويلف ميت مره ..
ولا يركن ف يوم ع الشيش
وطالبة المهر بالغالي وانا ماعييش
ويرضيكي أعوز مالاقيش
ويرضيكي أعيش درويش
واعيط تحت شباكك ...
تردي الشيش .. وماترديش
وشفتي حبي قليل ..
وحيد قصاد كترة...
وشفتي قلبي عليل ..
لاحول ولا قدرة ...
أنا بدمي خليت الدروب خضرة
وانا اللي نوٌر صوابعه العشرة للعدرا
وفرقت الندور...
في سيده وحسين ...عشان اشوفك
واملي في هواكي العين
قلبي اللي شفتيه ضعيف
طبب الكفه ...
واما ندهتي جريت ف السكه اتكفى