طهى.. مقالب.. عُرى.. أهلاً رمضان

عدى النهار.. واتكلم التلفاز.. والعيون يا عينى مش عارفة تختار! أصلها يا قلبى مش قادرة تركز على مدار النهار! يا ناس ياهو.. هو.. إحنا بجد فى رمضان.. ولا ده مهرجان!!

روائح مطبخ وكلام عن طعام أشكال وألوان.. ليل ونهار..!
المطبخ شرقى وغربى.. صينى على يابانى.. وواحد سودانى!!
الناس شايفة محمر ومشمر.. أكلات كتيرة.. غريبة أو طريفة.. مش مفهومة ولا مطلوبة إيه يهم!! برنامج ورا برنامج نشوف فيها أصناف وراها أصناف.. لا حد حاسس بالبشر اللى بتشاهد.. ولا المشاهد حتى عارف مكونات الطبخة يجيبها منين..!! تكلفتها كام على أد إيدنا ولا مش ممكن نقدر عليها.. الكلام ده أمر مش مهم! يا عم أنت وهو هى أنتم من هنا ولا من هناك.. حاسس بدول ودوكهما ودولهم..!! ولا إحنا مش فى الدماغ!
ياناس يا هو يا بتوع البرامج داهية.. ارحموا الراجل التعبان.. الغلبان..
أصل تكلفة أكلة واحدة من أكلاتكم تكفيه لمدة أيام..!
ويادوب نقلب المحطة.. نلاقى غيرها برامج أغرب وأعجب!
بيقولوا عليها برامج فكاهة وهى أتفه من التفاهة..! مقالب شقلباظ!
آل إيه يا عينى.. جايبين واحد مكحرتينه.. مبهدلينوه.. وكرامتة آل بتنداس!
الواد يا عينى يتكهرب.. يخاف.. ذلة وكتمة أنفاس..!
وبعد كتمة النفس يرجعوا يقولوله دا إحنا بنهزر معاك..!
وغيره يجيب لنا آل فنان يعمل مرعوب وغيره يعمل علينا وطنى مالوش مثال!
ومن الأكل للمقالب.. يا ترى يا مصرى كلفت التفاهة دى كام من الجنيهات!
بالذمة ده كلام يا تلفاز! يجيى رمضان وما نشفش غير مطبخ ومقالب وعرى كمان! ما كل المسلسلات جايبة مصر والمصريين يا عينى يا حرام!
كله عريان.. أو متخدر وسكران.. واللعب بالدقون كأنهم كفار!
والله مصر جميلة.. ورجالها وحريمها أجدع وأجمل من اللى فى التلفاز!
يا منتجين ارحمونا شوية.. وحطوا إيديكم على الجمال..!
خلوا القوة الناعمة يبقى لها دور فعال.. سياحة وصناعة وسينما جادة كمان!
سيبكم من اللى فات وفكروا فى بكرة وبعده كمان.. ارحمونا شوية وافتكروا إننا فى رمضان.. شهر محبة كله عبادة.. للوصول إلى الرحمة والمغفرة والعتق من النار! رمضان يا ناس مش محتاج.. تكاليف وإسراف بلا لازمة على برامج ملهاش لازمة! واصحى يا نايم صح النوم.. إحنا يا سيدى فى شهر الصوم!